صراحة ماقدرت اصبر لحدي ما اخلص اكل وافتحها لاني اصلا عايشة علي أعصابي وظني في رشاد ابدا ماخاب لانو رسل لي نفس المبلغ البنفتش ليهو نحن يعني سبحان الله تقول انا وريتو عديل وقلت ليو انت يارشاد ادفع لي كدا عن كمية السعادة الدخلت فيني حسيت بإنو الفرحة ماسايعاني والله اها بقيت بنطط بأكلي داك وكمان الاكل جوه خشمي وامي شغالة لي يابت مالك يابت بتشرقي اقعدي ساي وانا برطن ليها عشان الاكل في خشمي وماقادرة اتكلم كويس اها بعد زمن حتي انا وعيت بنفسي وبقيت ببلع في الكل سرعة سرعة وامي دي تكورك فيني ساي وانا ولا شغالة بيها بقي همي كلو متين بس يجي يوم بكرة دا عشان امشي افرحهم وطبعا طوالي ح نبدا ليها في اجراءات السفر ، والله لدرجة اني فكرت امشي ليها اسي دا بس انا ياداب جاية من الشغل وبعدين الليل داخل علينا يعني ماعندي طريقة نهائي ، تاني صبرت نفسي ومن دربي داك وطوالي عملت مكالمة لرشاد وشغالة اشكر فيهو لمان هو استغرب فيني ، وخشيت الواتس وكلمت البنات وكلللهم فرحوا لي ، واتصلت علي مؤيد وكلمتو برضو انبسط مني شديد
- بس يامؤيد بقي عندنا مشكلة اخيرة
- اها دي مشكلة شنو مادام اصعب حاجة اتحلت يبقي تاني مافي اي مشاكل
- مشكلة الجوازات يعني دايرين لينا اسبوع عشان نطلع ليهم جوازات السفر
- ماتشيلي هم انا عندي ابن عمي شغال هناك بكلمو عشان يطلعن ليهم بدري ريحي بالك يلا
- والله اي مشكلة بتحلها لي انت واسي شلت مني هم كبير
تاني يوم طبعا طلعت من البيت بدري اختكم فرحانة ياخ😁😁 ، توووش ويا المستشفي جاك زول والله المره لمان انخلعت مني اتلقي تقول اسي البت دي الجايبها بدري كدي شنو ، وانا بالعادة ماقاعده ازورهم الصباح يعني بعد اخلص دوامي ، اختكم في الله مابتعرف تسكت بعد ماسلمت عليها طوالي حكيت ليها بالموضوع وفهمتها انو خلال الاسبوع الجاي ح يسافروا للعملية ، اها ياخ والله من الفرحة لمان وشها نور وبقت تشيل وتدعي لي ، بس فجأة كدا اسمع ليك صوت زول قال لينا السلام عليكم اتلفت كدا لقيت لي راجل كدا عمرو بكون نهاية العشرينات بداية التلاتينات المرة طوالي قالت ليهو وعليكم السلام تصدقوا اني لسا ماعارفة اسمها منو المهم الشي اللاحظتو انو يقين دي بتشبه الراجل دا بقي بعاين لي بإستغراب وقال
- ياخالتي اسماء يعني ماعرفتينا
- ااااي ياولدي دي ابت الكنت بحكي ليك عنها ، ودا يابتي ابوها لي يقين
اهاااا يعني اسي دا ابوها ، سلمت عليو
- الله يجزيك خير يا اختنا وربنا يكتر من أمثالك
- لالا العفو ما عملت الا الواجب
- اها يقين كيف ياخالتي مااتحسنت
- والله في حالتها بس خلاص فرجت وح نعمل ليها العملية وان شاء الله تتحسن
- طيب ياخالتي المشكلة بقت في الجوازات بس انتو جهزوا لي الاوراق وانا بكرة بجي اشيلها منكم عشان نبدا الاجراءات طوالي ومانتأخر
- انا عندي جواز لاني سافرت قبل كدا بس بتي والخالة م اظن
- انا برضو بكون عندي صاح لاني سافرت الحج
- اي ياخالتي معناها باقي لينا يقين بس
- خلاص ماتتعبي نفسك انا بنفسي بطلعو ليها
- لالا انا عندي معرفة هناك ماشة ليو بطلعو لي سريع بس انتو جهزو لي اوراقها
-ان شاء الله يابتي بكرة بتلقيهم جاهزات
- اوكي معناها بكرة مواعيدنا....
يتبع.....
