#حب_عاثر
بارت 35
نورا ناصر.
سديته منه نزلت اركض جوه
شفت بابا بالهول كتله بابا ليش طالب يسجل بيت باسمي حتى فشلت منه شنو تقيموني بفلوس ؟!!
بابا تفاجا كال شنو بيت شنو هالحجي منين جبتي؟ ؟
حجيتله كل شي ..
حسيت عصب كال انتن اغلى ماعندي وتعرفن اني كل وحده مخليلهه حصه للمستقبل بس مال انزل من قدرج لابنتي لو ع ركبتي ما اسويهه.
.. اسم عليك بابا حبيبي
امي ملخت نفسها وكالت حتى ابن امي يطعني ولكم شسوينه لان زواجناهه للغريب ومانطيناهه لاولادكم.
بابا .. اهدأي يامره ..
امي .. شراح تسوي
.. راح اخابر ع الشيخ ..
اخذ تليفونه وراح بقينه اني وامي نسولف بالموضوع
رجع بابا
كال الشيخ هم متفاجئ ويكول خالها كال الهم طلب اهلهه.
امي... صدك تحجي الله بلانا بشلون اقارب ..
بابا .. انتظري لاتحكمين خلي اتصل باخوج وافتهم منه؟ ...
رجع خابر ع خالي وهم نكر يكوله عمامهه كالولي.
ماما ماتحملت خابرت ع اخوهه وتعاركت كالتلهم والله اذا مارفعتوا اديكم عن بيتي الا اروح للمحكمه واطالب بورث ابوي وابيعلكم الاكو والماكو مبين خاف خالي وبقى يتعذر.
ماما كالت لبابا خابر ابو انمار واتعذر منه.
خابره بابا وفهمه السالفه.
من سده كال تدرين شيخنه يكول الي ويا جايبهم الطريق كله يحجون ويكولن عمرنه ماشايفين هيج مشيه وهيج اصول عدهم ونعم ما اختاريتو بس عرفت قصد اخوتي رادوا ينزلون من قيمتي ويفشلوني.
اني عفتهم يسولفون وركضت اخابر سمر اول ما اتصلت جاوبتني.
كتلهه خلصت ولبست الحلقه.
رأسا سمعت الهلاهل ومووحده كومه وامهه تهلهل وباركتلي.
كتلهه انمار مصمم هذا الاسبوع العرس ومالحك.
... مسره اذا ماسكتي اجي اموتج شبيج عريانه اخذي الضروريات وازوجي وهناك اشتري ليش فاهيه متسرعه بكولشي ومن توصلين للزواج تصيرين فاهيه انتي ضامنه ابن عمج شيسوي ولج انمار كسرله رجله وتريدي يسكت والله اني مامطمئنه لايهاب.
.. لج سمر لاتخوفيني بروحي خايفه.
..مدامج خايفه استعجلي.
سديته منهه الفرحه جبيره ماتنوصف.
بس ايهاب مخوفني سكوته يخوف
مر الاسبوع كلمحة البصر بين التجهيزات وصالون وهوسة البيت
خابر انمار كال سوي يوم واحد حنه وعرس لان ماكدر اجيب اهلي مرتين.
كتله انتو هم تسوون هناك هوسه.
.. نسوي غدا طبعا واستأذنه من عمي كال براحتكم شوف حياتك بس اني كلتلهم بدون حفله هنا
عود اخذكم لمسره وسون حفله.
.. انمار خاف اموت منا للعرس
..تسكتين لو اعرف اسكتج بطريقتي.
..خايفه من ايهاب هذا حقير ومااعرف شنو المضموملي.
.. ماريد تكولين اخاف واني يمج اطمئني حبيبتي.
جان كلامه يطمني طلعت اشتري غراض
رحت للبديري حجزت 3 بدلات ووحده هديه منه
اختاريت بدلة العرس اوف وايت نفش اردانهه كيبور قررت مااسوي تسريحه عاليه اريد شي بسيط بس بعده الخوف متملكني اخاف يصير شي وماتكمل الفرحه انمار اكثر مني انشغل ويركض 24 ساعه راد يجهز البيت وما كدر لان الوقت قليل.
كال نزوج بغرفتنه هي بعدهه مقفوله وملابسج وكامله اسبوع ونرجع علما يكمل البيت واذا متحبين عادي اخذج ثاني يوم لتركيا
فرحت كلت حته اتجنب المشاكل وخاف وحده تسمعني كلمه موحلوه اروح لتركيا.
بعدها اكتشفت جوزاي منتهية مدته
ولازم اقدم وقدمت على جواز ووقت ماعندي
انمار كال مومشكله من يطلع نروح موالا بايام العرس.
كتله حلوه بايام العرس غير شهر عسل
انمار .. اني وياج كل ايامنا عسل اهم شي احنا سوه
