أقْـنعَـة بَـشرِيــة

•• الفصل الثامن ••

خلص هود فالاستقبال كاش و خرج هو و سفيان.. طلعو للسيارة و تحرك ماوقف حتى وصل لمنطقة وسط المدينة.. فيها العمارات عاليين خاصين بشقق فاخرة.. هبط هود و شار لسفيان يتبعو.. دخلو مع احدى العمارات و طلعو فالمصعد..
توقفو فالطابق السابع و خرجو.. وقف هود قدام باب عريض فالبني و خشبو كيلمع.. جبد السوارت حلو و حرك راسو لسفيان بمعنى دخل..
دخل سفيان كيبرگگ فالشقة الي كانت واااسعة و مفتوحة.. أثاتها قليل لكن عصري و فاخر.. مسيطر عليها البني و البيج الي عطاوها إضاءة اكثر.. النوافد كباااار و مدخلين ضوء النهار من زاجهم الصافي..
وقف سفيان كيشوف فالبلازما الضخمة و القلوبة فعينيه.. قال بلما يحس..

سفيان : اشاوا هادشي.. ناري كيف غيجي فيها اللعب
هود : ' من خلفو ' توصلها نفرعك
سفيان : ' قفز و تلفت عندو ' هههه غير ضاحك
هود : مغاديش نبقى معاك حاضيك كيف المربية.. عندي ميدار باش نفك هاد الحريرة قبل غدا.. و نتا غادي تجلس فقنت واحد متحركش منو حتى نرجع.. منلقاش شي حاجة محركة من بلاصتها.. مفهوم
سفيان : مفهوم
هود : هاني علمتك

توجه هود فاتجاه احدى الغرف عندها جوج بيبان من الزاح لكن مكيبينش شنو لداخل.. فتحهم حتى اختافاو فالحيط و دخل.. بقا سفيان كيجبد فراسو و كيحاول يشوف شنو داخل الغرفة.. غير بان ليه راجع بعد عينيه..
راقب هود حتى غادر الشقة و سمع صوت الباب تسد.. بقى واقف شي جوج دقايق و تحرك كيتمشى وسط الشقة.. مشا للغرفة حل لبيبان و شاف داخلها.. بحال باقي الشقة الغرفة مافيهاش كترة الاثات.. داكشي عملي و فيه لمسة ذكورية..
سرير جنب النافذة الكبيرة و خلفو بلاكار واااسع بيبانو زاج و كيبانو البدلات داخلو.. فالزاوية لاخرى كاينة جليسة فيها جوج فوطويات كبار كتوسطهم زربية مزغبة و رطبة و قدامهم مدفأة.. خرج من الغرفة و توجه للباب لاخر..
بغا يحلو و لقاه مسورت.. مشا تلاح فالصالة فوق الفوطوي و هز الريموت كيحاول يشعل البلازما الضخمة.. منين مبغاتش تخدم ليه قال بتذمر..
سفيان : ناري على بنادم كيف داير.. تقول مزيود غا باش يخلع لبشار.. ' كيحك فعنقو ' دقتو باقة كتحرق.. ماشي بحال لعصا ديال شاهدة حلوووة ههه.. اوووف امتى نرجع نشوفها و نتهنى من وجه الخلعة

••• خرج الظابط سعد من المكتب بعدما نقلو جثة عصام.. كلف كل فرد من فريقو بمهمة.. و هو و شرطي آخر توجهو لمكتب الامن.. وقف عليهم و طلب تسجيلات البارح من الصباح حتال الليل.. شاف فيه حارس الامن باستغراب و قال..
رجل الأمن : غير شوية دابة جات ظابطة معاكم و طلبات التسجيلات
سعد : شنووو.. شكون هادي !
رجل الامن : وحدة طويلة و عندها لبادج.. قالت بلي هي معاكم
سعد : ' شنق عليه ' حنا ماخدامينش معنا لعيالات.. اااش كتخوااار
رجل الامن : ي يسحاب ل ليا م معاكم.. راه غير شوية هذا باش خرجات من هنا
طلق الظابط من رجل الأمن و قال للشرطي يبقى معاهم.. خرج كيسرع فخطاويه و وقف فالكولوار عند الزاجة كيشوف لتحت.. غير بانت ليه سيارة بيضاء خارجة من جهة لباركينغ قال مغزف..
سعد : السليماني كتقلبي علياااا