سجينة الظلم والانتقام

♡♡♡♡♡♡♡♡♡♡

#سجينة_الظلم_والانتقام 🍂🥀

#البارت الثالث والخمسون

#الكاتبة : سارة الشمري✍🏻

إذآ كنت رجلآ بمعنى الكلمة فلا تسمح لفتاة أن تبكي وإذا كنت تحب تلك الفتاة فلا تدعها تغيب عنك وإذا كنت تعشقها فلا تسمح لها بالرحيل .

غزوان وهو ينقل نضراتة بين عيونهة : شنو اني من هذني الي عددتيهن ..
ميامين غوركت عيونهة وبلعت ريكهة : انت ولا شي ...
غزوان بندم : شلون ولا شي .. مو انتي كلتيلي احبك وجانت بنفس هاي النضرات ..
ميامين دموعهة نزلت وكالت بحقد : وانت شسويت من شفت نضراتي .. شسويت من كلت احبك .. دمرتني وانت اتكول شلون كدرتي تكولينهة وعيونج بعيوني وانتي جذابة ..
غزوان مسح دمعتهة بيدة وحط كصتة على كصتهة وكال بهمس وندم : شششش اسف والله اسف .. والله اتمنى لو يرجع بية الزمن لهذاك اليوم .. اموت روحي الف مرة وما اسوي بيج الي سويتة ..
ميامين بصوت متهدج : بس ما راح يرجع .. لو مهما سويت ما راح يرجع .. غلطتك ماكدر اغفرهة ..
غزوان : ميـامــيـ ..
قاطعتة وهي راصة على سنونهة بحقد : وخخر عني .. عوفني وحدي ..
غزوان غمض عيونة وتنهد وكام عنهة .. طلع من الغرفة كلهة ..
ميامين رفعت اللحاف وعصرتة على وجهة وصارت تبجي بقهر وكل تفاصيل هذاك اليوم تنعاد عليهة ...
غزوان طلع من الغرفة وتوجه للبلكونة ...
الجو جان كولش بارد وهو لابس بدي نص ردن مال نوم .. بس مع هالشي يحس بنار مشتعلة بكلبة ...
حط ايدي عالسور وهو يتنفس بسرعة ويطلع البخار من حلكة ويختفي وية الهوى .. يلعن نفسة الف مرة لان جان سبب دموعهة ..
متندم بكد شعر راسة لان خسر حبهة بألي سواه .. مستحيل تنسى الي سواه .. هالوعكة الي هوة سواهة بكلبهة مستحيل تطيب ...
تنهد من كلبة وهو يكول : لا تستسلم غزوان .. ميامين تحبك .. بس هي بعدهة حاقدة عليك ومعتقدة ان هي تكرهك .. الي يحب ما يكره ...
دخل للصالة الفوقية وهو مالة عين يدخل ويشوفهة ...
مرت نص ساعة تقريباً ... دخل للغرفة شافهة منطيتة ضهرهة ..
تمدد عالجرباية وصار وراهة .. عصر ايدة وهو يشوفهة نايمة ودمعتهة ناشفة على خدهة ...
حط خشمة بشعرهة وهو يحاوط خصرهة ويحجي بهمس : اسف .. راح ابقى انتضر لحد ما تسامحيني ..
غمض عيونة وهو حاضنهة وغفى على عطرهة ...

££££££££££

ابطالنا نامو .. لكن مو كلهم ..
البعض منهم قلق .. والبعض منهم يفكر ومحتار ...
والبعض منهم يبجي ..

مؤيد جان قلق من ناحية شنو ردة فعل جوري لمى تعرف ان هو خطبهة ...
وبنفس الوقت قلق من المستقبل الي جاي .. وهو يدري بعمة راح يغصبهة ان توافق تتزوجة ..

ابو غزوان بس انطاه مؤيد الموافقة فوراً اتصل بأخوه حافظ وطلب منة يرفض الي متقدمين لجوري لان مؤيد رايدهة ...
جوري مجرد ما سمعت كلام ابوهة رفضت هالشي رفض قطعي .. مستحيل تتزوج شخص وهي تحب فارس شلون اذا كان هالشخص اخوه ...
ابوهة من سمع رفضهة غصبهة ان توافق بس هي وكفت بوجهة وبالمقابل هو حاول يضربهة بس اخوهة احمد حماهة منة وهدأ ابوه وكلة ميصير غير الي تريدة ..
وهسة جوري منهارة وتبجي .. ماتريد غير فارس ..
ابوهة يريد يجبرهة .. يريد يكسر كلبهة ...
نايمة بحضن بسمة ودموعهة تجري على خدهة وتشهك من البجي ...
بسمة ما تحملت وضع اختهة وطلعت تليفونهة وصارت تكتب لخاتون وتريدهة تحجي وية مؤيد حتى تقنعة يرفض هالزواج من عندة ..
خاتون وجانت متوقعة هالشي من جوري مية بالمية ...
توجهت لغرفة مؤيد .. دكت الباب .. ثواني واجاهة صوتة : تفضل ..
خاتون مدت راسهة من الباب : كاعد لو نايم ..
مؤيد بأبتسامة : كاعد .. تعاي يالعروسة ..
خاتون خجلت بس مو هذا موضوعهة ..: عوفك مني هسة اني جاية احجي بموضوعك ..
مؤيد كعد بأستغراب : شبي موضوعي ..
خاتون بحزن : مؤيد اعرف ان الكلام الي راح اكولة ممكن يجرحك بس مجبورة اكولة الك ..
مؤيد وكأنة عرف شنو تريد تكول : كولي لا تخافين ..
خاتون : مؤيد انت خطبت جوري بس ... سكتت ماكدرت تكمل ..
مؤيد كمل عنهة ببرود : بس جوري تحب فارس ..
خاتون بصدمة وبعدين تحولت لعصبية .. : انت تعرف بهالشي .. ومع ذلك خطبتهة .. انت تدري هسة حاجتني بسمة اتكول هي منهارة وشبعانة بجي لان عمي يريد يجبرهة على هالزواج .. ليش سويت هيج بيها مؤيد ..
مؤيد جان متوقع هاي ردة فعلهة .. سحب تليفون خاتون من ايدهة وفتحة ..
خاتون : مؤيد احجي وياك .. شجاي تسوي ..
مؤيد : وين اسم بسمة ..
خاتون بأستغراب : شتسوي بي .. هذا اول واحد ..
مؤيد برفعة حاجب : مسجلتهة الضغط والسكري ..
خاتون وهي تكتف ايدهة : بربك هذا موضوعنة هسة ..
مؤيد ما اهتملهة وضغط اتصال ..
خاتون تباوعلة وتريد تشوف اخرتهة وياه شنو ..
ردت بسمة بلهفة : الو خاتونة .. بشري حجيتي وية مؤيد ..
مؤيد : بسمة اني مؤيد .. اذا جوري يمج اطيهة التليفون ..
بسمة بتفاجئ : مؤيد .. ماشي دقيقة ..
جوري استغربت ان يريد يحجي وياهة بس بنفس الوقت محتاجة تحجي وياه بلكي يغير رأية ...
جوري بصوت مبحوح من البجي : الو .. مؤيد ..
مؤيد بلع ريكة من صوتهة : شلونج جوري ..
جوري وهي تبجي وعبالك تشكي : مو زينة .. مؤيد الله يخليك الغي هالخطوبة .. اني ماكدر اكون الك ..
مؤيد : وليش ما تكدرين ..
جوري : لان مستحيل اتخيل نفسي زوجة لاخو الشخص الي حبيتة طول عمري .. اي اني احب فارس من زمان وهو صح مات بس بعدة عايش بكلبي .. ماكدر انساه ولا اتخيل نفسي وية غيرة ..
مؤيد بهدوء : اعرف بهالشي من زمان ..
جوري بصدمة : تعرف ؟ .. لعد ليش سويت هيج .. ليش تريد تخطبني .. شسويتلك حتى تعاقبني هيج ..
مؤيد بتنهد : جوري بالعكس اني ما جاي اعاقبج .. اني جاي اسوي هالشي علمودج .. انتي تدرين ابوج راد يجبرج على غير واحد .. واني لان ادري بيج تحبين فارس ما هان علية ازوجج لشخص غريب ومجرد ما يعرف انج جنتي تحبين واحد ثاني راح يعاقبج ويستعمل وياج اسلوب الضرب والتعنيف واذا ما سوة هالشي راح يطلكج .. واني سويت هالشي حتى احميج من هيج علاقة ..
جوري بصدمة : يعني انت خطبتني بس لهالسبب ..
مؤيد : اييي .. وصدكي ما راح اجبرج على شي اني ما تردينة .. يعني زواجنة يكون على ورق ويكون لحمايتج بس .. وانتي اختاري هسة .. يا تتزوجين شخص غريب وتعرفين شنو يصير .. يا تتزوجيني ويكون هالشي لمصلحتج ..
جوري بجت وصارت تشهك .. : موافقة اتزوجك ..
مؤيد : جوري رجاءً لا تبجين بعد .. ترة هالزواج ما راح يغير شي بحياتج .. مجرد توقيع ورقة وبس ..
جوري هزت راسهة وعبالك هوة كبالهة : ماشي .. شكراً مؤيد .. معروفك ما راح انساه طول عمري ..
مؤيد تنهد شحلاة اسمي بلسانج ..: بالخدمة ..
جوري حجت بجدية : بس مؤيد عندي شرط ..
مؤيد بأستغراب : وهو ؟
جوري : بعد زواجنة انت تكمل حياتك طبيعي وعادي تتزوج الي تريدهة .. يعني لا تهتم لاحد .. اني راح اكون اول وحدة توكف وياك .. لان اني هم ما اسمح ان اكون حجرة بطريقك ..
مؤيد بأبتسامة جانبية : اكيد هالشي .. اني اصلا مقرر من البداية ..
جوري بأبتسامة : تمام .. شكرا مرة ثانية .. مع السلامة ..
مؤيد : العفو .. مع السلامة ..
سد التليفون والتفت على خاتون شافهة تبجي ..
مؤيد : خير انشالله .. شبيج تنحبين ..
جوري حضنت اخوهة وكالت : احبك مؤيد والله .. اسفة لان ضلمتك وصيحت عليك ..
مؤيد ابتسم ووخرهة عنة : وخري خنكتيني .. وبعدين وفري هاي الاحضان لرائد مو الي ..
خاتون ماتت من المستحى .. ضربتة على كتفة : مو صوجك ..
عافتة وطلعت وهو يضحك عليهة ...