جبروت الشيخ وقلبي

البارت الثاني والعشرون

البارت الثاني والعشرون
مساؤؤ حبيباتي ..طبعا ما حاجه احجي عن عدم النشر البارحه لان سبق وعتذرت وكلت ماراح انشر والي مايدري مو ذنبي اني ..
بس اليوم راح اضوجكم بشغله ان ماراح اكدر انشر بشكل يوميا ..راح ابدي انزل بين يوم ويوم
وسبب عندي ظروف والله بنات بوكت ماعندي شي انشر عادي ..بس حاليا
عندي احد الاهل وضعه الصحي مو تمام واني اهتم بي وهل شي ماينطيني وكت كافي اكعد على الموبايل والنت لذلك اعتذر عن هل شي وفدوة لاتجي وحده تكتبلي تعليقات تهجميه لعبتي نفسنه ومدري شنو حياتي مااكتبه الج ..كاتبه للناس الي عدها ذوق والبنات الي كاعدين يتابعوا كلكم على راسي
واعتذر منكم مره ثانيه ماراح استمر على نفس منهجي مال نشر اليومي ..

المهم اعوفكم ويه البارت
متابعه طيبه حبايبي ❤ 🦋....
الكاتبه بنين الطائي .......
....................................

عفتهم وطلعت للبيت ..دخلت السيارة ودخلت ..لكيت الباب مال المطبخ مسدوده
فتحت بالمفتاح الوياي ..ودخلت جانت الساعه تقريبا
بالاخمسه ..
سمعت صوت التلفزيون بالصاله فتوجهت لهناك
جانن رقيه وغاليه ..مطفيات الضوه.وكاعدات يباوعن فلم رعب ..ولا يدرن باليجي وباليروح ..
عفتهن صافنت ومندمجات ..ورحت الغرفة امي
جانت كاعده بالكاع وحاطه غراض بصفها تصفت بيهن
اول ماشافتنه تفاجت
امي .. ياهلا بهل الوجهه ..شعجب جاي من وكت
شهاب دنكت بست راسها وكعدت يمها ..هلا بيج يالغاليه ..شنو اشتاقيتلكم مااشتقيتولي
امي .. والله ولو علينه يمه مانخليك تروح اصلا ..تبقى قريب منه وتحت عيني والله ابقى حاطه ايدي على كلبي من تروح لمن ترجع ..
شهاب .. هانت وداعتج ..خلي روح ابدل واسبح واجيج لان عركت ودمرت بهذني الملابس

سبحت وبدلت لبست تراك اسود ..ونزلت ..رحت للصاله كبل لكيت غاليه ورقيه بعدهم نفس كعدتهم ..
غاليه على تخم وكاعده حظن ومخليه مندر بحظنها ..ورقيه مقابيلها نفس الكاعده .. وياكلن شاميه ..وبالعالم ثاني ويكلك بسينماا
دخلت ..وفتحت الضوء
هن بسرعه التفتن علي ..عاد سلمت وحجيت .. بويه حتى الاضويه مطفياته ..
بس ردن السلام وحسيت غاليه مثل الخجلت مني
بس ماافتهمت ليش ..بالبدايه ..
حجيت .. رقيه كومي سويلي شي اكاله ..ماشبعت يم علي اكلهم جان مو هلكد ..
رقيه ..كوومي غاليه ..فدوة والله الفلم ينكص علي بعد مااشوفه وانتي ياكل من ايدج بدون مايعلق ..
خزرت رقيه على هل حجايه بس جانت تباوع جهه ثانيه على الفلم ..

حسيت بغاليه ماتريد تكوم ..واجيت ستوني اصيح برقيه
بس نهضت وحجت ..مااشي قايمه بدالج
كعدت اني وجنت اباوع عليها من كامت ..لبسه تراك ومخصر عليها ..لذلك خجلت من دخلت
بس حق الله ينكال تكول مفصل عليها .. طويله ونفس الوكت ناعمه مو خشنه ومخصره تكول عارضة ازياء والله لسه اتذكر ابو المحل من كلله انت قياس المنيكانه ..لعابه نقهرت بوقتها والا شويه ادفنه بمكانه .. بس لان تجرا وشال عينه على عرضي ..هو اني وبحياتي محاط عيني على وحده من عرضي ..دائما من احجي وياهن اول ابعد نظري عنهن ..
بس غاليه من صارت مرتي اعترف جنت اباوعلها بكل مره تصير كدامي ..