حب_عاثر

حب عاثر 6

حب_عاثر 6

أنمار ...
مواليد بغداد 1987
الاصل من الفلوجه ..
اخ لثمان اخوات و2اخوه ..
بسنة 2004 جنت طالب اعداديه   راجع من المدرسه وجاي امشي واكطع باوراق اشجار البيوت مال الكراده حسيت اكو جماعه يمشون ورايه .. بعدها تقربوا اكثر اللتفتت ضربوني على راسي  وكعت وغمضت عيوني وفقدت الاحساس..
وعيت بمكان ريحته محلوه .ظليت احوس شفت نفسي مقيد. بعدها دخلوا 3اشخاص .. باوعتلهم والالم براسي لسه .. عرفتهم عمال بالمعمل مال والدي ظليت احاول افتح روحي واسب بيهم محد يستجيب الي .. بقيت ايام عدهم بعدهه باعوني على عصابه اكبر بقوني بلا اكل وبلا مي والتعذيب ..اشكال  بعد ماخلصوا من تعذيبي جنت بمكاني اهذي من الالم ..
شفتهم دخلوا اثنين بنات .. وسط صراخهم وتوسلاتهم جنت اني .. وگدامي صار ابشع منظر ممكن اشوفه ..
بدوا باغتصاب البنات وصريخهم ملأ اذني ..
احس روحي تريد تطلع .. وحده منهم سكتت توقعت ماتت من شدة الالم .. غمضت عيوني .. وتمنيت يخلص هذا العذاب .. بعد فتره أفرجوا عني مقابل فديه ..
عانيت هوايه مابعد الاختطاف .. التعذيب الجسدي والاغتصاب الي صار كدامي وصراخ البنات الي كنت عاجز من ان انقذهم مافارق خيالي .. صرت احس نفسي قاسي تعاملي تغير مع الناس اكلي قل ..
قرروا اهلي وبطلب من جدي  نرجع للفلوجه سكن عمامي وخوالي ..
بعد ما فقدنا الامان  .. تركنا بيتنا واملاكنه ببغداد ورجعنا للفلوجه ..
مرت عليه ايام كادت ان تفقدني نفسي لولا  وقوف العائله بجانبي وخاصة جدي وجدتي ..
انتشلني من الي اني بي .. ورجعت لحياتي لكن هواي تغيرت .. بعد ماانهيت دراستي الاعداديه بمعدل يأهلني لدخول كلية الهندسه ..
داومت في بغداد 4 سنوات ماسويت علاقه وي اي بنت ولاعجبتني اي وحده
وتخرجت وبعد تخرجي .. دخلت دورة ضباط وترقيات صارت صرت نقيب  ..
داومت بجامعة  تكريت ردت اترك الجيش وادير شركة والدي.. عجبتني طالبه شفتها مره بالكلية..ظليت ادور عليها واسئل
عرفت تدرس بكلية العلوم مرحله اولى ..
عجبني جمالها البريئ عيونها الملونه المشبعه بالخجل والحياء والخوف احيانا .ملامح وجها الناعمه ابد مو متكلفه .. دائما وجهه طبيعي لبسها محتشم
ومبينه مو من مناطقنا
سألت عنها هوايه .. گالوا حلاويه
ظليت اتردد على كلية العلوم في سبيل اشوفها
شفتها مره كاعده يم صديقاتها من رفعت راسها واجت عيوني بعيونها ..
ارتبكت وكانها تعرفني وكع قلمها من ايدها
عافت نظراتي المحتاره بتأملها ودنگت تاخذ القلم
وبعد مارفعت راسها .. عرفت خجلت من نظراتي .
هنا رف قلبي الهااا ..
ووگعني بشباك الحب لاول مره ..
قلبي عنيد مو لأي وحده ينبض
لكن سرقت نبضه هاالسنفوره الحلاويه
وصارت دگاته بس الهاا ..
بين الدوام بالجيش والجامعه ..
قليل اشوفهاا ..
مره جنت طالع بدوريه للجيش
وفتت من يم الجامعه .. شفتها واكفه بالشارع وجهه ينطي الوان مبينه متعرضه لموقف ..
امرت السايق ان يتوقف ..
وكف السياره ونزلت منها
وشفت واحد من الكليه ماعندي بي معرفه شخصية لكن شايفه بحكم احنه جامعه وحده ..
شفتهم يحجون ومبين عليهم يتعاركون
وهي صاير وجهه من الخوف اصفر ..
كتلهم شكو
كلي هي حبيبتي .. تمنيت اضربه بلحظتها واني اعرف ماعدها شي سائل عليهه كومه ..
بلحظه انهارت وظلت تبجي وتنكر علاقتها بي وتشكي منه 
دموعها حركت قلبي
وزلزلت كياني ..
رزلته بس مااشفى غليلي .. من راح
حاجيتها من غيرتي عليهاا
معجبني الوضع الي جانت بي
لان اعتبرها ملكي
هي بررت موقفها بقوه عجبتني اكثر ..
واني  واثق من نفسي راح انقذهه مره ثانيه
هيج جان احساسي بس وين وشوكت الله اعلم ..
مرت ايام انشغلت ماشفتها بسبب اللتزامي بالدوام وترددي على بيت اهلي بالفلوجه ..
داومت وجنت بالكليه .. باوعتلها من بعيد مخبوصه وتمشي بتعثر .  تقربت منها وتعمدت انصدم بيها حتى تنتبه عليه ..
كالت بخوف وتوتر اسفه ..
حبيت اتكبر عليها .. ومااساعدها ..
بس ضجت من نفسي من عفتها ورحت تمنيت ابقى يمها اكثر ..
مرت ايام وصرت اعتبر نفسي معتقل بشوقي الها ..
حاجيت اهلي عنها وردت ادخل من الباب مو من الشباك .. واني بطبعي ماحب اسوي علاقات ابد
عندي خوات ومااريد يصير بيهن نفس الشي ..
تعجبوا اهلي وانصدموا شون اختاريتها وهي غريبه ومن غير طائفه .. وعندي بنات عم وعمات وخوال وخالات خيير من الله واشكال والجمال طاغي عليهم رغم هذا كان قلبي ينبض بمكان اخر .. وهذا حكم القلب ومانكدر نعارض حكمه ..
كلمتي هي الماشيه ع الكل ومحد يگدر يرفضلي طلب جدي ووالدي دزوا زلم للحله يسألون عنها ..
رجعوا وكالوا كللش خوش ناس والبنيه خوش بنيه مستوره واخلاق ..
ردت ادز اهلي يخطبوها وحاجيت جدي بهذا الخصوص كال انت محاجيهه تعرف مشاعرها تجاهك خاف ندز اهلنه وهي ترفض اريدك اذا داومت تروح تحاجيها .. وتعرفها توافق او لا ..
وفعلا حاجيتها بس تحججت بأهلها ..
2/6
ومن خجلها نهزمت مني بسرعه ضحكت عليهاا
وبنفس الليله خابرني رائد صديقي
واني سبق وان سألته عنها وهو انطاني عنوان اهلهه بالحله ويعرف اني رايدها ..
خابرني گلي مريضه ومتخربطه ومحتاجه مستشفى
وحضر تجوال بسبب الاوضاع موتمام ..
لبست بسرعه وصعدت سيارتي ورحت للقسم
شفتها طلعت ممنتبهه تمشي كوه من الالم وسانداتهه صديقاتها.  تمنيت الوجع بيه مو بيهه .. قهرتني هالسنفوره الناعمه وين تتحمل الوجع .. صعدوها بالسياره .. واللتقت عيوني بعيونها الذبلانه من الالم .. حركت السياره ومشيت بسرعه مااريدها تتوجع اكثر ..