Dragon's Blade [ Season-1] (Z+U)

S1-3

=========================

ဘတ်အွန်း အဆင်သင့်ဖြစ်ချိန်မှ ယောလ်၏ မိုးပြာရောင် တောင်ပံများ ဖြန့်လာပြီး အပေါ်ကို မြှောက်တက်လာသည်။ ထို့နောက်မှာပဲ အတောင်ပံတွေကို အောက်ကို ရိုက်ချလာပြီး ကောင်းကင်ပေါ်သို့ တစ်ဟုန်ထိုး ပြေးတက်သွားတော့သည်။

" အမေ့ !! "

ပျံတက်သွားပြီး ချက်ချင်း အောက်ကို ပြန်ထိုးဆင်းလာသည်ကြောင့် ဘတ်အွန်း ငြိမ်ငြိမ်ကလေး ထိုင်မနေရဲတော့ပေ။ ကိုင်ထားသော ဆူးချွန်တွေကို လွှတ်လိုက်ပြီး ထိုင်ရက်ဖြင့် နောက်ကို ဖြည်းဖြည်းချင်း ဆုတ်သွားသည်။ လေဟာနယ်ထဲ ခေါင်းထောင်၍ ခါးမတ်မတ် မထိုင်ရဲတာကြောင့် နဂါးကြီး၏ ပူနွေးနေသော အရေပြားပေါ်တွင် မျက်နှာအပ်၍ ဖက်တွယ်ထားမိကာ ငြိမ်ဝပ်နေမိသည်။

" ယောလ် .... "

" ဘာဖြစ်လို့လဲ ... "

ဘတ်အွန်း၏ အသံကြားမှ ယောလ် သတိဝင်လာသည်။ ပျံဝဲနေသော အရှိန်ကို သိသိသာသာလျော့ချ လိုက်ရင်း လေဟုန်စီး နေသကဲ့သို့ ရှိနေစေလိုက်သည်။

မကြာလိုက်ခင်မှာပဲ တောင်စွယ်တောင်တန်းနှင့် အနီးဆုံးတွင် ရှိနေသည့် ရွာလေးတစ်ရွာကို တွေ့လိုက်ရသည်။ သို့ရာတွင် ယောလ်အတွက် ဝေခွဲမရစရာ အကြောင်းများ ရှိလို့နေသည်။ သူ၏ ကြင်ဖက်လေးအား အစောကြီး ပြန်ပို့လိုက်ဖို့ မဖြစ်နိုင်ပေ။

သေချာသည်ကတော့ ဘတ်အွန်းနဲ့ အဝေးမှာ မနေချင်ပါ။

ဝမ်ယောလ် အခိုင်မာ ဆုံးဖြတ်ပြီးနောက် ရွာဘက်ကို ကျောခိုင်း၍ တောင်ပင်လယ်ဘက် ကို ပျံသန်းသွားတော့သည်။ သူ၏ ကျောပေါ်ကို မျက်နှာအပ်၍ ဖက်တွယ်နေသူကတော့ သိမည် မဟုတ်သေး။

ဖြူလွလွ သဲသောင်ပြင်သည် သူ၏ ပိုက်နက်ပေမို့ ထုံးစံအတိုင်း လူသူ ကင်းရှင်းလို့ နေသည်။ ကျွန်းနေ သတ္တဝါ အနည်းငယ်နှင့် လှပသော ကျွန်းငယ်လေးဖြစ်သည်။ ငယ်စဥ်ကတည်းက တစ်ဦးတည်း အချိန်ဖြုန်း ဆော့ကစားနေကျ နေရာဖြစ်၍ ဒီကျွန်းလေးကို ယောလ် နှစ်ခြိုက် သဘောကျသည်ထက် ပိုသည်။

စိမ်းသက်သော နေရာကို ရောက်လာသည်မို့ ဘတ်အွန်း အလန့်တကြားဖြစ်သွားသည်။