معاذ ومنار °° باللهجة الجزائرية °°

☕ الحلقة 39 ☕

معاذ غير وقفت فالباب بقا يشوف معاها حار وجها كيفاه تبدل هذا وين كانت لاباس عليها وقف شاف معاهم

رشيدة: وين

معاذ: خارج نشري منطولش

و خرج بعد شوي من دارهم عيطلها مهزتش زاد عاودلها هزت

معاذ: راكي مليحة

منار: ايه لاباس

معاذ: وجهك كان اصفر نتي مريضة

منار: منيش مريضة عيانة حابة نرقد غدوا و نحكيو بونوي

و كوبات معاذ مافهمهاش بصح صوتها كان مبدل راح شرا ڨارو و رجع لقاهم فرشو فالصالون و راقدين

فوزية: ارقد في بيت ياسين نتا و امير

معاذ: معليش خالتي

و راح للبيت لقى امير ثم مازال مارقد

امير: جيت مطولتش

معاذ: شريت ڨارو و جيت

امير: حسبتك خرجت تحكي مع المدام

معاذ: ما كاينة ما نحكي معاها

امير: او العبها على غيري جدارمي و ماتحكي مع حتى وحدة

معاذ: لي مربي مربي سوا جدارمي و لا سيفيل

امير: مقلت والو صاحبي كالم

معاذ رقد في بلاصتو و بقا يتقلب و مبعد دار لامير

معاذ: اسمع قولي

امير : واش

معاذ: لي تحبها منار ياك

امير تبسم : لا

معاذ: متلعبهاش عليا سمعت و منار مدورش جيهتها

امير: علاه اني ناوي لحلال منيش نتمسخر

معاذ: منار خط احمر

امير: تحبها

معاذ: مشي شغلك بعد عليها

امير: بنت خالي اكيد مش رايح نخليها

معاذ: ر*** ما تفهمش نتا

امير: اذا يما و مسمعتش كلامها و مازلت في رايي نسمعلك انت

معاذ: اكيد كون نزيد دقيقة هنا نقتلك

و خرج و خبط لباب وراه نسا بلي مهوش في دارو شاف الضو الكوزينة شاعل شكون لي نايض في هاذ الوقت 2 تاع الليل

منار راقدة في بلاصتها و تأن من السطر لي في كرشها

منار:افففف باينة ليلة كلبة عليا ليوم

شافت مع ريمة و صفية راقدين

منغر: نوضهم كيفاه غير انا منرقدش افففف

و ناضت من بلاصتها راحت للكوزينة تكات راسها على الكرسي و ضغطت على كرشها اففف ماجي تهبط و يروح السطر هذا نهبل انا ندير تيزانة نشربها سخونة