يوسف وصلنا القاعة كانت ابداع يااخ 💗 مرح قالت لي انا شكلي حأنوم في المحاضرات كلها يوسف قال ليها ما مشكلة نومي وانا بشرح ليك قالت ليهو كلك زوق يااخ ❤️ ، أثناء ما نحن واقفين جاء الولد الوصف لينا الكفتريا شايل اكل وعصير ادانا ليهم قال لينا انا كمان بعتذر منكم واكلكم ما كملتو قلت ليهو انت برضو معاهم ؟ قال لي شبه كده مرح قالت ليهو مووووستحيل قال ليها والله 😂 قلت ليهو يعني ده تعويض ولا شنو ؟ يوسف قال لي انتي مالك ناشفة كده وبتقيفي على الواحدة يااا انتي قلت ليهو ملك ما يا انتي قال لي شايفة ما كنت عارف اسمك اصلا وتشرفنا يا ملاك قلت ليك ملك ما بتسمع قال لي لا حأناديك ملاك لأنك كده 💗بغض النظر عن لسانك ،،في مواقف زي دي لساني بتقطع وما بعرف ارد بقيت بعاين ليهم بس وكيف أنهم دخلوا في بعض بسرعة ومرح ما صدقت سألت الولد من اسمو قال ليها اسمي خالد برلوم معاكم قالت ليهو تشرفنا ،، يوسف قال لينا ما اظن الاسبوع ده يكون عندكم محاضرات بس برضو تعالوا اتعرفوا على سنايركم وجزء من ناس الجامعة بتستفيدوا ودي احلى حاجة في الجامعة بتقدر تخلق كمية من العلاقات خاصة لو كنت اجتماعي قلت ليهو طيب لو الزول كان انطوائي قال لي نطلعوا من الانطوائية دي 💗 استأذنا منهم انا ومرح لفينا الجامعة كلها ما خلينا مكان وبعدها رجعنا الداخلية ،، مرح من دخلنا بتتكلم عنهم وعن خالد قالت لي مش قلت ليك احتمال تحصل معجزة قلت ليها دي معجزة اسي قومي لفي عليك الله قالت لي ملك ممكن اطلب منك طلب ؟؟ قلت ليها طوالي قالت لي ممكن ما تتصرفي كده وما تقيفي لي زول على الواحدة خليك عادية خلي العصبية دي قلت ليها بس كده حأحاول بس مافي زول يغلط علي قالت لي تمام 😘 الصباح مرح صحت اول واحدة قلت ليها مالك قالت لي بقيت بتفاءل بالجامعة دي شديد ناسها كلهم حلوين 🙂🤤 قلت ليها قولي خالد ولخصي 🙂 قالت لي كلهم لكن خالد الاحلى 🙈 قلت ليها انتي واحدة ما عندك موضوع قالت لي مش أمس اتفقنا قلت ليها اي صاح معليش 🐸 قالت لي ما شفتي عيونو والشمس عاكسة فيهم قلت ليها انا ماشة البس ما فائقة ليك
"خالد حلبي طويل ،عيونو عسلية شديد و كحيلة واستايلو حلو ، ويوسف اسمر عندو عضلات وعيونو ناعسة وكحيلة وشخصية كده وعندو لحية وبلبس نظارات "
كالعادة انا لبست اسود لوني المفضل 🖤 ومرح لبست اسكيرت اسود فنايلي وتشيرت كبدي بأسود وطرحة كبدية واسبورت كبدي وشنطة سودا وبرضو مشينا برجولنا والحرس الجامعي وكلامها الكتير 🌚ما ردينا عليها دخلنا طوالي وصبحنا بوش خالد لقيت مرح عاملة كده 🤤 قالت ليهو شكلو يومنا حيكون حلو زيك الا قرصتها حتى عرفت هي عملت شنو قالت ليهو اااا صباح الخير قال ليها صباح النور وفعلا صباحك حيكون حلو حتمشو معاي عازمكم فطور قلت ليهو مافي داعي ياااخ مرح قالت ليهو والله مافي داعي وشكلك مشغول لالا بس كان عندنا برنامج بعد دقائق واتلغى قالوا العصر وما عندي حاجة اعملها قلت لي مرح شكلو عايز اتموضع بينا قالت لي ما مشكلة ياخ ما صاح نحرجو قلت ليها طيب تمام مشينا كفتريا بره الجامعة واتونس معانا وطلع هو كمان قاعد في داخلية وطلع ظريف وقال لينا حتمشو معاي البرنامج بعدين عاملين قعدة حقت شباب فيها سناير وبرالمة قلت ليهو فيها شعر وغنى وكده قال لي اي قلت ليهو ظابط اصلا دي القعدات الظابطة 💗 قال لي موافقة اتخيلتك اول واحدة تعترضي مرح قالت ليهو ما تشوف لسانها ده والله ملك دي طيبة وظريفة شديد بس لمن تتعرف عليها اكتر حتشوفها بطريقة تانية 💗 قال ليها الايام بتوري كتير وان شاء الله تكون كده ما حسينا بالزمن لمن شفنا الساعة لقيناها اتنين ،،تلفون خالد ضرب بعد خلص قال لينا البرنامج ببدأ الساعة تلاتة قلت ليهو هم لي ما ملتزمين كده ؟قال لي دي اول مرة اعملو قعدة مشتركة وعملوا تجهيزات وكده قلت ليهو شوقتني يااخ مرح قالت ليهو على فكرة ملك بتغني حمرت ليها كده لمن بلعت ريقها مرتين قال ليها بالله ظاهر عليها لانو حتى صوتها العادي حلو كنت عايز اسألها بس خفت تحرجني قلت ليهو انا ما بغني بس بدندن مع نفسي سااااي والله ما على قدر كده قال لي برضو ما مشكلة قال لي مرح ممكن رقمك عشان اضرب ليكم بعدين واحدد ليكم المكان ادتو الرقم ومشى مننا قال ماشي يجهز معاهم ،،كسرنا الزمن كلو في الكفتريا وكان فضل للزمن زي 20دقيقة رجعنا الجامعة لحدي ما خالد ضرب لينا ومشينا عليهم لقينا كمية من الناس ولا المكان الاختاروه وراء الجامعة مكان كده كلو نجيلة وحولو اشجار ومركبين إضاءة ملونة لأنهم حيستمرو لي بليل اول واحد جات عيني عليهو يوسف كان لابس بالأسود مرح قالت لي مطقمين 😂 قلت ليها ما حأدبك اسي حسابي معاك بعدين 🙂 قعدنا في الارض وللأسف كنت قاعدة جنب يوسف ومرح جنبي وجنبها خالد ،،اول حاجة كان تعارف وبدت المطارحة الشعرية كانت بين خالد وبت اسمها ميس من دفعتنا وولد اسمو احمدسنير ووسنير تاني اسمها الاء وكانوا مبدعين وفقرة حقت اشعار شاركوا فيها يوسف وخالد اتفاجأت بيهم ابدعوا اما مرح جاها شلل في المشاعر وتاني قالوا الغنا وما كانو مجهزنها مافي زول قال حيغني بس سمعت زول قال ملك بتغني ،، عاينت لقيتو ده خالد قلت ليهم انا ما قاعدة اغني والله وصوتي زاتو ما حلو بس بغني مع نفسي بس يوسف قال لي اعتبرينا نفسك وغني لينا قلت ليهو يوسف انا ما بقدر صوتي برجف ياخ ما بحب اغني قدام زول قال لي ربنا اداك موهبة عشان تظهريها للناس واعتبري مافي زول حولك أو غمضي عيونك وغني ومرح قالت لي والله صوتك حلو وعارفاك بتخافي ومسكت يدي وقالت لي غني وخالد هز لي برأسو قلت ليهم على ضمانتكم يوسف قال لي على ضمانتي انا ده ،، غمضت عيوني وبقيت بغني "رويحتي محروقة حيا وحيا ودموعي مدفوقة" والأغنية دي اصلا بغنوها اتنين قلت اغني ليهم المقطع الاول بس لكن سمعت صوت تاني بغني معاي فتحت عيوني وبقيت بعاين ليه وهو عاين لي بعد خلص مقطعوا هز لي راسو بمعنى أواصل فعلا غنيناها للنهاية وانا مركزة في عيونو بس 💗 بعد خلصنا خالد وقف فوق وبقى بصفر والناس كلها بتصفق والقعدة استمرت لحدي الساعة 8 وبعدها وصلنا خالد بعربيتو
