عندما تشاء الاقدار ويصبح الحبيب غريم....عندما يتحول الحب الى عذاب...كيف يكون رد فعلنا....هل يحق لنا ان نحمل الاخرين ذنب اخطاء غيرهم...قصة تجمع الكثير من المعاني...تابعونا
يسعد.مساؤكم حبايب ...النشر بين يوم ويوم...ردت اكد هالشي لان هواي بنات اشوفهم يسألون ليش تأخر النشر...تحياتي متاهات همس ليل البارت الثاني عشر جنت كلش فرحانة بترتيباتي... ومنتظرة اشوف رد فعل هشام... نفسي اعرف شي عن حياته السابقة... بس مايحجي ... كلت بعده بالبداية ...بلكت بمرور الوقت يفتحلي كلبه... بالغرفة واكفة كدام المراية اعدل حمرتي... سمعت الباب انفتح وانسد راسا طلعت استقبله بأبتسامة ... اول ما شفته عرفته صاير شي... جان صاير نار... _هاي هيج نزلتي اليوم... بلعت ريكي...اي شنو المشكلة... _لا يابوي وين المشكلة... شمر سويج السيارة والموبايل على القنفة... وعيني تتبع حركات ايده _والرجال الموجود جوة...ماله حساب عندج _كاعد بالصالة...واصلا ما ادري بيه موجود _وانتي اصلا شلون تنزلين جوة هيج... اجة احد من اخوتي...اجو اقاربنا... _هشام البيت مابي احد... جان عصبي حيل...تقرب مني ولزمني حيل من زندي... _لا بي خطيب لارا دائما موجود...وهواي خطار يجون المرة الي تريد تحافظ علة حجابها وسترها... ما تستهين بهالامور... _شنو قصدك... ضغط اكثر على يدي... _قصدي مو كل الزلم نيتهم سليمة...واذا لمحج بهالشكل... راح يصور انتي متعمدة دشوفين نفسج... فتحت عيني على وسعهم مامصدكة... _بس والله ما اقصد هالشي... _لوما ادري انتي شنو ...واخلاقج شنو... جان على هالدكة غير حساب لج وياي... ماتنزيلين بعد جوة هيج ... دفعني وفات للغرفة ... بقيت واكفة بمكاني مصدومة ... معقولة اكو هيج بشر تريد بس تخرب على غيرها... زين اني شمسويتلها.... رجعت التفت للغرفة ...ماكدر الومه اكيد حشت براسه لمن كالت بس.... هسة شسوي مااعرف ... بعدين كلت ما انطيها مجال... رحت للغرفة لكيته يبدل ملابسه.... بقيت واكفة بمكاني بالباب... خطوة تقدمني وخطوة ترجعني... _هشام...ادري غلطانة بنزلتي... بس محد كالي موجود سامر. سامر جان خطيب لارا....حتة ما احب اذكر اسمه _ودائما الباب يكون مسدود _يكون مسدود يكون مفتوح...توقعي اي واحد يجي فجأة... غالبا هشام جان يبقى بالفانيلا وشورت قصير لحد الركبة بالبيت... كمل لبسه وتمدد.....وكل هالوقت مايباوع علية _كوم خلي نحتفل بعيد ميلادك _مو طفل اني تفاجأت بحجايته... هو خلة مخدة برة راسه ولزم الموبايل وبد يكلب بيه طلعت من يمه واني كلش مقهورة.... ادري بيه عصبي...لكن بررتله.... بس هو هذا اسلوبه....من يعصب... يحجي علية وبعدين ياخذ جانب لامبالة ... بحيث يحرك اعصابي... ابقى اتمنى لو يبقى يحجي علية ولا هيج يسوي... رحت كعدت على الميز اباوع على الكيكة... وترتيباتي ....نزلن دموعي قهر.... هسة شنو مامكتوبلي افرح شوية.... باوعت للكارت وية الهدية...فتحته واني اقرا كلماتي بقيت فترة انتظر بلكت يهدى ويطلع... بس ابد ولا يمه...تعصبت سحبت الكارت وشكيته.. وذليته بالسلة مال الزبالة... وشلت الكيكة خليتها بالثلاجة... ولميت الميز... طبيت للغرفة لكيته نايم... باوعت عليه بقهر....بدلت وحاولت انام... بس دموعي ماخلن يغمضلي جفن... يمكن نمت الفجر حتة ماكمت صليت... واني متعودة مااترك صلاة الفجر.... كعدت الصبح راسي مسطور... باوعت لمكانه ماكو.... كمت للصالة لكيته كاعد يشرب كهوته... صبحت جاوب بدون مايرفع عينه لي... رحت بدلت على السريع...ونزلت دالحك على الخط بيومها كلشي مااكلت بالكلية... من رجعت للبيت...تلكتني امه بعد طبت لارا جوة _هاي شنو ...اشوا الكيكة على حطتها.... صفنت عليها عفتها وردت افوت بس من مريت يمها _عود خليت اسينة تشيل الزينة الي مسويتها من نظفت غرفة هشام ... بعد ماكو داعي لها... غير حركت دمي بلحظتها... رجعت وكفت مقابيلها _اريد اعرف ليش هيج اسوين.... ماتخافين ربج.. _شمسويتلج حبيبتي على كيفج لا تتهجمين... _هاي كله وشمسوية... عموما اذا عبالج راح يضربني .... او يطلكني... فما اريحج...هشام مو زعطوط ومايعرف المقابيله... _انتي اكيد مسويتله سحر.... ما اصور هيج.يعدي المسالة لو مامسويتله شي باوعت عليها...عفتها وصعدت ... وظليت افكر شحاجية له بحيث متوقعة ادكب عركة جبيرة بينا.... بيومها عرفت هشام ماياخذ بكل حجيها.. بس ارجع واكول داتأثر عليه.... شلون راح تخلص هالحياة وياهة... بقيت يومين نفس الاسلوب... هشام يرجع يغسل ويبدل يطلع وية اصدقائه... واسوي عشى وانتظره يرجع يسلم ويبدل وينام.... ولا عبالك اكو بشر وياه... كمت ماعرف اركز بدراستي.. وعندي امتحانات فصلية... واكلي على كد غدة الكلية.... طلعت بيومها من الكلية ميتة قهر صار امتحانين مامجاوبة... وقهر البيت...رجعت حسيت بجوع.... من دخلت سالت اسينة شعندج غدة كالت دولمة رحت بدلت ونزلت داصب لنفسي... لكيت لارا كاعدة تتغدة ... _تعاي اتغدي وياي... ماكدرت اكول شي... صبيت وخليت ماعوني على الميز وكعدت _صبا ليش تتهربين مني _اتهرب...ليش مسوية جريمة... _مو هيج قصدي... بس احنة عبالك غريبات...خط واحد وجامعة وحدة وانت مرت اخوية... وماعرف شي عنج...وكل الي بينا بس سلام _هيج احسن... _اعرف تسوين هيج علمود.. سكتت _شو سكتي...لو نسيتي اسمه _ما انسى اسمه لو العمر كله... انتي ماتعرفين الظروف... _ياظروف....ها صح مايكدر يوفرلج نفس مستواج ولا يكدر يلبي كل طلباتج... _لا تلوميني .... _تريدين ما ألومج... انتي تعرفين ظروفج من البداية وظروفه... ليش ماكلتيله ماافيدك.... ليش ماكلتيله انتة مو من مستواي... ليش علقتي بيج وخليتي يحبج... _ينسى بمرور الوقت _الظاهر ماعرفتي مهند شنو... ترة مو من ذولة الشباب حبهم سطحي... لا ...حبه من كل كلبه... يعني مايكدر ينسى بالسهولة الي نسيتي بيها انتي جانت مدنكة تبجي... _بس اكولج شي...ربي ياخذ حقه منج ومن كل واحد أذاه عفت الاكل وكمت واني كلبي محروك... بيومها مانزلت سويت عشى... كلت لمن ...اشو يجي يباوع علية وكاعدة انتظره.. ويدخل ولا كأنه... حتة مايسأل تعشيت لو لا.. من دخل مثل كل يوم سلم.... جاوبته بدون مارفع عيني عن الكتاب... حسيت وكف دقيقة يلا فات للغرفة... نزلت جوة اسويلي جاي حتة اكدر اكمل قراية... _شو ماكو عشى هاليوم... لا ومتغدية هنا هم... شكد اكره صوتها....عمري ماضجت وكرهت من انسان بس هالانسانة احسها حيل لئيمة التفت عليها....مسوية ريجيم ما اتعشى _يا صلوات ...ليش بيج لحمة حتة تسوين ريجيم صبيت الجاي...ومريت من يمهة.. _هاي يسموها رشاقة... عفتها وصعدت...وتأخرت بالدراسة... ثاني يوم نفس الشي رجعت اتغديت يمهم... بس هالمرة وحدي.... وبالليل هم ماسويت عشى... بيومها العصر بطني صارت اسهال .... وبدت تجيني لويات قوية.... لليل ونفس الشي... سويت جاي مر بلكت شوية تخف... طلع هشام من الغرفة شافني على نفس كعدتي من اجة لسة... _تعشيتي رفعت راسي متفاجأة... صار اربع ايام مايحجي وياي.. حتة من اكوله تتعشى بس يكول لا ومايباوع علية _ما اشتهي...تريد اسويلك شي _لا...بس اكلي شي لا تظلين بس اشربين جاي رجع للغرفة...واني اباوع عليه .. تنهدت... حسيت الويات زادت ولعبان نفس صار عندي شوي...وردت اتقيء ركضت للمغسلة... وحسيت مصاريني تتكطع من كد ما تقيأت... _شبيج صبا.... وكف وراي هشام وهو لازمني ... رجعت اتقى...هو عافني وراح... ضجت بس لحظة ورجع واني مدنكة على المغسلة.. رفع شعري بقراصة...وبقى لازمني _امشي اخذج للدكتور جنت ماكدر اجاوبه بيد سندني وبيد الثانية غسل وجهي بين ما سد البوري خليت راسي على جتفه... خلى ايده جوة ركبتي رجلي ورفعني.. وصلني للغرفة...وخلاني على الجرباية... راح شوية...واني نعكفت على نفسي من الويات مال بطني... من رجع كعدي يمي وهو يحاوطني بيديه _شبيج صبا... _بطني هشام راح اموت... كام من يمي وجاب جبة وشال... كعدني وهو ساندني...لبسنياها... وشالني....من نزلنا تلكتنا امه... _ماما خلي نطيهة شي للصبح... وين رايح بهالليل... ماجاوبها...طلع نزلني على كيفه وفتح باب السيارة الخلفي... _اصعدي تمددي هنا... ساعدني حتة اصعد لان جنت احس روحي مايعة.. اسهال من العصر وقئ واني ماماكلة... سمعت صوت لارا _اوكف هشام اجي وياك... اخذني للمستشفى ومنها للطوارئ... طلع عندي تسمم...سوللي غسل معدة ... وحولني لغرفة حتة يشكلون لي مغذي... حسيت واحد يمسد شعري ويمسح كصتي... جنت اعرك حيل... فتحت عيني شفته هشام... جان اكو نظرة خوف بعينه ... ونظرة وياها ماحبيت افسرها...ما اريد اوهم نفسي _شلون صرتي... _احسن... دنك باص كصتي... _حمد لله على سلامتج... التفت شفت لارا واكفة... _الله يسلمج... _شوكت نطلع... التفت على هشام...اسأله _شوي ارتاحي...ويخلص المغذي وباقي العلاج بالبيت.. العصر اخذج دكتور... بعدها نمت مادريت من كعدت جانت الصبح ... شفت لارا متكعورة على القنفة ونايمة... بس هشام كاعد صافن... _صباح الخير... من شافني كاعدة...تبسم واجى يمي _صباح الخيرات...شلونج _زينة...بس معدتي توجعني _طبعا فارغة تماما... _جاب عصير جان على الكوميدي الي يمي فتحه... _اشربي هذا لحد مانرجع للبيت... _ماكدر نفسي تلعب _لازم حتة شوية تكدرين تاكلين.. جنت اريد اكعد...خلى العصير على صفحة... واجى سندي وكعدني...وبعدين انطاني العصير كعد لارا وراح يسوي خروجية... رجعنا للبيت...ومن دخل السيارة اجى يشيلني... _اكدر امشي... حجت لارا...يمعودة دلال وابلاش...تخليه يجرب عضلاته... من دخلنا وامه شافته شايلني... حسيتها انعقجت...حمد لله على سلامتج...عبالنا حامل _يمة مو وكتها... عافها وصعدني.. من وصلنا لكيت باب السويت مفتوح...وريحته ديتول عرفت منظفي ...خلاني على القنفة... ودخل للحمام...سمعت صوت مي..عبالي ديغسل بس طلع جرني على كيفه... _ريحتج طيبة بس لازم نتخلص من ريحة المستشفى ضحكت...هيج ريحتي منعشة... اني جنت احجي وهو نزع الجبة والشال... وحسيته ديرفع التي شيرت... لزمت التي شيرت ...اني ابدل... باوعلي بنظرة ....ترة مو اول مرة اشوفج حمريت وردت اكوله بغير وضع اكون... _عفية هشام بس وصلني للحمام... بقى ساندني لحد الحمام... ودخلني ....اني اكمل _براحتج... راح اوصي على ريوك.. غسلت واني كاعدة احس بدوخة من اوكف من خلصت لبست برنص الحمام وطلعت... لكيته محضر ملابس على الجرباية... هو دخل يسبح بين ما بدلت... صعدت اسينا الريوك... تعاي تريكي... _ماكدر...معدتي توجعني...ونفسي تلعب _ميخالف...هاي ضغطج هابط ويصير لعبان نفس اجى اخذ بيدي للميز... جبرني اكل... _بعد.ابد لا تاكلين يالكلية... زين تقيئتي ..جان تسمم جسمج صفنت عليه ...وفكرت صار اشهر اكل بالكلية ماتسممت... شعجب هالمرة...واذكرت الدكتور سالني شاربة شي... كتله لا بس حليب... كال يعني ماماخذة حب او اي شي منتهي المدة مالته.... كتله ابد.... خطرت ابالي فكرة...بس راسا بعدته واتعوذت من الشيطان _وين صافنة... _ماكو شي بس احس تعبانة -اني نعسان خلي انام فد ساعة حتة اروح للشغل _يا...نسيت عنندي امتحان جان _ميخالف...عود اوديلج تقرير المستشفى وية لارا ويسوولج اجازة... رحت اغسل من رجعت لكيته متمدد بالفراش صعدت من جهتي... سحبني باتجاهه وخلى راسي على صدره وحاوط خصري بيده... _تعبت انتة خاف ماترتاح هيج _لا مرتاح ظلت ايدي تتلمس الشعرات الاسود الي بصدره... وبعده ما حسينا الا صوت الموبايل مالته يدك كعدنا اثنينة مفزوعين... رفع الموبايل....جاوب...من سده _هاي امج جاية جوة... باوع للساعة هاي شنو صار ٣ ساعات نايمين.. كام راح اخليها تصعد فوك...مابيج حيل تنزلين بين ما نزل بدلت... طلع مهند مخابر هشام ليش ماجاي للشغل وكايله بنفس الوقت دك مهند... _ها حبيبتي شلون صرتي _الحمد لله انتة شلونك _بخير وصلت امي وجان نفسي اشوفج سكت اعرف مايفوت سلم علية وكتله اني امرلكم... صعدت امي ومابقت هواي وبقى هشام حتة يوصلها... وطلع موصي اسينة اتصعدلي غدة... رجعته صراحة خفت .... واكلت فاكهة ورجعت نمت.... كعدت على قبلات على طول رقبتي... تبسمت واني اميز عطره... رفع راسه..شكد تنامين... _ماعرف عبالك انطوني منوم... تمدد يمي وخله ايده حول خصري.... وراسه على صدري... رفعت ايدي امسد شعره... _هشام _نعم ماسألت ...ردت اكوله تحبني بس بطلت اريد يكولها من نفسه... ضلينا ساكتين فترة ...بس صوت النفس نسمع _هاي الشعلة وراثة _اي جدي عنده جانت... _بس انتة عندك من اخوتك _يجوز تطلع عند ولدي _الولد ميخالف بس البنات لا مد يده يتلمس بطني... _شوكت صبا _مابقة شي ويخلص الثاني بداية زواجنا وخلال الاسبوع الي كضيناه بالشمال...مرة طلعنا للشلالات... وبعد ما لعبنا بالمي وكعدنا على الثيل طلبت منه نأجل الاطفال لحد ماخلص صف الثاني حتة لحدما اولد يكون الثالث خلص... تبقى سنة وحدة ...سهلة... بالبداية ضاج...بعدين اقتنع... _صبا ....سكت...وبعدين كمل...تحبيني تفاجأت بسؤاله...هو هم عنده شك بمشاعري _تعرف هشام ...اول مرة شفتك جان من اجيتوا اخذتوني من المدرسة... من يومهة وانتة ماعفت بالي... يجوز بوقتها مافسرت نوع مشاعري... بس بعدين يلا عرفت رفع راسه وصار وجه مقابل وجهي _شنو عرفتي مديت ايدي اتبع تفاصيل وجه...ارسم عيونه... وخشمه وشفايفه...رجعت اتلمس لحيته الخفيفة _عرفت اني احبك.. جان مغمض عيونه وايدي تمشي على وجه.. من كلت الكلمة ...فتح عينه بقوة ... يباوعلي وبعينه الف نظرة... حنى راسه وشفايفه تطبع احلى قبلة على شفايفي وايده تسحبني من خصري بأتجاهه... كأنما يريدني اصير قطعة من جسمه... الصبح من راد يطلع...وكفته طلعت هدية عيد ميلاده ولبستهياها باوع عليها...ماحجي بس باس كصتي وطلع بقيت لنهاية الاسبوع يلا داومت... واستغليت هاي الفرصة حتة اعوض دراستي واتحضر للامتحانات الي مأجلتها... امه نهدت خلال هذا الاسبوع... ولارا ملتهية بالتخرج والصور... ورجع هشام يتعشى وياي... بس اكو شي اختلف.... كام من ينام على رجلي يسولف ولو شي قليل.. يعني بدة يحجيلي على مواقف مرت بيه بالاعداية او من جان صغير... فتهمت من حجيه...بيبته هية مربيته هو واخوته لحد المتوسطة وبعده ماتت ... مرات يبقى يباوع تلفزيون واني اقرا... اشوفه يغفى ...ما اتحرك ابقى اتأمله وهو نايم على رجلي... خلصت امتحانات... ولارا هم...وامها قررت تسويلها حفلة تخرج ... صراحة جنت اتمنى ما احظر هالحفلة... بس شنو العذر الي اقدمه... ظليت حايرة...من اجى هشام.. جان حيل ضايج...حاولت افهم منه ماكال شي... بس الصبح قبل مايطلع للشغل... _هشام...شو تعبانة ومالي خلك... اريد اروح لاهلي تأخذني _هو بكل الاحوال على اساس اخذج الظهر.. خلي اروح اكمل كم شغلة وارجعلج... كيفت اجت من الله... بس رجعت كلت شعجب ما سأل ليش ماتحظرين الحفلة.. لا وهو يكول خلي اوديج... خاف امه هم سوتلي شغلة جديدة... من رجعلي جنت مخلصة وانتظره... نزلنا لكينا امه واخوته جوة يريدن يطلعن للصالون _هاي وين...سالت امه _رايحين لاهلهة _شنو...ليش وحفلة اختك _يعني هية قابل عرسها _وشدعوة على مرتك...الا اليوم اتشوف اهلها شنو نزلت الحنية بهالساعة _يمة...صاح بيها... سكت عبالك اذكر... التفت علية...اطلعي اركبي بالسيارة... طلعت واني نفسي اعرف شكال لها... طلع من البيت معصب... ماحاجيته...بس من وصلنا عرفت ليش يريد يوديني لاهلي.... وتستمر الحكاية....
Oops! This image does not follow our content guidelines. To continue publishing, please remove it or upload a different image.
_ماذا يدور في خاطرك... كلمني عنه... صف لي شعورك.. لماذا تختبئ خلف جدار من الصمت... لماذا تخبيء مشاعرك... هل تعتقد ان البوح بما يخالجك ضعف... ام تعتقد ان الحب يعيب صاحبه... كم ارغب ان اعرف بماذا تفكر... فلحظات اشعر انك رجل بلا مشاعر ولا يهاب شي... ولحظات تصبح كالطفل الصغير يبحث عن الحنان ... وانا امراة تواقة للحب... تواقة للحنان.... اريد ان اسمع منك كلمات الغزل... اريدك ان تسمعني كل مافي العالم من كلمات الحب... احتاج ان تضمني بين ذراعيك.... وتخبرني اني اسكن قلبك وروحك .... ارغب في ان اغفو على ذراعك.... وان تهمس لي باعذب كلمات الشوق... ولكن.... بدل ذلك تكتفي بان تضع راسك على احضاني لتغفوا بسلام... تارك وراك توقي يصطدم بلامبالاتك ...
