صغيرتي (باللهجة الجزائرية)

❤البارت30❤

· وقفت قدام المراية شافت مع روحها آخر مرة و تنهدت دورت هزت تيليفونها من فوق السرير شافت مع الساعة ال10 ، سكرت التيليفون و حطتوا فجيب الشورط من الخلف و مشات هابطة ، تعدات على سميرة لي كانت فالكوزينة
ريناس : مااماا راني خارجة
سميرة : وين ؟
ريناس : شيء هناا برك عندي بزاف مشفتش الحومة
هزتلها سميرة راسها بمعنى
سميرة : ااه ريناس خلي معاك مفتاح الدار راه فوق الطابلة
هزت المفتاح من وين قالتلها و مشات خارجة
اما فهد فكان متكي على الشجرة لي مقابلة دارهم يستنى فيها و كانت مجموعة تع شباب قاعدين قداموا يلعبوا فالدومينوا ، اول ما تفتح الباب و خرجت شاف معاها من فوق اللتحت و طلع حاجبوا
فهد : وش لابسة هذي ؟
كانت لابسة شورط قصيير يغطي لي لازم و تريكوا ربع متر كرشها بكل على برى و طالقة شعرها الاصفر طايح على كتافها
غمض عينيه بعصب وقت سمع كلام الشباب لي قداموا - سسسس شوف القطوسة هذي يخي منين خرجت - قنبلة يااا *** منين نزلت هذي ؟
دور ليهم فهد يشوف معاهم راح ياكلوها بعينيهم كبس على قبضتوا و مشا ليهم حكم اول واحد من كول تريكوه
فهد : درك نوريلك منين جاات اليوم نحييلك الرحمة نتااعك
طاح فيهم خبط و ضرب و رغم انوا واحد مقابل خمس شباب الا انوا قدر يدمدمهم في خمسة كان غشوا مسيطر عليه يضرب بكل قوتوا مزال مخلقش لي يحط عينوا عليها ، فاللحظة لي ريناس مشات تجري تحاول تجبد فيه و هو حيط شعر ما ترحكتلوا
ريناس : فهدد يزيي يااا مهبووول وش ديير
تلموا سكان الحي عليهم يفرقوا فيهم بسيف باه جبدوا فهد من عليهم و الشباب لي كانوا لتم هربوا منوا بحكم بنيتهم ضعيفة و متتقارنش قداموا هوا مع قوتوا و عضلاتوا
حكموه زوج رجال كبار فالعمر يهديو فيه و هو يصيح
فهد : سيبووني الكللااب نورييلهم كيفااه يحكيوو علييهااا
مشات ليه ريناس تهدي فيه و لي معلابالهاش وش صاار و علاه طاح فيهم خبط بعد ما خرجت تضحك و فرحانة رايحة لعندوا لقاتوا داخل فعركة مع شباب ميتجاوزش عمر الكبير فيهم ال 20
دور راسوا يخزر فيها عينيه ظلمة مشا حكمها من يدها يجبد فيها
فهد : امشيي بدلي عليااا لبسة ال**** هذي
حاولت تتملص من قبضتوا لي وجعتها اما هو زاد كبس عليهاا
ريناس : فهد راك توجع فياا
وصل قدام باب دارها
فهد : تحركي ولبسي حاجة محترمة .. " سكت شوي وهز صبعوا يهدد فيه " .. و الله يا ريناس و نزيد نلقاك بشورط و لا لابسة لبسة ال**** هذي راح يكون حسابك معايا غالي " قحرتلوا " ريناس : وشبييك نتااا مريض ؟ هذي لبستي و ديماا بيهاا
فهد : بكري هذيي من الييوم تتولهي وش تلبسي محوسة نباااصي على جااالتك ؟

صاح عليها خلاها تبلع ريقها و تجبد المفتاح من جيبها بيدين يرعشوا باه تحل الباب

فتحت الباب و دخلت تخض فروحها ناقص غير يتحكم فلبستها و يزيد يعيط عليها من الفوق
سميرة : ريناس رجعتي ؟
مشات طلعت لبيت بلا مترد عليها العصب ياكل فيها فتحت الخزانة و جبدت جين و معاه تريكوا لبستهم و رجعت هبطت فاتت على سميرة بلا متشوف معاها خرجت وقت هو كان واقف يهدي فروحوا اول ماشافها خرجت ومبدلة تنهد
فهد : كون من الاول هك مش احسن
ريناس : متحكيش معايا
مشات في وجهو و خلاتوا مبهم وساعوا عينيه يشوف فيهامبعدة هز صبعوا اشار لوجهوا
فهد : تحكي معايا هذي ؟
دار شاف خلفوا مكان كاين حتى واحد ،، حرك راسوا و مشا لاحقها
فهد : ايت.. " غمض عينيه مزال يغلط فإسمها " .. ريناس حبسي وين رايحة
ريناس : متحكيش معاايا متفهممش
فهد : زح وش درتلك ؟
مردتش عليه و دخلت عند اول حانوت قابلها
ريناس : اعطيني كعك تاع الفراز راني بلا فطور بسبة شي عباد
هزت عينيها قحرت لفهد لي دخل من خلفها و الراجل لي لتم مشا جابلها الكعك
هزت الكيس تع الكعك شافت معاه منبعد صاحت على الراجل لي جابوا
ريناس : قلتلك لي بلفراز علااش جاايبلي حب الملوك ( الكررز 😂 ) - عفوا غلافهم يشبه غلطت
ريناس : متغلطش .. قاطعها وقت حط يدوا على ذراعها قبل ما تبدا تتعارك مع الراجل لي لتم
فهد : رينااس متكبريش الموضوع خلاص قالك متولهش
ريناس : كيفاااه ميتولهش هذيك فيها صورة الفراز و هذي فيها صورة الكرز لازم يكون اعمى باه ميتولهش
فهد : وين يعرف هو معندوش عينين يشوفوا بالاشعة السينية كيفكم نتوما النساا
شافت مع فهد و رجعت شافت مع الراجل لي كان باهت فيهم
ريناس : صح لأنوا كون جيتوا صح تشوفوا كيفنا كان التواليت تاعكم انظف من تاعنا
قحرتلهم لزوج و مشات خارجة فالوقت لي جبد فهد دراهم من جيبوا عطاهم للراجل و هز الكعك
فهد : ههه ساامحنا مرتي تتوحم و تعرف الحال كيفاه هههه
خرج لاحقها مخلي الراجل لي لتم حاير فيهم - توبة استغفر اللهفهد : نقدر نفهم علاه مغشة؟
ريناس : كي تتعلم متهزش صوتك معايا نقولك علاه راني مغشة
قلب عينيه و زرب فخطواتوا حكمها من يدها دورها لعندوا
فهد : كون مش نتي لي خارجة باللبسة تع ال*** هذيك مكنتش نعيط مسمعتيهمش وش كانوا يهدروا محوسة نباصي في جرتك ؟
قحرتلوا و جات راح تعيط عليه لكن البنات لي كانوا مقابلينها خلاوها تسكت شافت معاهم كيفاه ذايبين في فهد و عينيهم خارجين قلوب فيه يشوف معاه راح ياكلوه بعينيهم
غمضت عينيها بعصب تتغزل تحكم فروحها بسيف باه متمشيش تنتفهم بالوحدة
رجعت فتحت عينيها و شافت معاه تبسمتلوا بحنانة و هزت يدها حطتها على خدوا تمرر فيها على لحيتوا
ريناس : خلاص يا روحي خليناا نمشيو
غلغلت صوابعها مع صوابعوا و قربت لعندوا لصقت فيه ، هزت عينيها للبنات تقحرلهم
فاللحظة لي هوا بقا مشوكي فيها كيفاه تغيرت
فهد : ريناس راكي مليحة ؟
هزت راسها طبعتلوا بوسة على خدوا
ريناس : جامي كنت مليحة كيما اليوم ههه
طلع حاجبوا و هي مكملة تمشي فيه ، تعداو على البنات لي كانوا راح يبكيو حاسدينها فيه
بعدوا شوي عليهم و دارت تشوف خلفها لقاتهم مكانش ضحكت بفرحة تقول عملت إنجاز ، فجأة شافت معاه و جبدت يدها منوا رجعت تقحرلوا
ريناس : بعد علياا علاه لاصق فياا ، ديجا شبيك لابس و حاط و مبرفن يخي رايح لعرس ؟ صاروا رجال يهتموا بالمظهر اكثر من النساا ااااه ياا دنيااا
مشات في وجهوا خلاتوا مبهم مخوا تبلوكا منها شيء من الجاست لي دارتوا وشيء من هدرتها ، صح دار برفان و عدل روحوا بصح عمل هذوا بكل باه يعجبها
فهد : يا ربي الصبر راح تهبلني عقااب عمري .. ريناااس ريناااس حبسي نحكي معاك
ريناس : ان مراسلكم لا يرد على المكالمة يرجى عدم المحاولة ابدا
وصلوا قدام بلاصة خالية شاف حواليه مكاين حتى واحد نفخ و جبدها من يدها دخلها جهة مبنى مهجور حشرها مع الحيط حاوطها بيديها
ريناس : بعد علياا وش قاعد الدير
فهد : هذا وش ينفع معاك نتي و درك تقدري تفهميني وشبيك تعملي هك ؟
هزت يديها حاولت دزوا و تبعد عليه لكن هو زاد لصق فيها لين جسموا تصدم بجسمها ، بلعت ريقها تشوف مع رقبتوا ريحتوا راح تجننها تعرف انوا نقطة ضعفها هي قربوا و حضنوا
هبط وجهوا لمستواها شافت مع بحر عينيه لي كل مرة تشوف معاهم تغرق فيهم تنهدت من اعماق قلبها
فهد : ريناس .. ؟
قلبت شفافها كيما الاولاد الصغار
ريناس : متزيدش تصيح عليا
تبسم من الجاست تعها و طبس طبع بوسة على خدها
فهد : ههه حاضر منزيدش نصيح على صغرونتي بصح كون مش نتي لي تخرجيني من عقلي منصيحش عليك " رجعت قلبت شفافها " ريناس : مدرت والوا

تنهد من جواجيها لي جاست تعها راح يهبلوه راح يهبل من حلاوتها كون يصيب يفتح صدروا ويخبيها فنص قلبوا وين واحد ميقدر يشوفها من غيروا ، رجع طبس طبع بوسة على رقبتها تحت ودنها خلاتها ترعش
فهد : يخي وش درتي فيا يا طفلة....................

متنساوش فوت+كومونت بليييييييييييز..........