Fool For Charms

2

~Reds POV~

"Jada why you a waste yuh talent so?  yuh know how much people wish dem did have your talent. Everyday me tell yuh fi go work wid mi sister inna har hairdressing shop just rent part a di shop from her and do your thing " from ever since me can remember, doing hair is my obsession. From high school days me get to love styling hair. Me use to do me hair Ina all different kind a way.

" Me know Kay Kay but me no think me can manage fi do that fi a living " from mi left high school me only did start one call center work but me never stay long deh cause dem white people deh wah come talk to me like me a some dirt unda dem shoes and true mi no tek style too well me answer one a dem raw white  gyal deh over di phone and tell har some words weh she wudnt understand but nonetheless she get di message, dem did a listen into di conversation and sake a so dem say me fi don't come back after mi do two months.

Two months a me time me waste deh a tek insult fi dem and dem fire me after me give them so much good service me should a answer back di nasty people dem weh deh call from long time instead a waste me manners fi two months . But from dat time me neva work back.

A Johnny really tek care a me him give me money sometimes even thou it nuh so much but thank God fi me mother true she deh a foreign she always send dung hot clothes fi me and when me low on money she send money come fi me to.

"But Jada yuh can't a depend on Johnny and your mother all di days a your life. Yuh have to start think about helping yourself after all you a big woman now" Kayla a me best friend, from basic school we know each other but we end up go different high school but we still did keep in contact so it was as if we didn't separated any at all. We live in a di same community to so that did mek it harder fi we part.

School work a never my cup a tea. Me brain couldn't manage so much things and because a dat me never get much subject out a high school. While Kayla on di other hand past couple subjects well and in a one decent work in a one pharmacy as pharmacist. She always a push me to do some subjects and she tell me say she will help me pay for it and practice but me never get around to it as yet.

"Kay Kay me know all way yah say. Yuh don't tyaad fi tell me all a that by now? Me know yah look out fi me but this is my decision to mek not yours and me respect wah yah try do fi me but I am okay. Me don't have any problem wit not working right now, Johnny nu have no problem wid it and neither me madda so let we just forget it okay" me no mean none a wah me say in any bad way but Kayla need to respect me decision it's my life after all.

" Okay. Let we forget about it then" Kayla did come over me yard, that is fi me and Johnny yard, fi do her hair. Me a sow in one duby hair fi her. Kayla a one a me humblest friend shi no like party, she nuh love make up and she no like di long inch hair them she say it too fussy. Me no know how me an har remain friends cause most a everything wah she hate me love all a dat. As dem say opposite attract to each other. Maybe it stay so in a friendship to.  " So wats going on wid you and Johnny? Unnu still a fight?"

"Everyday and then mek up back di same time. Johnny think him smart but him try know say anyhow him slip a wah next man a go tek up him post " Mi tell Kayla everything so she know bout di good and bad times in a every aspect a me life "Wah bout fi yuh bwoy, Kyle?"

" A him me left up a yard wid kylanie. Him love drive bout too much gone a god knows where so mi left di baby pon him mek him stay wid har. A never me one get har so him affi do him part to "  Kayla hav one likkle girl wid Kyle she a just 10 months old now.

Kayla and fi har man story dis as bad as fi me and Johnny story so she can relate and understand wah me a go thru. Anybody whether male or female who can say fi dem relationship good as in dem sure dem man or woman nah cheat then me would a wah have a word wid dat person dem would a have to tell me a wah dem secret be.

"Suh way fi yuh bredda deh gwan wid? Him na breed fi him woman a wonda a wah him a wait pon" Jimmy a Kayla big bredda and if mi go be honest mi did like him off so til when mi did a go school. Yuh know when yuh just attracted to somebody older than yuh but dem already hav dem person an dem see yuh as family anyhow a did one a dem feeling deh.

"Jimmy say him a pursue fi him career so him no want any child fi hold him back rite now" seem him develop di foreign mind thinking now. Likkle while after mi left high school Jimmy did fly out gone live a America and him no come back a jamaica all now

"okay well at least him know what him want" me tell Kayla as me start fi style di front part a har hair. Me almost dun har hair mi just a fix up di part weh fi har hair go deh show.

"So yuh nuh plan fi give Johnny no baby?" Di mount a babies dat Johnny have pon di road him no need no more, cause di mount a school gyal weh dem say him a keep a baby dem be in a sense

"Johnny can try as hard as him might but him nah breed me. After me nuh plan fi stay me entire life wid him me no wah Johnny fi hold back my life wid no Pickney. When me say it's time to go a me alone a leave out a him house me nah left yah wid no Pickney pon me side " and as me say those words me a pray in a me heart say me period start soon cause it late fi dis month. Anyhow a breed Johnny breed mi dat go be a big problem.

~~

Me hear say it's either two way that we reach here on earth, either our parents did plan fi we or we a mistake. Tell di truth a which one yuh be?