القروية والوحش

🌸إضافه

#القروية_والوحش
اعزائي القراء 💕... من التعليقات والرسائل الوصلتني اتضح انو النهاية م كانت مرضية للبعض... وكان ف نوع من الخم وتجاوز للتفاصيل المهمه.... وفعلا انا في الساعات الاخيره كان هدفي انهائها عشان اتخلص من الضغط حق المتابعين والسهر والارهاق حق الكتابة...وصح م اتعمقت في التفاصيل.... وم اشبعت الفضول .... واكيد دا م يرضيني.... انا في النهاية عايزة روايتي تكون مميزة وم تتنسي وم عايزة زول زعلان وروحو محرقة 😂😂😂.
اقترح علي البعض اضافة جزء صغير اذكر فيه تفاصيل هم عايزنها... فاسمحوا لي اقدم ليكم السطور التالية التي عسى ولعل تكون سبب في سبر غور الابطال...وتكون مشبعه لفضول محبي التفاصيل 💜.
لينا عامر
___________________________________________
ظلت تراقب شروق الشمس بالقرب من زوجها الذي يحاوط كتفها بيده....داعبت الاشعة الذهبية الوليدة خديها وكذلك ذاكرتها.... التي عادت بها الى الماضي.... قبل 18 عاما.
لذلك اليوم الذي اكتشف فيه الجميع بمرضه الذي كان يدسه بشجاعه.... خوفا على مشاعر اسرته..... لا تزال تذكر تلك الدموع الحارة التي ذرفتها عندما اغمض عينيه بهدوء بعد ان قال لها( بحبك )
ظنتها النهاية... اخر لحظاته...ساعة الفراق 💔.... كيف لا وهي ترى قواه تنهار بهذه الطريقه.... اقتربت منه بخطوات بطيئة وهي تعيد نطق اسمه عدة مرات عسى ان يستيقظ.
استطاع الطبيب المشرف على حالته ان يقرأ الفكره السيئة التي احتلت عقلها.... فتدخل مطمئنا : م تخافي يا بتي
التفتت عليه وصوتها كان متغير من البكاء : هو مالو ؟
الطبيب بطريقة مبسطه عشان تفهم : الدواء البياخدو اصلا بيعمل كدا... بس م تخافي هو هسه كويس... بس خليه يرتاح
_ حيفتح عيونو تاني ؟
_ ان شاء الله.
طلعت بره وبطنها كانت مقلوبة من الحصل ف الساعات الاخيره.
قعدت ف المقعد وهي بتشيل ف انفاسها المضطربه.
عاينت لي امو.... م لاحظت ليها الا هسه .... استغربت لمن لقتها هادئة ومتماسكه م زي الباقيين... الكانو خايفين ومنزعجين.
جات قعدت جمبها وختت يدها ف كتفها وهي بتقول : الحمدلله الرد لي بصري وشفتك يا توتيل.
اتخللت ملامح الفرح وشها وابتسمت من بين دموعها : الف حمدلله على سلامتك.
_ الله يسلمك 💕.
_ يا خالتي كوثر
_ اي يا بتي
_ انا خايفة افقدو 💔
_ صدقيني... البكاء لا بيودي لا بيجيب.... انا ولدي استودعتو لي رب العباد وبس... الدعاء هو الشي الوحيد الحينفعو.
جاتهم جوري :يا جماعه القعدة هي م بتنفع بي شي.... شوية وحيجو يطلبو منكم تمشو... عشان كدا من الافضل تطلعو قبل م يجوكم.... وزول واحد بس الحيقعد معاه.
لجين : خالتو كوثر حتقعدي انتي صح ؟
_ اي
عاينت لي توتيل : ارح خلينا نمشي
_ م عايزة  اخليه
_ بكره حنجيه تاني ان شاء الله... هو لازم يرتاح
هزت راسها بمعني طيب وقامت.
لجين : توتيل شنو رايك تمشي معانا البيت الكبير ؟ عشان م تقعدي ف الشقه براك
_ م مشكله.
لجين كانو معاها اخواتها.... ركبو كلهم.... وكانو ساكتين لحدي م وصلو.
توتيل بخطوات سريعه طلعت فوق.... وهي بتقاوم في الاحساس حق الوحم المنتابها.
ماما عشه وقفت لجين وسألتها : اها اخوكي كويس ؟
_ والله يا ماما عشه م عارفة اقول ليك شنو.... بس انتي ادعي ليه
_ يعني هسه يا بتي مؤكد انو دا المرض الكعب ؟
_ اي... ياهو 💔
قعدت ف كنبتها وظهر الاحساس بالذنب ف تفاصيل وشها : هسه انا كان مشيت ليه بيقبل يشوفوني ؟ دايره اعافيه واعتذر ليه
_ م بنصحك تمشي ليه الايام دي
_ م حيرضا يشوفني صح ؟
_ اي.... انتي العملتيه م هين والله 💔.... ولا بتنسي بسهولة.... انتي عيشتيه على وهم انو امو ميته وهسه اكتشف انها حيه.... م حيغفر ليك بسهولة العملتيه 💔.
_ يا بتي عليكم الله افهموني... انا عملت كدا لمصلحتو
_ ماما عشه ما تحاولي تبرري... العملتيه دا جريمة وماف زول بيقدر يسامح فيها.... وماف اي مصلحه ف انك تحرمي زول من امو.... انتي عملتي كدا عشان شي واحد وكلنا عارفنو..... عشان شايفاها م من طبقتك... وعشان زولة بسيطه وعلى قدر حالها.... دي الحكاية وم فيها... مع انها م غلطت.... ولا اذنبت ف شي... كل غلطها انها وثقت ف بابا الله يرحمو وبس.... عن اذنك.
طلعت فوق لي توتيل.
الكانت واقفة قدام التسريحه وبتعطر ف طرف يدها بعطرو.... فركت اطراف يدها.... غمضت عيونها وهي بتستنشق في العطر 💕.
وكلنا عارفين تأثير العطور علينا....
خصوصا لمن يكون العطر مرتبط بي ذكرى حلوة مرت بيك ف يوم 💕.
سمعت صوت الباب بيدق مشت عليه وفتحتو.
لجين : انتي كويسة
_ الحمدلله
لجين وهي بتقعد : انا مرهقة شديد يا توتيل 💔.... حاسا قلبي دا شوية وحيقيف...  م قادرة اصدق
_ ومنو القادر يصدق 💔.
_ م اتوقعت انو ميكاااال.... ميكال اخوي والشايفاه بمكان بابا يحصل ليه كدا.... كيف قدر يكتم الموضوع دا الوقت كلو 💔.... يا حليلو ساكت بيه وممثل انو عايش طبيعي
_ والله العظيم كنت حاسا انو في شي.... من وزنو البدا ينزل ولونو البقا شاحب وارهاقو الدائم 💔.. لكن م اتوقعت
نهائيا يكون المرض دا.
_ ربنا يلطف عليه 💔.... احنا لي بيحصل لينا كدا 💔...السنه دي سيئة كل السوء.... اول شي موت جدو... وتاني موت لولو ومصيبة وجدان ونور.... وهسه ميكال 💔.
_ لا اعتراض على حكم الله.... بس الزول يقول الحمدلله على كل حال.
_ الحمدلله على كل حال 💔.
توتيل حست بي انها عايزة ترجع.... فقامت بسرعه ودخلت الاوضة....
لجين لحقتها لمن سمعت صوتها....
_ توتيل مالك بسم الله.
قعدت ف ارضية الحمام الرخامية وهي بتشيل ف انفاسها.
لجين : انتي كويسة ؟؟؟؟ م تقومي تمرضي انتي برضو 💔.
قامت من الارضية ومشت على المغسلة غسلت يدينها وطلعت بره ورقدت ف سريرها.
لجين : ياخي ردي علي؟ اوديك المستشفى ؟
_ لا لا م يحتاح.
_ خوفتيني
_ م تخافي علي ماف شي
_ كيف ماف شي وانتي بترجعي كدا؟
_ حوريك بي شي بس م عايزة زول هسه يعرف
_ خير ان شاء الله ؟
_ كل الخير
_ اها
_ انا حامل.
مرت قرابة الدقيقة ولجين بتعاين لي توتيل.... قبل م تقعد** جمبها ف السرير : انتي جاده ؟
_ اي
_ واي😭.... الحمدلله😭.... م عارفة اقول ليك شنو... لكن الخبر فرحني شديد والله.... لازم توري ميكال.
_ تفتكري حيفرح ؟
_ اكيد يا توتيل... كيف م يفرح... يعني ف زول حيوروه انو حيبقى ابو م بيفرح ؟
_ طيب
_ وان شاء الله الخبر يخليه يشد حيلو ويتغلب على المرض 💔
_ ان شاء الله
_ لازم تمشي تتابعي مع دكتور طيب ؟
_ سمح
_ حمشي اجيب ليك شي تاكليه
_لا لا م عايزة... م عندي نفس
_ لا دا م ليك انتي... للبيبي 🙂.
ابتسمت : طيب
اول م طلعت.... توتيل قامت على الدولاب حقو.... طلعت قميص من قمصان.... شمت ريحتو 💕....
حست بالامان وهي بتختو جمبها.... بعدها عيونها غمضت واستسلمت للنوم.
________________________________
ميكال اول م فتح عيونو لقا وائل قاعد جمبو 💕.
وائل : حمدلله على السلامه
_ الله يسلمك
_ قالو قلت عايزني ضروري
_ اي
_ اها
_ كدي اول شي انت شعرك دا حلقتو ولا انا بتخيل
_ يا صحبي انا م حلقتو انا كردتو عديل 😂😂😂😂.
_ لي ؟!
_ يعني شعر هنود هو لمن اخليه ؟ خلي الهواء يضرب الراس دا
ابتسم ليه 💕.
_ اها عايزني ف شنو قلت ؟
_ عايزك تساعدني اصلح اغلاطي
_ اي اغلاط بالزبط
_ اي زول ظلمتو ف يوم واستعليت عليه
_ زي ؟
_ اول شي محامي جدي الرفدتو من شغلو....عايزك ترجعو وضاعف المرتب بتاعو... ووصل ليه اعتذاري.
_ طيب وتاني
_ برضو الشاب الرفدتو عشان بس كان متوتر.... رجعو وضاعف ليه مرتبو.
_ كويس
_ نفسي اي زول اذيتو ولا اهنتو ف يوم اوصل ليه واعتذر.... لمن تكون شايف موتك بيقرب بتكون ف حاجات كتيره عايز تصلحها
_ انت اصلا حتصلحها بعدين قلنا الموت دا شنو ؟؟؟ م تجيب سيرتو
_ انت عارف يا وائل... انا حاسي انو الناس حتكون فرحانه لي.... ما اعتقد في زول بحبني اصلا خصوصا من ناس الشغل.
_ انت وريتهم الويل وسواد الليل... لكن دا كلو عشان شغلك يكون مميز.... وم للدرجة دي ياخ... انت م وحش عشان الناس تفرح ليك ف شي زي دا.
_ تصدق
_ اها
_ احساس الندم دا اسوأ احساس.... بالذات لمن تتذكر انو بعد الموت ماف اي شي حيديمك وسط الناس غير تعاملك الزمان معاهم
_ انت لي عندك اصرار على انك تجيب سيرة الموت ؟؟؟
_ الموت دا م الا بالمرض.... كدا كدا كلنا حنموت بس..... المرض خلاني افكر في قربو وفي افعالي.
وائل ف محاولة منو لي تغيير الموضوع :ميكال
_ ايوا
_ وريني حتسافر متين ؟ واي بلد ؟
_ الدكتور قال يا مصر او امريكا
_ وحتمشي وين ؟
_ الاقرب 😂
_ متين ؟
_ يعني احتمال الاسبوع الجاي دا.
_ ربنا يسهل
_امين
________________________________
صباح اليوم التالي :
سيف كان قاعد ف المكتب لمن تلفونو ضرب.... لقاها خالتو( ام وجدان )
رد عليها : الو
جاهو صوتها العالي الغضبان : حسبي الله ونعم الوكييييل فيك يا سيف.... جننت بتي.... وجدان جنت خلاص فقدت عقلها وحولوها للمصحة العقلية ان شاء الله تكون مبسوط.
رد عليها بنفس الاسلوب : حسبي الله ونعم الوكيل في بتك وفيك انتي الشايفاها م غلطت ومظلومه... بتك بي خباثتها بتي ماتت... سممت بتي وقتلتها.... ياخ قولي عفيت ليها روح ليان.... تفتكري ميكال حيعفي حق مرتو ؟ عارفة انو بتك لمت ليها شماسة عشان يفضحو مرت ميكال ؟ الزول قدر م يحاول يعطف عليها ويتذكر العملتو يقرف منها.... تستاهل الحاصل ليها وبجدارة كمان ولو سمحتي تاني م تتصلي بي.
قفل الخط ف وشها ورما التلفون..... طبعا بقا ماخد مكان ميكال ف الشغل..... وحسا بي كمية الجهد والمسؤولية الكان مستحملها وشايلها وهو كان بغير منو فيها.
_________________________
كوثر كانت مع جوري البتفهم فيها : م تخافي يا خالتو كوثر حالتو مستقره هسه
_ ويا بتي شعرو دا كلو وقع كدا لي ؟ ولونو اتغير
_ الدواء البياخدو يا خالتو م بفرق بين الخلايا المسرطنه والخلايا الما ضاره للجسم... فبيدمرها كلها.
_ والعلاج دا حيبقيه كويس ؟
_ ان شاء الله.... هسه هو مكمل للعلاج... بيسيطرو بيه على الورم لحدي م تتعمل ليه العملية.
_ الله يشفيك يا ولدي ويحفظك
_ اي يا خالتو عليك الله كتري ليه من الدعوات دي.... هسه الدكتور قال حيطلعو البيت....
_ ماف خطر عليه
_ لا لا ماف اي خطر ان شاء الله...
كوثر وجوري دخلو ليه ف الاوضة... لقوه قاعد ف الكنبه وبعاين للساعه.
جوري : اها نطلع بعد دا ؟
_ اي يلا.
_ طيب
طلعو وكان وائل منتظرهم تحت...
ركبو معاه ميكال وامو.... وجوري اتحركت على الجامعه.
كانو كلهم ساكتين....
وائل وصلهم ورجع.
ميكال اول م دخل نادا عليها : توتيل ؟
مشا على اوضتهم.... ولمن م لقاها شاف باقي الاوض.
ضرب لي لجين :
_ الو يا لجين
اول م سمعت صوتو وقفت وردت : ايوة يا ميكال
_ كيفك انتي كويسة ؟
_ والله يا ميكال بعد م سمعت صوتك الحممممدلله 💕
_ الحمدلله.... توتيل معاكم ؟
_ اي معانا... امبارح م حبيت اخليها ترجع الشقة براها.
_ طيب كويس.... هي صاحية ولا نايمه ؟
_ ناااايمه.
_ تمام انا حجي اسوقها
_ حيسوق ليك منو ؟
_ يسوق لي منو كيف يعني ؟
_ ميكال دا م ترهق نفسك كدا حيأثر عليك انت لازم ترتاح
_ م تخافي... انا عارف نفسي بعمل في شنو... والدكتور موريني اعمل شنو وم اعمل شنو.... فما تتكلمي كانو انا يديني مقطعه ولا مشلول.
_ اسفة 💔.... بس انا خايفة عليك والله.
_ متفهم.... وحقولها ليك تاني م تخافي علي.
_ طيب
قفل الخط وقبل على امو الواقفة وراه : انا حامشي اجيبها من البيت
_ امشي يا ولدي.... الله يحفظك ويسترك ويغطي عليك.
م اتردد في انو يمسك يدها ويبوسها باحترام💕 وبعدها طلع...
___________________
ماما عشه كانت قاعدة في الصالة التحت لمن جرس الباب ضرب.
صوت الرجلين ف الارض خلاها ترفع راسها وتعاين.... الفرحه اتملكتها لمن لقتت هو.... وقفت على حيلها لا اراديا... قالت ليه بي فرحه : انا كنت عارفة انك حترجع لي وعيك وترجع البيت 💕
ابتسامتها اتلاشت مره واحدة لمن قال ليها : انا م جيت عشانك ولا جيت عشان البيت.... جيت عشان اسوق مرتي وراجع.
اتجاوزها وطلع بخطوات سريعه في السلالم.
توتيل في اللحظات دي صحت من النوم.... عاينت على الكومودينه... لقت صينيه مغطيه.... كان جابتها ليها لجين امبارح لكن كانت نعسانه وم اكلت.
قبلت على الجهة التانيه.... كانت مدية ضهرها للباب.
مشت اصابعها الرقيقة في الفرش واتذكرت لمن كانت بتفتح عيونها وتشوفو قدامها.
سمعت صوت الباب بتفتح....
وشوية تاني حست بي زول بيقعد جمبها ف السرير.
افتكرتها لجين.... وطوالي قبلت....
فضلت تعاين ليه لثواني...
كانت حاسا انها بتحلم...
حكت عيونها وبقت بتعاين ليه باستغراب.... ضحك وهو بيقول ليها : حقيقة حقيقة م بتحلمي.
ما اداها فرصة عشان تتكلم : جهزي نفسك سريع عشان اسوقك الشقه...
مسح على راسها وقام.
توتيل فضلت لدقايق قاعدة ف سريرها.... بعد م استوعبت انو الحصل دا حقيقة وم حلم بقت بتتسائل.... اي قوة دي العندو الخلتو يجيها برجلينو وهو مبتسم ويطلب منها ترجع معاه وهي امبارح شافتو بيموت قدامها.
جهزت نفسها وطلعت ليه...
لقتو قاعد مع اخواتو....
قعدت معاهم شوية وبعدها هو استأذنهم وطلع معاها.
اول م ركبو العربية....سألتو : ميكال انت كويس ؟
_ الحمممممدلله بالف خير ونعمه.
_ الحمدلله.
بعدها السكوت بينهم سيطر لحدي م وصلو.
امو استقبلتهم ولقوها كمان بتطبخ 💕.
ميكال دخل اوضتو.... وهي لحقتو.
لقتو قاعد ف الكنبه حست بيه عايز يقول ليها شي.... وفعلا م اخد وقت لحدي م طلب منها تقعد عشان عايزها ف موضوع.
التوتر سيطر عليها وقعدت جمبو.
شال انفاسو وهو بيخت يدينو ف راسو : توتيل
_ نعم
_ فاضل لينا اقل من شهر.... وبعدها حننفصل.... ومن المفترض يتم الشهر عشان تبقى سنه وبعدها انا استلم ادارة الشركة... دا طبعا حسب تفكيري الزمان... لكن انا التجربة الماري بيها حاليا خلتني اعيد التفكير في حاجات كتيره.... ومنها وظيفتي دي.... ف انا حتنازل لي سيف بي مكاني.... والاسبوع الجاي حسافر عشان اتعالج.... وخلاص كفاية عذبتك معاي.
_ اها ؟
_ قبل م اطلقك عايز اقول ليك شكرا.
_ دقيقةة.... انت.... انت مش قلت بتحبني ؟
عاين ليها بدهشة : انا ؟
_ اي
ابتسم : اكيد م كنت ف وعيي
قالت ليه : اهاااا
وحاولت تمسك دموعها.
عاين ليها لمسافة طويلة : تحبي نبدأ بي اجراءات الطلاق متين ؟ والقروش حقتك ختيتها ليك ف البنك.
_ الوقت البريحك انت.... وبخصوص القروش دي انا م عايزاها.
_ لا يا توتيل دا حقك
_ نفسي م حتسمح لي اشيل قروش كدا.... وم تحاول تعصر علي عشان برضو م حشيلها 😊
_ لكن انا م حرتاح الا لمن تشيليها
_ مش ف اتفاقنا كنت حشيلها لمن الفتره تتم سنه ؟؟؟ الاتفاق م تم... وانا م حشيلها
_ يعني انتي عايزه تتمي السنه ؟
_ لا.... م عايزة.... وبرضو م عايزة القروش.... عن اذنك
_ توتيل انتظري
في اللحظات دي قفلت الباب وراها.
عصرت على عمود انفها.... الالم احتلاها لمن حست بيه عايز يتخلص منها بسرعه.
مشت بخطوات بطيئة وقعدت في الصالة....
ذرفت دموعها بصمت.... وبعدها رقدت ف الكنبه وهي منطوية على نفسها ونامت.
خصوصا انها بقت ف الفتره دي م بتقدر تقاوم النعاس المسيطر عليها.
صحت بي صوت خالتو كوثر : يا بتي... قومي نومي ف اوضتك م ترقدي ف الكنبه كدا بتتعسمي.
_ طيب.
قامت ودخلت جوه..... الكنبه الفي اوضتهم كانت واسعه فما ترددت انها ترقد فيها.
حست بالشفقة على نفسها وهي بتتنقل من مكان لمكان ف بيتو.... وهو عايز يطلقها بأسرع من السرعه 💔.
قامت من الكنبه ومشت على الدولاب.... احسن ليها تستف هدومها وحاجاتها من هسه.
لمن هو جا داخل لقاها قفلت شنطه صغيرة وختتها ف الكنبه.
سألها باستغراب : دا شنو ؟
_ قلت احسن لي الم حاجاتي.
عاين للشنطه الصغيره والدولاب اللسا مليان هدوم : وخلصتي ؟
_ اي
_ وبالنسبة لهدومك دي
_الجيت بيه حرجع بيه 😊
قعد وهو بعاين باستغراب : يعني م حتشيلي اي شي جبتو ليك انا ؟
_ وريتك من زمان انو اليوم الحجي راجعه فيه حرجع ليك اي شي جبتو لي 😊.
_ معقول ؟ وانا الافتكرت انو الناس علاقتها اتصلحت ؟
_ اي اتصلحت 💜.... لكن انا قدر كلامي.
مدت يدها للسلسلة الفي عنقها وكانت عايزة تطلعها.
_ حتى دي ؟؟؟؟
_ اي
ظهرت ملامح عدم الرضا ف وشو وهو بيقعد ف السرير.
طلع الطاقية الصوفية الكان لابسها.... وظهر راسو الاصلع : انتي متقبلاني كدا ؟
_ كيف يعني ؟
_ بمرضي
_ والمرض عيب ولا كيف ؟
ابتسم ابتسامه باهته : متذكر اول م اتزوجتك قلتي لي جمله وقتها م اشتغلت بيها كتير.... لكن بعد م ظهر لي المرض اول شي اتذكرتها هي قلتي لي انت مغرور بنفسك وقوتك.... وزي م بتستقوى على الاضعف منك حيجي يوم الاقوى منك ويعمل فيك افظع من البتعمل فيه دا.
اسرها بنظراتو بطريقة خلتها تسكت.
تابع كلامو : فعشان كدا انا مؤمن وصابر على ابتلاء ربنا لانو دا الجا عشان ينتقم من حق الناس فيني.... وانا لمن اتذكر الحاجات الكنت بعملها بحس انو دا شي بسيط شديد علي 💔.... انا زول قوي.... م بقول كدا لزوم غرور او حركاتي ديك.... لكن انا عارف نفسي.... قوي جدا.... استحملت حاجات من طفولتي لحدي شبابي م عارف كيف اصلا استحملتها بس الحمدلله كانت سبب في انو ضهري يقوى.... حاجات حكيتها ليك.... وحاجات م حقدر احكيها.... كنت ولا زلت وحكون قوي الا قدام شي واحد بس 💔....
_ امك ؟
_ انتي
التقو حواجبها الطويلة باستغراب.
بلل شفايفو بتوتر وزح عيونو منها : م بقدر اقاومك.... فجأة لقيتك ف حياتي وم قادر ابعدك عني.... عملت اي شي عشان اتجاوزك بس لقيت نفسي بتعلق بيك اكتر.... لمن يكون عمرك كم و تلاتين سنه وعارف نفسك كويس وتفكيرك وفجأة ف شهور تلقى زول غير تفكيرك وفهمك.... خلاك تكتشف انك م كنت فاهم نفسك نهائيا.... واثبت ليك العكس.... من شفتك راكبه ف الشجره وانا م عارف نفسي مالي.... ولمن فجأة لقيتك داخله علي ف مكتبي م صدقت انك جيتيني برجولك... افتكرت نفسي انو بعد م اسيطر عليك واعمل فيك العايزو كل تفكيري الطويل فيك حينتهي لكن للمره التانيه يحصل العكس 💔... اتعودت من طفولتي اني اكون كتوم ف كل شي خصوصا مشاعري.... وم اعتقد اساسا عندي مشاعر لكن..... لكن انتي جطتي لي اي شي والله... جطتيني ورتبتيني تاني.... م حنسى انك انتي الخليتيني اصلي.... صوتك الهادئ البتقوميني بيه لي صلاة الصبح بقا لي زي المنبه جوا عقلي لي كل صلاة.... وانتي السبب بعد الله في اني القى امي الكنت مفتكرها ميته.... وجسمي بكش لمن اتذكر انو لو م كنتي انتي اتوصلتي ليها... كيف كنت حعيش باقي حياتي على اساس انها ميته وهي قاعده وحيه 💔.
انا كيف اقدر اجازيك عن الحاجات دي كلها ؟! انتي انسانه عجيبه.... كمية الاخلاق والمبادئ الصادقة الفيك م لقيتها ف زول.... وانا م عارف بي كل السوء الفيني دا كيف ربنا رزقني بيك؟ احتمال دي دعوات امي البتقول ربنا يرزقني بنت الحلال.... عارفة؟ ربنا خلق توتيل الجبل ف كسلا..... وخلق توتيل القروية جوووووه قلبي.... لمن قلت ليك بحبك م كنت ف وعيي لكن قلتها بصدق 💔..... انا الليلة حناقض نفسي واثبت لنفسي العكس للمره التالته.... كنت بقول اني م بأمن بالحب... لكن.... اناا بحبك وامنت بالحب فيك.
زمت خشمها بطريقة خلت غمازاتها تظهر وقالت بتوتر : طيب لي عايز تطلقني
_ م عايزك تتعبي معاي ف المرحله دي من حياتي... وم عايزك تشوفيني بالضعف دا... لكن كنت خاتي ف بالي انو ربنا لو شفاني حجي اتقدم ليك تاني.
_ بتحبني ؟
هز راسو كانو طفل.
_ انا برضو.... بحبك شديد وسبحان الله الحببني فيك بعد م كنت بكرهك.
مسكت يدو ووقفت على حيلها : وبعدين انا حدعمك وحساندك لحدي م تغلب المرض وتبقى كويس لو م كنت معاك وقت الشده شن فايدتي وقت الرخاء ؟
وحيكون في زول تاني برضو معانا.
ختت ليهو يدو في بطنها.
م اخد وقت طويل عشان يفهم.....
م صدقت لمن شافت الدموع في عيونو....
م قدر يتكلم.... وعيونو اخدت لون احمر....غطاها بيدينو واخد وقت طويل.... قبل م يفتح ليها يدينو ويحتويها بعناق طويل 💜🔥...
_________________________
بعد مرور اسبوع :
لجين وتوتيل وخالتو كوثر و وائل سافرو مع ميكال القاهره عشان يكمل علاجو.
ميكال اصر على انو وائل يقعد وم يمشي لكن وائل كان عارف انو البنات براهم م حيقدرو يعملو شي ومحتاجين معاهم راجل.
فترة العلاج كانت طويلة نوعا ما بس كانو كلهم مأملين ف شفائوا.... كانت بتمر بيهم اوقات صعبه شديد وميكال بعد الجرعه حقتو بتعب شديد.... لحدي م تم الجرعات المحدده وبعدها قررو يعملو ليه العمليه.
لجين و وائل كانو متجرسين وخايفين شديد بعكس كوثر.... كانت بتمدهم بالقوة والامل بطريقة رهيبه..... توتيل كانت متابعه مع دكتور ف القاهره بحملها ولمن وراها انها حامل بتوائم فرحت شديد بس افتكرو الدكتور بكذب عليها ولا حاجه عشان بطنها م كانت كبيره ولجين كانت بتتمسخر عليها وتقول ليها شكلك حامل بي فيران 😂.
الفتره الاخيره ميكال شكلو اتغير بطريقة فظيعه من الكيماوي..... لحدي م خلاص جا وقت العمليه.
كانت ساعات عصيبة مرت عليهم....
وبعد العمليه حصلت ليه مضاعفات وافتكروها النهاية 💔..... لكن اتجاوز المرحله دي بقدرة ربنا ودعوات اهلو.
والحمدلله زفو ليه خبر انو اتخلص من الكانسر بنسبة شفاء 100/100 💜
قبل عمليتو بي يوم توتيل ولدت بعد ساعات طويلة......
بعد اسبوعين حتن شاف بناتو 💕
وكانت لحظات مؤثره بالنسبة للكل لمن شافو دموعو النازلة وهو بعاين ليهم.... و وائل كان بقول ليه بي ضحكة حاول يخفف بيها عنو : اها عشان تشوف لي انا بكيت لمن ولدو لي ميكاال وكنت بتضحك علي وتقول لي اني بتجرس.
بعدها رجعوا كلهم السودان.
ميكال كان قاعد ف اوضتو وبمشي شفايفو في خد بتو الصغيره..... طبعا هي محرقة روحو عايز يعضيها لكن مسك نفسو 😂🔥.
توتيل كانت مبتسمه وبتعاين ليه.
رفع راسو وعاين ليه : اكيد مريتي بلحظات مؤلمه في ولادتهم
_ شديد
_ خلاص نكتفي بيهم ف حياتنا 💜... انا م عايزك تتعبي تاني.
ضحكت : لا لا م حكتفي بي ديل تاني.... لازم اجيب ولد تاني عشان يطلع بيشبهك ويشيل لي اسمك 😌💜.
ابتسم وهو بيغمز ليها : طيب م خسرانين شي.
امو دقت الباب..... فتح ليها... طلبت منو 10 دقايق.
_ يا ولدي
_ نعم
_ انا مسامحه حبوبتك.... ومن زمان... من زمن شالوك مني.... حتى ابوك سامحتو.... انت محاربها ومقاطعها كل الفتره دي ؟ معقول ؟
_ اقول ليك شنو ؟ غشت علي وقطعت قلبي فيك وبعد م بقيت راجل حتن عرفت انك حيه وكلو بسببها
_ اي غلطت... لكن م تنسى ليها جميلها.... هي ربتك من طفل لحدي م كبرت.... وميكال ولدي الاسمو مذكور ف القرآن م عايزاه يكون جافي.... حرام عليك قطعت قلبها كل يوم بتسأل منك وخايفاك تحرجها.... الدنيا م معروفة يا ولدي قول بعد ساعه جابو ليك خبرها... حتعمل شنو ؟؟؟ الندم وقتها م حينفعك وحتعيش بالذنب لي اخر يوم ليك... عشان كدا انعل الشيطان واعفي وسامح الدنيا دي زااايلة وماف شي يستحق.... هسه هي جات بره.... امرق عليك الله وخلص الموضوع دا وراضيها....
وقف شوية قبل م يطلع ليها بره.
لقاها قاعده وظاهر الندم ف وشها.
اول م شافتو وقفت على حيلها وكانت عايزة تبوس يدو.... لكن جرا يدو وهو بقول ليها : لا
_ سامحني يا ميكال.... سامحني يا ولدي.... والله غلطت وغلطه كبيره وشنيعه لكن م تتخلى عني كدي... يا ولدي شوف المده الما اتكلمت معاي فيها دي طويلة كيف ؟ حرام عليك م تحرمني منك في نهاية عمري 💔..
قعدها ف الكنبه وقعد تحت ومسك يدها : مسامحك.... وانتي كمان سامحيني على مقاطعتي ليك 💔.
_ م بتتلام يا ولدي.... م بتتلام على مقاطعتك لي لاني استاهل العملتو م هين.
____________________________
ومرت 3 سنوات وميكال شكلو رجع زي م كان 💜
وربنا رزقهم بطفلهم التالت وائل 💕
يوم سمايتو ميكال كان قاشر بلبس الشرق 🔥🔥🔥🔥🔥.
شالو شوية وبعدها رجعو لي توتيل ورجع شال توماتو.
وبعد خمسه سنوات جا طفلهم الاخير وسيم.
_________________________________
وكالعادة السنين بتجري والاطفال بيكبرو.... هانيه ودانيه طبعا شالو جمال امهم.... لكن هانية كانت نفس شخصية ابوها بعكس دانيه الكانت رزينه وهادئة زي امها.... وطبعا دا كان جاذب ميكال ولد وائل العمرو بقا 20 سنه.... والتومات 18 سنه..... هانيه كانت بتشغلها لي اختها البتزعل  لانها م بتحب الحركات دي 😂.
ميكال التجربة المره بيها سواء مرض او زواجو من توتيل او انو بقا اب حولتو 180 درجه.... واتخلص من كل عاداتو السيئة حرفيا واستبدلها بي اخلاق حميده 💕.
وطبعا توتيل.... عملت دراسات عليا ف مجالها وبقيت بتجيد الصينيه والايطالية والانجليزية 💕.... وحب ميكال واحترامو ليها كان بزيد كل مره 💕.
_________________________________________
رجعت لي واقعها بصوت اولادها المتحمس العالي.
عاينت ليهم بطريقة خلتهم يسكتو كلهم ويقيفو بأدب 😂🔥.
عاينت لي ميكال البعاين ليها بنظرات حب.... واشعة الشمس الاتسللت لعيونو ادتها لون عسلي فاتح جذاب 💕🔥🔥🔥.
رجعو يتابعو باقي الشروق بهدوء 💕.
وتاااااني شنو ؟
اي تمكنت القروية من ترويض الوحش 💜
نهاية النهاية 💕

كل عام وانت بخير 💜
وطلب صغير كدا : ادعو لي اخو صحبتي( حسن طحنيه ) بالرحمه وربنا يصبر اهله على فراقه.