#مبروم_على_مبروم
Part 2 👏🏻👏🏻👏🏻👏🏻
- لا بتطبخى حلو
= عارفه
- واثقه ف نفسك اوى
= طبعا
- يا جااامد انت ..يلا تصبحى على خير
= نعم !!! انت مجنون
- ايه عوزنى ابات هنا ؟
= لا طبعا مقصدش ..
- امال !؟
= امال ايه فى بينا شغل
- مبشتغلش مع ناس معرفهاااش
= استنى .. عندى عمليه جديدة
فكرت شويه الفلوس حلوه برده وانا بحبها
-معرفتش انت مين برده ؟
= قولتلك هقولك اسمى لم تثق فيا ونشتغل سوا .. وبعدان بالمنطق كده اكيد مش ناويه ع غدر كنت بلغت عنك من زمان او ع الاقل تلاشيت وجودك مش هاجى اشتغل معاك !!
كلامها مقنع جدا بصراحه ومترتب
- اقنعتينى .. موافق
= عظمه نتكلم ف الشغل ؟
- لاء شغل مين انا دلوقتى مش شايفك اصلا ..بكره
سيبتها ودخلت شقتى وفكرت شويه ما ممكن تبقى حكومه .. كانت قبضت عليك من اول ربع ساعة ثم دى خدت ٦٠٠.٠٠٠ جنيهههه منى .. حكومه ونصابه ؟
مفكرتش اكتر من كده ونمت شغلانتنا دى مجهود برده
صحيت تانى يوم كلمت نادر علشان يجى نشوف رزقنا وقولتله الاول يروح لصاحب العماره يسأله عليها .. الفكره انها صايعه و مش هيفوتها حاجه زى دى .. وزى ما توقعت مأجره الشقه باسم ليلى وورق مضروب
نادر : بس هى مش سهله يا ريس
يحيى : عارف .. بس محتاجنى
نادر : السؤال هنا بقى ليه !!؟
يحيى : مش عارف
نادر : يمكن وحيده ؟
يحيى : ساامة منير النصابين روح اعملى فطار وهات الشاى
يحيى : ها يا ست اتحفينا ؟
ليلى : اجانص عربيات .. عمليه خفيفه هناخد عربيه من هناك ب ٢٠٠ الف جنيه ونبيعها بمليون جنيه ... وانا هقوم بيها لوحدى ..بس عوزين مشترى ف محتاجين علاقاتك
يحيى : اممم ... مع انه مكسبها مش كبير .. بس ماشى خفيفه
وقد كان وفعلا خلصنا العمليه .. وخدنا الفرق ٨٠٠ الف جنيه .. بحب الضربات السريعه دى اضرب واهرب ...
فضلنا مقضينها كدا انا اجيب عمليه وهى تجيب عمليه .. عملنا حبه شغل حلوين .. لغايه اخر واقوى عملية
ليلى : ركزوا معايا
يحيى : المفيد انجزى
ليلى : عمليه كبيره وممكن بعدها نعتزل مثلا
يحيى : ليه هيدخل منها كام ؟
ليلى : ١٥ مليون دولار
نادر : كاام !!
اتعدلت وبدء اركز ف كل كلمه هتتقال ده فيها عمرى دى
ليلى : ١٥ مليون دولار .. يعنى بحسبه بسيطه كده ٢٠٠ مليون جنيه بالميت
يحيى : قولى
ليلى : عطيه النقراشى
نادر : ههه ده اسمه !؟
يحيى : اسمع
ليلى : الراجل ده تاجر تحف وانتيكات عنده ٦٨ سنة .. ف المدارى بيجيب مقتنيات اثاريه .. ومجوهرات ..بيعشقهم عشق بقاله ٣ سنين هيموت ع عقد فرنسى لوحده ست اسمها " ايسل فلانج " الست دى من القرن ١٨ كانت من كبار العائلات والملكة اديتها العقد ده منحه شرفيه عطيه هيشترى العقد ده الاسبوع الجاى من تاجر مجوهرات فرنسى ... شغلنا بقى نجيب العقد ده وانا عندى المشترى ..
يحيى : تعرفى ايه عنه ؟
ليلى : مش حاجات كتير .. بس مجنون وهوائى موت تقيل جدا ومعاه فلوس تسد عين الشمس وبيمشى بحراسه زى رئيس الجمهوريه كده
يحيى : عندك فكره هندخله ازاى ؟
ليلى : ولا الهوا
يحيى : بسيطه هنلاقى
فضلت اراقب الراجل زى ضله ماشى وراه ف كل حته وكل مكان ..
يحيى : عطيه ماشى بالدجل
ليلى : بمعنى ؟
يحيى : يعنى مؤمن بالسحر والشعوذه وكده .. ومعاه دجال ماشى معاه ف كل الشغل
نادر : انا راى اننا ..
يحيى : لا رايك ده لامؤخذه ف الزباله ..اسمعوا
نادر :...
ليلى: ....
يحيى : احنا انا وانت هنخطف الراجل الدجال
نادر : ايه !!
ليلى : نعم !!
يحيى : ايه يا جماعه انتوا قلبكوا ماله خفيف كده ليه !! دول ٢٥٠ مليوون جنيه ؟؟؟
ليلى : ليه اساسا !!
يحيى : بصى هو مش هيجى غير بشغل الدجل واحنا هندجل .. هنشترى الراجل الدجال ده
نادر : وايه الضمان انه يوافق ؟
يحيى : ٣٠ مليون حلوين اوى انه يوافق ؟
نادر : ...
ليلى : وبعدان
يحيى : بعد ما نتفق مع الدجال هنقوله انى الشيخ محمد زيان من المغرب ..
الدجال فعلا ما صدق وقال انه هياخد الفلوس ومواقف وانا هكمل خطتى معاه
الدجال :ده الشيخ محمد زيان من المغرب يا عطيه بيه
عطيه : اهلا سيدنا اهلا
محمد (يحيى ) : سلام عليك عطيه ..زوين !؟
عطيه : زوين زوين
محمد ( يحيى ) : واش اخبار الشغل !؟
عطيه : ده انا الى هسألك عليه يا سيدنا
محمد( يحيى ) : بص عطيه غادى انت شريت عقد ؟
عطيه : مظبوط يا سيدنا
محمد ( يحيى ) : هسا المراه صاحبة العقد موش تسيبك
عطيه : يعنى ايه !! لسه عايشه !!
محمد (يحيى ) : لا عطيه لا روحها روحها
عطيه : عفريت !!!
محمد ( يحيى ) : روح عطيه رووح .. موش تغلط
عطيه : واعلمها ايه !!
محمد ( يحيى) : نفذ كلامها عطيه .. هى موووش مؤذيه الا لو غصبت عليك وعصيتها
عطيه : حاضر يا سيدنا هسمع كلامها حاضر
كنت عمال افكر انى لو بقى معايا مال الدنيا مبقاش مهزء زى عطيه كده ..
فعلا عطيه صدق وشرب الحوار
يحيى : استوى
ليلى : الخطوه الجايه ايه ؟
نادر : ان الست تروح بقى
يحيى : اسم الله عليك
ليلى : مين الى هتروح ؟
نادر : اكيد انتى
يحيى : لااااء متبقاش حمار بقى .. لازم تكون بتكلم فرنساوى
ليلى : نعم .. انت بتتكلم بجد !؟
يحيى : طبعا .. هو الشغل فيه هزار
ليلى : طب ع فكره انا بعرف
يحيى : لا يا شيخه !! هتبقى وفرتى علينا كتير ...طب يعنى ايه انا اسمى ايسل فلانج ؟
ليلى : je m'appelle aesll flang
يحيى : انا جايه علشان العقد ؟
ليلى : je viens pour le collir ها ؟؟
يحيى : حلو اوى عوزين نظبط الميكاب واللبس علشان يدخل عليه الدور صح
ليلى : مش مصدقاك بجد
نفسى افهم ايه الغريب ف كلامى انا باخد شغلى ع محمل الجد !!
جه يوم التنفيذ والدجال اتأكد ان العقد معاه وساعدنا ندخل البيت وكمان اوضة عطيه
عطيه : انت مين !!!!!!!!!!
ليلى : je m'appelle aesll flang , je viens pour le collir
#حدوته_وعوديه
#مبروم_على_مبروم
#وعد_ياسر
اتمنى الحدوته تعجبكوا لو عجبتكوا شير ولايك ساعدونى اوصل افكارى لكل الدنيا ❤ وشكرا مقدما ❤❤
*ملاحظه صغيره الهشتاج جاى من اسمى وعد نوعومن انواع النرجسية والغرور 😂❤❤❤ *
