#اين أنت

البارت 6

#البارت السادس
#اين انت
#Rozaya
واكفين برا وموعد غده والناس بدت تجي اجاني ابن عمي حسن يركض عمار عمار براعم وكعت وماتتحرك ...

بسرعه رحت للمطبخ تلكتني مرت خالي حسن كالت.. ماتتحرك مثل الخشبه ذبينه عليهه مي ولافاد
دخلت للصاله وبيهه نسوان هواي ماباوعت منو الموجود بسرعه شلتهه وامي شمرت عليهه عبايه اخذناهه للمستشفى صادف يوم جمعه حتى دكاتره ماكو بس الممرضه كالت ....عدهه هبوط بالضغط انطوهه مهدء بقيت اني وامي كاعدين يمهه... هي نايمه واني صافن عليهه على ملامحهه .. وجهه اصفر ..رموشهه طوال.. شفايفهه بيض وبيهن تشققات اكو اثر بكصتهه مال حادث اهلهه نزلت عيني على جسمهه ايدهه بيهه كانيوله ومعصمهه بي اثر حرك اعتقد من سولفتلي على حارث الكلب...

رفعت راسي لكيت امي تباوعلي بسرعه بعدت نظري عنهه كالتلي ...
...عمار اعرف هاي نظراتك مو لان يتيمه وماعدهه احد هاي نظرات حب وهيام
...حب شنو يمه شبيج بس بالي مويمهه؟؟
... لاتجذب عليه اني امك ياعمار اعرفك من عيونك
... يمه ماله داعي هذا الحجي بنيه يتيمه ما اعتقد ماكو واحد ماينقهر عليهه..
...صحيح بس لاتحاول تخفي مشاعرك انت تحبهه وجاي تشوفهه تكبر كدامك وتتعذب ...ياوليدي لا تصير اناني والتعب الي تعبه خلي لوجه الله مو لان تحبهه وتفكر بيهه مستقبلآ
.... ما عرفت شجاوب امي بسرعه اترخصت منهه وطلعت للحديقه والافكار تجيبني منا وترجعني منا...

براعم........
حيل تأثرت بوفاه جدو دائما يحميني ومايقبل واحد يحجي عليه ... بعد ماعافني وطلع عمار بقيت ابجي بفراشي ...
صار الصبح وبدت الناس تجي هواي عدهم معارف انعادت وفاه ماما كدامي من اجيت لهذا البيت طفله ضفيرتي لخصري ودبدوبه ساعه اتذكر ماما وابجي وساعه التهي وي الجهال....

هسه ماتت بي روح الحياه شعري بعد ماطول لكتفي وضعيفه حيل رغم اكل بس ما اسمن احس كلبي يريد ينفجر من الالم ...
رحت للمطبخ وي خاله زهره لان هي ام البيت وكلشي باشرافهه انسانه موطبيعيه بالحنيه ومخافه الله
بده العزا وناس جايه رايحه اني اشتغل بالمطبخ جان الجو حار احضر بالمي وكلساع جاي اني ونرجس وبنات خالتي رجاء بس اني ابد ما احجي الي يسالني اجاوب..

اثناء الهوسه اجتي وحده تصير اخت مرت خالو سالم عدهه بس بنات ماعدهه ولد ... دخلت للمطبخ عود من اهل البيت وتساعدهم بوقت الغدا اني جنت كاعده بالكاع وضهري على الكاونتر ونرجس واكفه تغسل بالمواعين كالتلي... براعم عفيه جيبي زاهي خلص الي عندي هستوني كمت اريد اجيب جان تحجي اخت مرت سالم ام دعاء كالت... هي هاي براعم مدري شوك ؟؟الي بالمطبخ كامن يضحكن من رجعت شفت نظرتهه تخزر بيه خلت الناس تلتهي وجرتني من زندي كالتلي...

ولج فصعونه هالكبرج ولافه على رجال ضابط ..لاترفعين راسج ليفوك لاتنكسر ركبتج ...لوتموتين ماتصيرين مره لعمار بنت وداد ام الرجوله احطج هنا وادفنج سمعتي لولا؟؟
اني بدت الرجفه تتملكني هزيت راسي جرت اذني حيل ولوتهه بهاي الاثناء اجت اختهه مرت سالم وكملت وياهه اثنينهن يرزلن بيه ويسبن بامي ومرت سالم كالتلي ... مكيفه محد يحاجيج ويحاسبج تسرحين وتمرحين بالبيت مات الي جان يدافعلج اريد اشد حيلي وياج منا وهيج مبين جلدج يحكج اشتاقيتي للكتل.. عافني وراحن...