دار الأيتام

البارت 5

#الكاتبة_نبأ
#دار_الايتام
——————*
كعدت من الصبح
هاي الخبله اختي نايمه مكلوب
ضربتها راشدي بس مو قوي
طرااااخ
طفرت من مكانها وهيه تتمايل من النعاس
سجى: الله لا يطيك سامر ليش هيجججج
سامر: حتى تكعدين زين اعرفج للظهاري تنامين
سجى: هسه مو اليوم جمعه ليش تخرب حتى عطله حرام عليك عابت
سامر: تريدين هذيج غرفتج وروحي نامي اني ما عندي فندق خمس نجوم
سجى: طلعت لساني وعيبت عليه
سامر: شمرت بطل المي الي يمي جان فارغ عليها
سجى: ههههههههه شهل خبال من الصبح
سامر: هههه ديلا حطب اسبح لا تدوخيني
سجى: ضليت انظف بالغرفه من الزبايل مال البارحه
طلعت من الغرفه باوعت للساعه ب10 الصبح
نزلت البيت هدوء شنو هاي شعجب
رحت جبت صينيه وجفجير
وضليت اضرب بالجفجير ع الصينيه وأصيح كعدووووو
ما احس الا نعال وهوووب ع راسي
ثائر: لج بابا سجاوي صدوووك جذب اليوم جمعه الواحد ما يرتاح
عفاف: شعجب كاعده هيج من وكت
سجى: غير ابنجججج الخبللل كعدني ونزلت الكم
صيح من فوك...
..لج هذا من الخبل سجووو اكول من جان يشخر ونايم مكلوب جنه جبار ابو المولد
عزاااا خجلت ورحت للمطبخ رجعت الصينيه والجفجير
غسلت وجهي واجت ماما تحضر ريوك
بابا راح جاب كيمر عرب
سامر نزل ويعدل بياخه التيشيرت
اجه حط ايده ع كتفي
سامر: سجاوي اكولج شهد ما كعدت
سجى: ما اعرف ما رحت الها
سامر: لعد رايح اكعدها
صعدت اول بايه وصاحت علي امي
عفاف: شني يمه وين رايح
باوعت لأبوي يباوعلي صفح
سامر: اكعد شهد هسه اجي
صعدت دخلت
استغفرررر اللله درت وجهي وطلعت
جانت تبدل وكاعده
حسّيت نفسي صخنت
ضليت اروح وارجع بالممر انتظرها تخلص
دكيت الباب هل مره وفتت
سامر: صباح النور
شهد: صباح الخير عمو
سامر: اسف لان هيج دخلت بسرعه عبالي نايمه
شهد: عادي مصار شي بس المفروض تدك الباب
سامر: اسفين سمو الأميره شهد
ابتسمت ودنكت راسها
..يلا تنزلين حتى نأكل
شهد: يلا
بعدنه ببدايه الدرج نريد ننزل شفتها مدت راسها وتراجعت
سامر: شبيج!؟
شهد: عمو الجبير كاعد جوه خاف يكتلني
سامر: ضحكت على حجيها
شهد: والله ماكو شي يضحك كتلك اخااااف
دنكت راسي عليها
..ما طول سامر هنانه وبهذا طوله وشواربه والي توعد محدً يأذيج لا تخافين ما يسويلج شي لان اني موجود بس كوني محترمه اۆك وأول ما تنزلين تروحين تبوسين ايده وتصبحون عليه وتبتسمين بوجهه
شهد: اوك عمووو بس ننزل اني وياك
لزمت ايدي بقوه واني اباوع عليها شلون خايفه
ضلينه كل ما ننزل بايه احس بايدها ترجف بأيدي
خلصنه الدرج
همست...سوي مثل ما كتلج
ومن صدك صبحت عليهم وراحت باست ايد ابويه وهوه اشوف بعيونه نظرات استغراب سوت نفس الشي وي ماما
بس خلصت منهم رجعت لزمت ايدي بقوه
عفاف: يلا يمه تعالو اكلو
رحنه كعدنه على ميز الطعام بالمطبخ
صرت بصفها وبابا كاعد بالراس
ثائر: عمو انتي شسمج ؟
هاي صفنت بوجهه استغفر الله ندبت حظي
هزيت ايدها جاوبت بتردد
..ااااا اسمي شهد
ثائر: لويش خايفه
سامر: بعدها ما متعوده خاصتاً انت استقبلتها بالصياح وتخاف منك
ثائر: اناا اخوك هذا الحجي صدك عمو شهد
شهد بتردد: هاااا ي ي مو انت شواربك جنهم مكناسه
خربببتتتتت من الضحك عليها وابويه غص بالأكل وضل يضحك وكلنا ضحكنه
ثائر: ولكككك بويه هاي منين جايبها
شهد: جايبني من سوق بلي ييي غير من الملجئ
ابويه فطس من الضحك وأول مره اشوف ابويه هيج يضحك من زمان ما ضاحك
ما اسولف الكم ع سجى تضحك وتضرب على جتفي من الضحك وجهه صار احمر
ثائر: بربك بويه سامر هاي البنيه كارثه من اول لقاء الي بيها ضحكتني شراح تسوي بعدين
سامر: شمدريني اشو هيه انطلقت وياك
عفاف: خلوها تاخذ راحتها وتحس نفسها بأمان
ثائر: اكيد بأمان ان شاء الله
امي سوت كوب حليب لشهد وانطته الها
اباوع عليها صار فوك حلكها اثر
سامر: مسحي شواربج
سجى: اخخخخ يمه بطني هههههه لك شوووف طلعت جنها ابو شهاب
شهد: سجى لا تضحكين اوي عابتلج
سامر: قلدت صوتها واتنعوص سجى لا تضحكين اوووي عابتلج واعوج بحكلي
ثائر: كافي استلمتو البنيه حاصل فاصل شنو ما الكم رداد واحدكم يسد عين الشمس وأنتو عقلكم بكد الحمصه
سامر: افففففه عليك بويه اني هسه صار عقلي بكد الحمصه
ثائر: الي بكدك ما يتصرف تصارفات جهال ولا جنه هذاك الي فاتح ريشه بالشركة
سامر: طبعاًً بويه غير ذراعك اليمنه اني
ثائر: ربي يحفظك ابني ويستر عليك من عين بني ادم ... اني اليوم معزوم يم عمامك ما تجي وياي
سامر: لا مشكور بويه عندي شغل
خلصنه دك تلفوني
صحت سجى
سجى: كول شكو
سامر: راح يجي سيف والجماعه يشدون غرفه شهد واريدج تاخذيها حتى نسويها مفأجاه
سجى: تمااامم خوش فكره راح اخذها بغرفه ماما
ومن صدك وره شويه اجو شدو الغرفه وراحو
ضلت ببالي نظرات سيف المتقاطعه الي معقوله اكو شي غلط
همست لأمي...بقي شهد يمج بين ما اروح اشوف الغرفه
صعدت فوك الحولي دائري فصايره غرفه سامر بدايه الدرج وبدايه الطابق الثالث غرفتي وبصفها بالركن غرفه شهد
دخلت شهلللل جمال هنيالج شهد هاي لو غرفتي ما اطلع منها
جانت بناتيه وبالسكف نازله ثريه نجوم
وبيت جبير يصير الواحد يدخل بيه بركن الغرفه السجادات متناسقه ميز مرايا ومكتب وجربايه ومزهريات واللعابات خير من الله جان اكو بالحايط نشره ورديه وكلوبات ملونة لفت انتباهي صوره ع الميز الي بصف الجربايه جانت صوره سامر وشهد كلش حلوة شفت بالبالكون مرجوحه صغيره واني سارحه بالغرفه
حسّيت ايد ع كتفي
انداريت شفته سامر
سامر: شنو رايج اكو شي غلط تعديل اي شي
سجى: والله لازم اني اروح واسوي شي غلط بيها
سامر: يعني ما ناقص شي بربج
سجى: قابل أجذب عليك هيه غير تجنن هنيالها وربي
سامر: خوش لعد رايح اجيبها اني
نزلت شفتها كاعده وي ماما بالمطبخ
سامر: ماما روحي صعدي فوك
صعدت كدامنا
سامر: وانتي يبنيه ما صار عندج فضول
شهد: ييي طبعاً
سامر: لعد تعاي وياي عندي مفأجاه الج
غمضت عيونها بأيدي وصعدنه
سامر: مستعده
فتحت عيونها بكبرهن ضلت تتفحص بالغرفه وتمشي بطيء اندارت علي وحجت بلهفه
شهد: هاي كله الي
ابتسمت وهزيت راسي بمعنى اي اجت علي وحضنتني رفعت راسي حتى ما اتأثر مثل البارحه تشكرت مني وضلت تبجي
سامر: تشوفين الخير بيها شهدو
عفاف: تتهنين بيه يمه شهد بالعافيه عليج
نزلت امي تكمل الغده
سجى: بديت اغار
سامر: لا تبرطمين وجهج يطلع يضحك انجحي من الكليه وادللي
سجى: شنووو الفايده اذا هيج اشتريتي غرفه عرسي
سامر: ولججج طالعه عينج
سجى: اممممم كيفي ورفعت تك حاجب وطلعت لساني وابتسم
سامر: الخبله ام لسان
صار الليل وطلعت
*سجى*
اني سجاوي الخبله ام لسان ع كوله سامر
الوحيدة بالعائلة عيوني خضر وسمره بس مو حيل بحلاته يعني يجذب
رشيقة وقزمه والله عوضني بطول لساني ههههه
اليوم من جانو يشدون بالغرفه طلعت بالصدفه برا غرفه ماما
شفت سيف يباوعلي وكلساع يفر براسه ما حبيت احسسه يباوع علي
حتى من هذاك اليوم من وصل سامر يباوعلي معقوله معجب لالاااا استغفر الله شتحجين انتي
اني باليل متعودة كل يوم اكعد بغرفتي بالبالكون واسمع أغنيتي المفضله وهيه
صغيره جنت وانت صغيرون هاي الاغنية عشقي
اليوم بالبالكون اسمعها واباوع للنجوم تلالي والكمر هلال وبيدي كوب جاي اخضر
واني أتأمل بالسمه وسواد الليل ومندمجه وي الاغنية شفت شخص يباوعلي من جوه
من شافني اباوعله شرد
طفئت الاغنية ودخلت جوه
كتلني الفضول منو هذا
رحت على شهد لكيتها ترسم
تعجبت على رسمها كلش حلو ترسم شخصيات وبأقلام رصاص وطالع يجنن
سجى: منين متعلمه هل رسم الحلو
شهد: جان عدنه مدرس فنيه بالميتم وعلمني واني من صغري احب ارسم
سجى: حلو هيج موهبه عاشت ايدج رغم صغر سنج بس تعجبيني بكبر عقلج وتصرفاتج العفويه
شهد: تسلمين سجى من حلات روحج
سجى: شوفي حتى حجيج مال كبار
شهد: متعلمه من الفراشه مالتنه جنت احبها وهيه بصراويه وتعلمت لهجتها
سجى: يعني انتي اصلاً بغدادية ؟
شهد: ي نعم بغداديه انتقلو اهلي هنا قبل وفاتهم بشهر يعني ولادتي هنانه صارت
سجى: الله يرحمهم حبيبتي
ما ردت اقهرها وطلعت تلفوني شغلت معزوفه وحطيته بالديجي
وصرت اسوي حركات وتباوع علي
سجى: لجججج يلا كومي
ضلينه نركص ونكمز ونتعارك بالمخدات
دخلت علينه امي جريتها من أيديها وركصتها ويانه
عفاف: لجججج يمه طفيه تخبلتي
سجى: ما اسمعج ما اسمعج
ومستمره بالركص انتبهت ع سامر اجه
همين سحبت ايده وخذاه الواهس يركص ويانه
عفاف: جيييل هل وكت الله يعيني
انوب تحولت الاغنية لدبكه كرديه وركصنه جوبي
توووونسنه كلش
واني اركص شفت سامر منتجي ع الحايط ويباوع لشهد

يُتبع......