فراشاتي والزمن (مكتمله)

البارت 42

مساء الخير أحبتي
أتمنى لكم قراءه ممتعه ❤

بقلم: زهراء البياتي Zahraalbayati
بارت طويل لعيونكم ❤❤

اندك الباب مسحت دموعي على السريع
نور..اتفضل
دخلت ماما وهيه تضحك
نهى..يمه هستوه نزل ياسر فك النهوه
جانت ماما فرحانه بس من شافت شكلي عكدت حواجبهه
..شبيج شصاير
ركضت لحضن ماما و كمت ابجي و اشهك بحضنها
هيه بسرعه حضنتني
نهى..يمه بنيتي شبيج شو تعاي تعاي فهميني شبيج

كعدنا على الجربايه و ماما تمسح بدموعي
نهى..احجي يمه شكو شصاير
نور..ماما ياسر قبل متجين كلي حعوفج بس ضل يحجي و يكلي حضل احبج طول العمر
نهى..اي و هسه انتي مفرحانه لان فك النهوه
نور..فرحانه اني بس مادري احس شي بداخلي ديأذيني
ماعرف شنو بس احس احساس غريب
نهى..شوفي يمه يمكن انتي حاسه بذنب لان كسرتي ياسر بس اني ححجيها الج من الاخير
اول شي ياسر خوش ولد و اهم شي ابن عمج يعني مو غريب و اني متأكده اذا تتزوجين بياسر حيسعدج بس هم جعفر خوش ولد وشاريج
اني ماريد اجبرج على شي احنه قبل جنه نجبر البنيه هسه لا انتي براحتج
بس اخذيها نصيحه لترحين وره كلبج روحي وره عقلج
يعني هم فكري اهل جعفر مو هينين و لا سهلين
وهم امه رافعه خشمهه

مسحت دموعي و هزيت راسي
نور..لا ماما خلص اني قابله بجعفر
نهى..بعد بكيفج يمه بس ها مو باجر ترجعين و انتي تبجين نفس حوراء و تكولين خاني او شي داكلج فكري زين
نور..ماشي حفكر بعد
نهى..اي يمه عفيه بيج فكري زين يلا اروح انزل جوه اني
راحت ماما و اني حطيت راسي على المخده و كلام ياسر يرن بأذني

حوراء..نايمه و اباوع على السكف ودموعي تنزل
اندك الباب ودخلت ماما  كمت اتكيت على التاج مال جربايه و مسحت دموعي
ماما سدت الباب واجت يمي
نهى..ها يمه شلونج
..زينه ماما الحمدالله
كعدت يمي وتباوع على وجهي
..شلون زينه وانتي صايره شبهه ميته يمه ليش هيج تسوين ليش
حوراء..ماما شتردوني اسوي يعني مدافتهم زوجي متصوب وبالمستشفى و مرته يمه الجانت صديقتي و هم حامل منه و ممطلكها انتو شبيكم ليش متفهموني ماكو احد ديفهمني بهل بيت ماما اني داموت داموت
حجيتها و كمت ابجي بحركه وقهر
ماما اني ما انام ليلي بس افكر بي حبيته كوللش ماما ليهسه اتخيل اذا هو هسه نايم يمها احترك احترك من الغيره و القهر ونوب فوك هذا كله هو زوجي وبعدني ممطلكه منه شتردوني اشد وصله واركص شتردوني فهموني

نهى..شوفي ادري بيج مقهوره ومتندمه و تعبانه و غيرانه وبعدج تحبي و كاعد ادمرين نفسج علموده و تفكرين بي و دتبجين كل يوم حته بتج مدتهتميلها لان
من هلكد مناسيه نفسج
بس هو الخسرج مو انتي صدكيني لدمرين نفسج على شي ميسوى انتي مو اول و اخر وحده تطلك
انتي عندج بنيه ودتكبر ودتعلم صيري انتي امها وابوها
شايفه عمر اذا يشوف بتج ممهتمه بسرعه يوديج للمحاكم وياخذها منج وبسبب تصرفاتج حتخسرين بنتج هم مو زوجج
ماما عيشي حياتج وانسي الماضي يروح كلب يجي كلب ثاني هيج الحياه امي عيشيها لنفسج ولبنتج
انسي يمه انسي لهل حيوان الحياه تره مره نعيشها مراح نعيشها مرتين
كل لحضه دتمر دتروح من عمرنا يمه على شنو تقهرين نفسج انتي شعبالج هسه هو نفسج مياكل وكاضيه بجي لا هو فرحان ويم ايناس لان حامل و متونس
وانتي كاعده هنا تتبجبجين
اذا هو ممهتم الج شكو انتي هلكد مهتمه بي يمه هو حته مرجع اتوسل لا بالتلفون ولا اهله رجعو اتوسلو
تره الميريدج لتردي لترخصين نفسج
كلشي ولا كرامتج و هسه امسحي دموعج و غسلي وجهج وانزلي يم بنتج جوه عيشي علمودها
افتهمتي لو بعدج غبيه و تردين تبقين لوحدج هنا تبجين