العميلة 306 (باللهجة جزائرية )

الحلقة 17

الحلقة 17 :
عنوانها: #اختياري_أنا
جريت .. حبست .. طحت ووقفت .. بكيت .. تعذبت هاذ ليام .. مي عالأقل قدرت نهرب من بين يديهم ... دخلت خالتي آمنة .. تلفت بزربة ..
ريان؛ خ خالتي آمنة تحبي ندير كاش حاجة
حطت الستي اللي فيدها ..و قدمت عندي حطت يدها على كتفي ..
آمنة؛  يا بنتي أنا كي هزيتك من الطريق هزيتك ك بنتي مش بش تخدمي عندي فهمتي
عينيا دمعوا .. هزيتلها براسي تاع ايه ..
آمنة؛ دوكا اشربي تيزانة تاعك لا تبرد .. و متنسايش تروحي تجيبي اللحاف اللي دومونديتهولك من عند راضية
جات بش تمشي .. حكمتها من يدها
ريان؛ مرسي خالتي ربي يفضلك
آمنة؛ الفضل لربي بنيتي
رشفت من التيزانة هاذيك .. لبست الفاست .. هزيت السيوانة .. ودعتها خاطر كانت فالكوزينة طيب .. و خرجت .. نمشي تحت المطر متفرهدة .. وصلت خذيت الشال .  تعديت للپاتيسيار خذيتلها ڨاطو تاع شيكولا تحبوا .. هزيت البوات حليت السيوانة و خرجت .. جو مقلب عاللخر
. زربت فخطواتي بش نوصل للدار .. حليت الباب .. حطيت السيوانة فالسلة ..
ريان؛ خالتي آمنة هاااني رجععت
إياد؛ على سلامتك
~~~~~~~~~~~~~~~~~
تلفتنا ليه في زوج .. يغزرلنا ندرا كيف .. تمنيت تنشق لرض و تبلعني .. زربت كبست روحي ..
إياد؛ ههه منار انتا زاد حاس
ريان؛ شوفة عينك خوك سكران و جا لعندي يهترف .. الظاهر عندك تقاليد فالعايلة تسكروا و تخلوضوا .. مدابيك تهزوا تفيقوا لعمروا ما يجيش يدخل لدار مرا يخلوض .. نطلع نرقد مش ناقصة ..
جيت طالعة كبس عليا من يدي .. حسيتها رايحة تتكسر .. تلفت ليه
إياد؛ هه دوكا هاذي شخصيتك جديدة !! مستفزة مي نظرتك جامي تتبدل ريان ..
حاولت نفك يدي منو .. والو .. موقف خايب عاللخر .. تلفت كي فكلوا يدو ..
منار؛ اخرج برا إياد
تلفت ليه يحكي و يشاور بيديه
إياد؛ منار هي .. محال نغلط فيها .. و و
منار؛ إيااااااد .. قلت استناني برا .. لازم نفيقك
إياد؛ هه مش راح نخرج حتى تأكدلي هدرتي
تلفت ليا .. باقية نعدي فيدي الثانية عالبلاصة اللي كبس عليا فيها
إياد؛ وجعتك ! .. و نتي مخممتيش كي درتي الشي هاذاك كامل... تصورني الوجاع اللي حسيتوا انا !!!
صوتو بدا يعلا ... حاولت نكبس روحي قد ما ننجم .. انا زادة من لداخل حابة نعيط ... بزاف هدرة حابة نخرجها .. بزاف كلام دفنتوا داخلي .. مي منجمش نهدر .. خاطر وجيعتي أكبر من لكلام .. أكبر عياط ..
جبدوا خرجوا .. حطيت يدي على حرف الفوطاي نحب نوازن روحي ..   منعرف واش ندير .. تلفتلي كامل .. قفلت الخدامة الباب .. مش فاهمة حتى شي ..
طلعت لبيتي .. نرجف .. كان لازم يصرا الموقف هذا مي متوقعتش يصرا بهاذ السرعة .. هزيت حبة تاع مهدئ و كاس ماشربتهم .. كبيت عالكاس هاذاك بيدي .. قد وجيعتي .. مفقتش كيفاه طرشق فيدي .. تلفت كي حسيت بالدم .. طلعت يدي نغزرلها .. ضحكت بتمڨعير
ريان؛ وجيعة مالا سي إياد هههه .. واش من وجيعة بالضبط .. بواش تتقارن .. بالكوابيس اللي عيشتني فيهم ؟ .. بالليالي اللي نخاف نرقدهم بش منشوفكش انتا و باباك ال******* ... بواااااااااااااااش تلفت على ميساج وصلني .. هزيت التيليفون ..
منار؛ مخلصتش هنا
غزرت للتيليفون بغل .. و رميتوا على طول يدي .. تخبط فالحيط ..
ريان؛ هههه مخلصتش ايه .. الشي هذا بديتوه نتوما .. و انا اللي نكملوا .. هاذ المرة النهاية على يدي ..
نضت رحت ضمدت الجرح .. و رحت للبالكون تكيت عالكرسي .. نغزر فالفراغ .. هاذاك الشعور تاع .. تفقدوا ذاكرتكم .. تبقاو تايهين .. طلع النهار .. قمت دخلت .. غسلت وجهي .. غزرت للي تراس تاع يدوا .. زدت غزرت للفاصما .. تبسمت على جنب ..
ريان؛ شوية وقت برك
لبست قشي.. روب فورمال (تاع خدمة) مع طالون فالنواغ .. لميت شعري كودشوفال ..حطيت مايكاب .. و حطيت بارفان و نزلت ... فطرت .. قهوة سادة .. خذيت مفاتح الطوموبيل .. و مشيت ..
،،،،،،،،،،،،،،،، الليلة السابقة،،،،،،،،،،،،،،
منار؛ واش مديك عندها !!!
إياد؛ هههه
منار؛ راح ******** انا دوك .. احكي
إياد؛ هي
منار؛ شكوووون
إياد؛ ريان
منار؛ المعنى ؟؟!؟
إياد؛ ا اللي
منار؛ اللي حكيتلي عليهااااا!!!!
إياد؛ اممممم
تكا راسو عالفوتاي .. هربت منو دمعة .. و هو يغزر للفوق .. باقي يغزرلوا داهش ..مجرد التخمام انو تكون هي اللي خوه يوصل الحالة هاذي بسبتها تخليه يتهد ..
منار؛ و واش اللي خلاك تقول هكا !!
إياد؛ ا احساس
منار؛ ******** بيا كيفاه احساس
إياد؛ محبيتش من قبل متقدرش تفهم ني
حس قلبوا خض.. كبس يدو ..
منار؛ منقدرش نحكي مع **** و نتا هكا .. ارقد كي تفيق نحكيو ..
جا طالع وقفوا صوتو من التالي .. خارج بوجيعة
إياد؛ نعشقها
كبس يديه أكثر .. حتى عروق وجهو ظهرو .. و كمل طلع. . باقي يروح فالبيت تاعو رايح جاي .. و يقارن واش حكالو بواش يعرف عليها ..
منار؛ تشابه فالاسم برك .. أصلا قال اللي هي تحرقت ..معقولة واحد تحرق يعاود يرجع للحياة !! .. بالاك تخلوض و شبهها !!
قعد حط راسو بين يديه .. يروح و يجي .. الفكرة هاذي تقتلوا عرق بعرق ...
،،،،،،،،،،،،،،،،،،،،،،،،،،،،،،،،،،
قاعدة فبيروه حاطة رجل على رجل
جابر؛ يعني نتي ريان بن جاب الله !!
ريان؛ هه جاتك بيزار ؟
جابر؛ لا مي رمزي و منار هاذاط النهار مقالوش هكا
ريان؛ ممم مكنتش مبينة اصلا بلي أنا هي .. المعاملات تختلف وقت تتذكر الأسماء و الحسابات البنكية
جابر؛ ممم صح
ريان؛ نظن تتسائل واش جابني لعندك .....
...........