حب مقتول

حلقة 8

ملاحظة : لايك ع خاطر التصفية

#حب_مقتول
حلقة 8 🔥💛

روايات محمد مالك

خديجة: شوف الباب غبرة شوف هادي يعبو عليهاا

شريفة طلعت من الدار : اهلا وسهلااا

خديجة: اهلين بيك من اليوم خلاص انتي الضيفة اني رجعت لحوشي وحوش سالي الله يرحمها

شريفة:الحوش كله ليك

شريفة عطتها بالظهر وخشت

عبد الله ( بابا) : ربي يهديهك يا خدوجة مش ناقصين مشاكل

خديجة: كيف مش ناقصين قولي طلعت صغارك حرايمية

بابا شافلنا وفنص بمعنى قلتو !

عمر: عمتي مش غريبة يا بابا مش لازم ندسو عليها شى

خديجة: هيا نفسها خلاتك تلز ولدك من حوشك

بابا: بس يا خديجة

خديجة: اسكت ولا كلمة الي نبيه منك متتدخلاش لا انتا لا صغارك بيني وبينها

بابا: ولما تجي في الليل تنفخلي راسي

خديجة: تصرفي انتا وياها اني مدخليش هكي تقولها توا مرة اثنين معاش تكلمك ولو مش عاجبها طلقها الي جابها يجيب غيرها انتا خلفت بوعدك من الاول

بابا متعصب ع الاخر من اخته الكبيرة خديجة مشى الصالة

ماجد: اوو عمتي خديجة معناها نقولو مبروك الجبهة نفتحت

خديجة: ههههههه اي والله لما نحرركم 😂

ماجد : يقين لولي زودو سلمو

جت يقين مرته وبنته  لولي

خديجة سلمت ع مرته وقعدت تلعب ف لولي

ماجد: خيرهاا ايدك
عمر: حادث بسيط صارلي
ماجد: الحمد الله ع سلامتك عندي ليكم خبر حلو قنين جميل هكي
احمد: زعما درتها كبيرة
ماجد: درتها كبيرة بعتت طلب اذن تمديد اجازة لولي بسبب السفر زادوني اسبوعين يعني حنحضر عرسك يا بطل
احمد: الله اكبر ايه هكي الكلام ههههههه
خديجة..شادة خدود لولي : معناها بنشبع منها هادي اني

ركبت داري والسؤال الي في ذهني

من وين عمتي تعرف فادي او يطلع قريبنا من بعيد او جارهم او او هلبا اقتراحات هلبااا ملقيتش جواب مقنع

شفت للفون لقيته يرن ( فادي)

خديت نفس عميق وردت

سالي: الوو
فادي: كيف الحال
سالي:الحمد الله
فادي: شكلك حلو لما تبدى زعلانة
سالي: حاضر توا نقعد ديما زعلانة
فادي: لا مش هكي
سالي: تفضل فادي ؟ كيف نساعدك
فادي: لتوا متعوديش عليا
سالي: أسفة مقدرتش نتعود عليك في شى مجهول ناحيتك
فادي: اسالي ونخليك تعرفي شن المجهول الي فيا
سالي: لا منحبش نسال الايام تجاوب ع كل سؤال من غير ما تسال
فادي: حكمة غريبة صادرة من بنت
سالي: اهاا شفت انتا من الناس الي تقلل من قيمة البنت
فادي: لا من الناس الي يحبو بصدق
سالي: ومن الناس الي تعرف تقلب الموضوع وتجي ع نقطة الضعف
فادي: المفيد
سالي: منعرفكش يا  فادي اخر حب ليا غدر بيا ف مش كل من هب ودب حيخش حياتي
فادي: كلام قوي هلبا والغريبة انه صادر منك
سالي: نبي نفهم علاش كل كلمة انقوله تقول غريبة انها صادرة مني ؟
فادي: لانه الكلام هاده عمره يجي من بنت طيبة زيك السبب الوحيد الي يخليك تقولي هكي انك موجوعة
سالي: نهنيك الصراحة
فادي: علي ما اظن مفيش انسان في الدنيا ميستحقش فرصة ومن الاخير تبي ولا لا الصدف الي بيني وبينك الفترة هادي غريبة
سالي: مش قتلك في شى مجهول ؟!
فادي: حنخلي الموضوع ع الله وندير جهدي تصبحي ع خير
سالي: وانتا بخير