sarong ganta an sukol kan sakuyang pagmawot
na isapna ka sa kalayo kan sakuyang daghan.
labas an sungong nakua ko sa kadlagan alagad
mamakot man ini sa dangdang kan saimong pagmangno.
dai ko iluluwag tulos an pagkamoot siring baga
sa mga paslong maragaw kan itutulod ko sa lamesa.
papaunugon ko nguna tanganing an sadiring imbong
kan koron iyo an luway-luway na matukal kan tipo--
ini itong mga tinatada-tada mo pang takot, sibot, hapot mo
sa pagmawot sakuya na tibaad mayo kang isapna sa aga.
daika mahadit. matanom baga kita. matarok. mahilamon asin
aatamanon ta an nagbuburaay na pagmati hasta mahinog---
sagkod na an mga ini magdagos duman sa tambobong
kan satuyang mga hawak na tinatakad nin ganta sa salop.
sarong ganta sana an kapinonan. gagatongan kan labas
tang mga hawak. madakol. madakol ini. malubag. malubag ini.
dai ka sana mag-untok sa paghayop sa daso tanganing
maglaad, magmakot an mga angat na sa satuya maluto.
alagad kun marisa mong kulang an tubig na ibinulos ko asin
may ansyas na mahilaw ako. togyongan mo. togyongan mo.
