وناخد لبيت ليا بوحدي نبات فيه وهو يشوف فين يبات داكشي ديال نبات انا وياه تحت سقف واحد والله لاكانت ليه، وفاش بانو ليا ناس جلسو قلت نيت نجلسوا كاملين حتى يصبح الحال، ولكن ماعرفت شي عيالات منين تسلطو عليا جروني لواحد البيت دخلت لقيت عبد الرحمان فيه.
بداو رجليا كيقفقفو اناري اش هادشي؟ بداو كيطيحو ليا مشاهد ديال الافلام المصرية على ليلة الدخلة، بديت كنخنزر فيه، وانا نقوليه
انا : شوف هاذ الناموسية ديالي، وانتا شوف فين تنعس، وراني مخيفاش منك.
بدا كيضحك وتم جاي لجيهتي قالي
هو: بصح ماخيفاش؟ انا خلعتيني بعدا بشوفاتك وجلس كيضحك عليا. فاش قرب ليا قلت ليه
انا: ايلا قربتي ليا والله حتى نقتلك.
زاد كيضحك ثاني وقالي
هو: يالاه عطيني سروالك وماغنقربش ليك، وايلا مابغيتيش غادي ناخدو ليك صحة، يالاه ختاري.
خرجت عينيا فيه
انا : نتوما العروبية ماكتحشموش آش هاد الهدرة لي كتقوليا نتا ماشي بنادم، راه قلت ليك ماتقربش ليا يعني ماباغياكش وسير بعد مني ولا سير شوف آش دير.
تخلعت ملي شفتو جمع الضحكة، هضرتي والتفرعين ديالي موحال واشي يخرجوني سالمة هاد الليلة وملي شفت القضية حماضت بديت كنبكي ليه.
مشى تكّى فبلاصتو وعطاني بظهرو، قالي
هو : ديري اللي عجبك أنا ماكنتش باغي نحط عليك ايديا ولا نقرب ليك، غير الناس اللي على برا راه ماغادينش حتى نعطيوهم السروال.
جيت جلست حداه ودموع خربقو ليا المكياج وولا وجهي كيخلع، دار عندي وبقا مصدوم وبدا كيضحك ثاني
هو : واش بصح ماقالو ليك والو ولا كضحكي عليا؟ بقيت كنحلفليه بالله حتى مافراسي والو. ناض وقاليا
هو : مايمكنش زعما نتي ماعارفاش؟
عاودت ثاني كنحلف ليه، وكنشوف فيه وكنتسناه يهدر، وجهو ولا كيف الماطيشة وبدا كيتمتم فالهدرة، شاف فيا شوفة ديال شي وحدة ميؤوس منها ولا علاقة قالي
هو : هانتي غاناخدك على قد عقلك المبرهش
دابا المراة والراجل فاش كيتزوجو فليلة العرس اوووف ناري واش بصح ماعرفاش ؟
انا: نعيط على ماما ونسولها؟
جرني من ايديا قالي : واش حماقيتي الناس غايفهمونا غلط، قالي شوفي اراي ليا سروالك ونفكو هاذ الليلة ولغد ليه هدري حتى مع جداتك ، المهم هاد الليلة خاصنا نعطيوهم سروالك.
فاش سمعت هاد الهدرة ركبني العناد وقلت ليه حتا تقول ليا آش كاين. بقى مصدوم فيا مسكين وغير كيشوف، شرح ليا بزز الموقف
هو : الناس اللي هنا من العادات فليلة العرس، اهل لعريس كيتباهاو بالعروسة انها بنت وبسروالها لي كيكون فيه الدم،
انا تصدمت لاحقاش هادشي ماكنديروهش حنا، وماما ماقالتليش عليه.
عطيت ليه السروال، جبد زيزوار قلت ليه ناري آش غادي دير؟ قالي
هو : والو.
جرح صبعو ودار شوية الدم في السروال ورماه ليهم من الباب وسد الباب، وقال ليا سيري تنعسي، بقيت مصدومة من هاد الموقف، كانسمع الناس من ورا الباب كيطبلو وكيغنيو على سروال، ولايني التخلف هادا. يالاه بديت بغيت نبرزتو قاليا
هو : عافاك عيان وفيا النعاس تال غدا وهدري وخلا ليا ناموسية وهو نعس فالارض.
حسيت بحالا بقا فيا، وبلي انا كنتسرع بزاف وبنت تافهة قدامو، هو على الاقل جرح راسو على قبلي وانا كلمة مقادة مقدرت نقولها، مشيت نعست وقلت غدا نتسامح معاه على الهدرة لي قلت ليه. لغد ليه فقت مشعكة، شفت راسي فالمراية تخلعت، نضت نقلب عليه مالقيتوش فالبيت، هاديك فرصة نخبي شوهتي مشطت شعري ومسحت المكياج اللي رون ليا وجهي.
YOU ARE READING
لا أريد زوجا من العروبية
Romanceقصة منقولة قصة مغربية رائعة انا شخصيا عجباتني فيها #الحب و #اﻷخلاق العالية و من خلال هاد القصة غتشوفوا فرق بين ناس دالعروبية وناس دالمدينة. البطل هو من العروبية و البطلة من المدينة لكن رغم أنه من العروبية ستاطع يربي البطلة ديالنا تربية زوينة وعلم...
