حب_عاثر

حب عاثر 8

#حب_عاثر
بارت 8
نورا ناصر

صار الضرب قوي حييل .. طليت من شبابيك الشقق شفت الدواعش بعيني
واحد لابس اسود باسود نزل العلم العراقي ورفع علمهم الاسود المكتوب عليه لااله الا الله محمد رسول الله .. لكن كل اعمالهم بريئ منها الله ورسوله ..
صار القسم مو امن لوجودنه بي .. طلعونه لبيت يم القسم رجال  كبير وعائلته
..  عدد البنات كان هوايه لدرجة بيت الرجال مكفانه 
بقينه يمهم .. مرعوبين وصوت القصف صم اذاني والكل يبجن .. يمكن راح اموت من الخوف قبل لااموت على ايدين داعش....
وقت النوم مالگينه مكان انام... نمنه حشكه
وبعض البنات نامن جوا ميز الطعام والبعض بالمطبخ.
. 
يوم ثاني كعدنه  حتى اكل مالكينه البنات ظلن ياخذن ورق عنب من الحديقه ويسوون دولمه شلون ماجان. .. لان ماتن جوع  .. اني لگمه ماخليت بحلگي جنت كلش خايفه .. وافكر خاف يعرفوني شيعيه وياخذوني ياذوني .. اهلي ماعندي اتصال بيهم .. شبكه ماكو .. وبقيت افكر بأمي وبحالهه هسه شون يمكن اسوء من حالتي ...
  ثاني يوم هدأ الضرب رجعنه للقسم
حصلت شبكه وخابرت  اهلي اني ابجي وهم يبجون واامي تدك وتلطم ومااعرف شون اهديهه واني اصلا ميته خوف ورجف ..
  اخر حل فكرت اخابر انمار دكيت وايدي ترجف
ما جاوب .. زاد قلقي وخوفي نوب خفت عليه خاف صار بي شي .وضع مينحزر . جربت ادك مره ثانيه ..
  دكيت  جاوب
كال الو..منو ؟؟
تنفست الصعداء ارتاحيت ولو شويه .. لان بخير وسمعت صوته .. جاوبته
  ... انمار اني مسره
... هلا حبيبة گلبي ليش هيج خليتي بالي ينشغل عليج  ماخابرتيني ولاعندي رقمج ولاكدرت اخابر رونق  واخذه منها خاف تسببلج مشكله. 
مسره ...  انمار خايفه اني شيعيه يكتلوني اذا لزموني (احجي وابجي )
...  يخسون اني يمج وتخافين.
.. لعد شون كلي راح اموت والله ..
... تدرين  اني بالمقر هسه احاول اطلع ينتهي واجبي واجيج اطلعج لاتخافين ...
...دير بالك على نفسك
... تخافين عليه مسره ..
... انمار اني راح اموت من الخوف ماادري اخاف عليك لو على امي متخربطه لو على نفسي خلص انتهيت والله.
... اسم الله عليج حبيبة گلبي جايج لاتخافين ..
... انتظرك فدوه .. لاتتأخر.
... وداعتج مااتأخر اشوف الوضع اذا اكدر اطلع   واجيج ..
.. ماشي انتظرك ..
سديته منه وبقيت انتظر جوابه اذا يكدر يجي .التليفون.
بيدي وعيوني مابقن بيهن دموع ابجيهن التليفون دك فزيت ورفعته ..
.. هاا انمار تجي ؟؟
...حبيبه ما كدرت  عدنه انذار والدنيه مخبوصه باجر الصبح اجيج ابقي حالج حال البنات ابتعدي من الشباك واذا لاسامح الله صار شي ضمي هويتج ولاتطلعينها لاحد  والي يسالج منين كولي من شمال الحله واذا سألوج عن عشيرتج كليلهم عشيرة **
وشيخ ***    وانا جايج الصبح اكيد ..
.. يعني شنو انمار .. راح يدخلون علينه للقسم
... يولي مسره ماكلت يدخلون اني كتلج لاسامح الله.. وكافي تبجين لخاطر الله دموعج حركت قلبي عبالك تيزاب وتصب عليه ..
... مااكدر ماابجي والله راح اموت ..
.. اشش لاتكولين اموت ليش تعذبيني مااتدرين شكد قلق عليج هسه اني كتلج جايج الصبح واقرب فرصه قبل الصبح انزل اذا كدرت وهسه لازم اسده ..
سداه ..  خوفي علي خوفي على امي لو من الي اني بي .. حتى الخوف احتار ويايه .. ربي اوگفلي بهاي الساعه .. احفظ انمار واحفظني لامي مااريد تنفجع بيه .. مابقت ايه مابقه امام ماندبته ...
  بقيت اصلي وادعي ..
ثاني يوم الصبح نزلت جوه انتظره يجي
الهدوء يخوف اشبه بالهدوء الي يسبق العاصف
والطلق تارس الشارع.
بقيت صافنه ع الطلق المطشر بالشارع .. شكم واحد انصاب بيها وشكم بريئ ليش احنه من دون البلدان مامرتاحيين ..
التليفون بيدي وبقيت رايحه راده .. خطواتي تعيد نفسهاا واني بباب القسم انتظره ... اهلي مابطلوا مخابره
احمد الله اكو شبكه واتواصل وياهم ..
اذا انقطعت يمكن امي تروح بيهااا ..
دك تليفوني بيدي .. اتصالات انمار كانت بصيص امل اليه .. ارتاح من يخابر ..
جاوبته بصوت مبحوح وعبره خانگتني گوه يطلع صوتي ..
... الو انمار ..
... جاايج والله ربع ساعه كافي تبجين يولي زرفتي گلبي ببجاج شجاج اني هين  يمج مو بعيد  اطمئني ...
... خليت ايدي على حلگي اريد اطلع الحجايه مااكدر. كتله ماشي وسديته ..
ربع ساعه ووصل .. اجاني لباب القسم .. لابس زي عسكري ونجماته يلالن ع كتفه عيونه مشبعه بالقلق  تريد تعانقني بنظراتها .. شكد جنت محتاجه احضنه بهاللحظه وافرغ خوفي على صدره .. واعانق الامان الي فقدته.
روحي عانقت روحه دون ان يمس جسدي جسده ..
حسيت بالامان ولو بعد كدامنا مشوار طويل لكن شوفته هي الامان بحد ذاته .. 
المشرفه ... وين تاخذهه عيني متطلع منا الا ويا ابو الخط ..
أنمار .. عيني اني خطيبها والي كل الحق اخذهه ويايه