The Monster

٣٦|كشكح السح|

أصعب حاجه ممكن يمر بيها الإنسان في حياته هي الصدمة..
انك تبقا قاعد في مكانك مش عارف تتحرك ولا عارف تتأقلم..
يبقا الموضوع عادي معاك بس في نفس الوقت مش عادي..
انت مش فاهم إلى بيحصل.
انت في صدمه.

انا مكنتش مستوعبه...و فضلت مش مستوعبه انه خلاص..
هو مش موجود.

مش هيهزر معايا، مش هيضحك معايا ،مش هيزعقلي ،مش هيقولي يا ولاه، مش هيفضحني، يضربني، يشتمني..
مش هيقولي على بيت الفراخ!
هو. مش. موجود.

لازلت بحاول اقنع نفسي.. رغم أنه صعب.

حياتي مشيت ببطأ و بسرعه من بعده.
اليوم بيعدي براحه جدا، بس اكتشفت ان عدا شهر على موته..
كانت صدمه أكبر ليا.

لسه كل حاجه كأنها امبارح.
شكل جثته، دفنه، العزا، صحابي...
هه صحابي.. لما جم يعزوا، و الناس، حتى تايلور جت تقضية واجب..

و لازالت مقتنعه ان حياتي على سنجة عشرة لأن من وجهة نظرها هي انا ورثت لكن من وجهة نظري انا..

انا موت.

بلبوس اختفى، ممكن اقول انو موجود في مكانٍ ما في البيت بس فين تحديداً؟
مش مهتمه الحقيقه.

عملت كوباية النسكافيه و طلعت قعدت في البلكونه، على الكرسي بتاعه إلى كان بيقرأ عليه الجرنال كل يوم.

لما بصيت النهارده في النتيجة و عرفت ان عدا شهر ، كان المفروض اخد خطوه..
محتاجه أرتب أولوياتي الي مفيهاش القاعده في المكان دا اكتر من كدا.

لاحظت أن كل مكان بنخسر فيا، بنتجرح في، بنتألم في..وجودنا في مبيبقاش مرغوب..
و يمكن عشان نعرف ننسا، أو نتخطي بمعنى اصح..نسيب المكان.

اي نعم هنسيب نص بلاد العالم.
بس ايه المشكله؟ كده كده احنا هنسيبها كلها في يوم.

تاني أولوية اني هسيب الشغل..
نجحت في اه، بس مرتاحه في لا.
ف تظ.

متهيألي هشغل المزوعه بتاعت جدو تاني..
او هقعد في بيتنا استنى ربنا يفتكرني و الحقيقه..

دا حل مغري اكتر.

تالت اولويه اني...

بلبوس:"هتبطلي تدوري على زين." قال من ورايا.

بيري:"عفريت ذكي ما شاء الله."

بلبوس:"و انتي اغبى."

نط قعد على الكرسي الي قدامي.

بيري:"حساها إهانه بس مش مشكله، مجتش عليك."

بلبوس:"مينفعش تبطلي تدوري على زين!"

بيري:"و مينفعش اني افضل متذللاه لأهله و هو ولا هو هنا."

بلبوس:"ايش عرفك؟"

بيري:"كفايه انو مظهرش لما كنت محتاجاه، زي باقي الناس الي اعرفهم."

بلبوس:"غصب عنه!"