باقي اليوم مافيهو شي يذكر بس المساء اتصل لي مؤيد واداني فكرة اني ممكن اجمع تبرعات من الناس وممكن انشر في السوشيال ميديا بصراحة الفكرة جهنمية بس انا شايفه نسبة انها تنجح دي ضعيفة شديد وشبة مستحيلة بس خليني أحاول في النهاية انا ماخسرانة شي ، يعني اول خطوة ح اعملها اني اجيب لي شريحة جديدة عشان اتجنب المشاكل وكدا وارسل الرقم في الرسالة البنشرها عشان الناس ترسل فيهو وبعدين لازم اكسب الزمن عشان #يقين مابتستحمل اي تأخير واتفقت معاو يجيب لي الشريحة من بكرة لانو التأخير ابدا مافي صالحنا
صباح اليوم التاني كانت عندي طاقة إيجابية كدا ومتفائلة شوية عكس امبارح اها مؤيد جاب لي الشريحة وكمان برصيدها غايتو ماقصر معاي ومن دربي داك اتصلت علي ساره وحكيت ليها الموضوع بس احبطتني لكن قالت لي لو الفكرة نجحت ح تلقيني اول المتبرعين من أصحابك منها ومشيت طوالي اكتب الرساله اللي ح انشرها غايتو ساعة كاملة حتي قدرت اكتب لي كلام زي الناس😅😅 وفي النهاية طبعا كتبت رقم الشريحة وبقيت بنشر فيها في الفيس والواتس وبقيت متنحة في التلفون علي اساس تجيني رسالة او اتصال او اااي حاجة ( عارفاكم حاتضحكوا علي 😒😒 خلو بالكم سامعاكم انا) بس بدون فايدة علي الاغلب الناس بتكون فاكراها كذبة او رسالة طاشة ساي ، لحدي مانمت كدا ماجاتني حاجة ، الصباح صحيت مخلوعة وطبعا التلفون مجدوع جنبي من امس بليل بس اعا طوالي فتحتو ليك وعاينت في الشاشة كدا ماكان فيها اي حاجة زعلت والله لدرجة اني قنعت من الموضوع ، اتصلت لي مؤيد وكلمتو وياريتني ما اتصلت اكلة لي منو حلات هرشة استغفر الله بس 😭😭 ، علي اساس اني اصبر وكدا ومافي حاجة بتجي بالساهل اي حاجة دايرة تعب غايتو كلامو في محلو اتوكلت وقلت اصبر ، المساء اتزكرت انو البنات بكرة جايني وبكرة طبعا الجمعة قلت خلاص اتصل لي سارة واكلمها عشان بكرة هي برضو تجي وبالمرة يتعرفو علي بعض وكدا
- الو ساره
- اهلين سلاف خبرك
- ياحيوانة تاني يعني مابتسألي مني ولا كدا الا اتصل انا ولو ماعارفة امي عيانة
- اعفي لي والله انشغلت شديد عنك وقصرت في حقك المفروض ازورك وكدا
- لا العفو بس ان شاء الله خير
- لالا كلو خير
- تمام اها والشغل كيف ماشي معاكي
- تمام الحمد لله ، ياهو زي ماخليتينا كدا
- طيب ياستي انا اتصلت ليك عشان بكرة عندي صاحباتي جايين اللي هم صاحبات الجامعة وعايزاك تجيني من الصباح عشان تساعديني وبالمرة اعرفك عليهم وكدا
- اهااا تمام يازولة بكرة من الصباح بتلقيني في وشك اصلا يوم الجمعة دا بكون قاطعة موضوع ودايرة ابرمج
- خلاص تمام معناها اتفقنا علي كدا طيب يلا سلام
قفلت منها ومشيت لامي كلمتها ورحبت بالفكرة الحمد لله
- والله يابتي اصلا دايرة لي زول يونسني ماعندي اي مشكلة
- وانا مالي ماقاعدة اونسك يعني 😕😕
- 😒😒
- اوكك خلاص يلا تصبحي علي خير ....
يتبع....
