زواج مصونات

الحلقة الثانية

الحلقة الثانية 

وفى شقه عبدالرحمن كان جالس بجوار ابنه مصطفى  وبيتحدثوا على ما حصل فى منزل العروسه

عبدالرحمن : اقول ايه بس على امك مش هتبطل تصرفاتها دى ابدا .. بقى تشوف انهارده واحده فى السوق وخبط لزق كده عاوزه تروح تخطبها وتحدد ميعاد لكل حاجه .. الوليه بينها اتجننت على كبر

مصطفى يغير الموضوع لضيق صدره فيقول بهدوء  : صحيح يا بابا انت كنت قبل المغرب فين رنيت عليك وما ردتش عليا

عبدالرحمن : روحت عند عمتك عليه  , اودى لها الموسم .. ها قولى امك  راحت فين دلوقتى

مصطفى وكان بيده كاسيت يقوم بتصليحه لوالده فيقول بنبره شارده : راحت للحاجه ام كريم

عبد الرحمن بزفره : لا بقى ده كتير اوى .. هى مش ناويه تبطل طريقتها دى .. هى نسيت انها كانت السبب فى طلاقك والا ايه !!!!

مصطفى بشرود : مكنتش السبب يا بابا ولا حاجه ، كله مقدر ومكتوب

عبد الرحمن يربت على ظهر ولده ويقول : ما قلتش حاجه ياابنى.. بس برده كانت السبب ، مش هيا اللى جوزتهالك وقالت يومها انها بنت حلال وهتعيش !!!

مصطفى شرد فيما حصل من عام ، كان راجع من شغله مرهق واول ما دخل المنزل ، هرولت  اليه والدته بقلق

سعاد: ايه يا حبيبى مالك .. وشك اصفر كده ليه

مصطفى بتعب : الحمدلله يا امى اطمنى انا بخير

سعاد وضعت يدها على جبينه : بخير ايه انت سخن نار

جر كرسى ويجلس عليه ويقول : ما تشغليش بالك ، انا دلوقتى هاخد اسبرينه مع كوبايه شاى بلمون وهبقى كويس

سعاد : اسبرينه ايه ,  انت هتقوم معايا دلوقتى هنروح لدكتوره صباح اللى على اول الشارع

مصطفى: لا لا ملوش داعى يا امى

سعاد : لا فيه داعى ، انا هروح البس العبايه ورجعالك

وبعد قليل نجدهم بالفعل فى عياده الدكتور ; قوليلى يا بنتى الكشف اللى جوه قدامه كتير