Taehyung ke Jungkook ka Jimin

Ch 17 - Jung Hoseok Ka Vishwaas

Jimin's POV:

Biology ka paper tha. Exam hall mein jaate hi main ek nidar yoddha se bheegi billi mein tabdeel ho gaya. Pura confidence gaya tel lene. Sabh students bhed-bakriyon jaise dhakka mukki karte hue exam hall mein ghuse aur roll number ke hisaab se apni apni seats dhundhne lage. Main apni seat milte hi baith gaya par darr ke maare paseena rukhne ka naam hi nahi le raha tha. Nervousness ko kam karne ke liye maine apne aas paas ka mahol dekhna sahi samjha. Maine paya ki mere class ke saare hi nikkamme students waha maujood the. Unki shaklo pe aaj bhi baara baje hue the. Dekhke yakeen sa ho raha tha ki unke pass honi ki abhi bhi sambhawnayein kuch khaas nahi hai. Tabh samjh mein aaya ki fail hona kitna sharmnaak hota hai

Khudke row mein hi mere saamne waala bench dekha toh Lisa aakar baithi. Uska past yaad kar aksar mujhe bura lagta tha. Kuch mahino pehle uska breakup ho gaya tha jiska asar uske padhai par dikhne laga. Darasal, jiske saath yeh relationship mein thi uske paas school ke sabse bade kamine ka title tha firbhi Lisa ko usse pyaar ho gaya. Jaha tak maine observe kiya tha Lisa apni taraf se boht wafadaar thi par jabh kisi galat insaan ko hi dil de baitha jaye toh uss dil ke chaknachoor hone mein zyada samay nahi lagta. Waise toh ladki padhai mein boht acchi thi par sadme mein usne maano apna routine hi tyaag diya. Woh aksar absent rehne lagi, kabhi aati bhi thi toh uski aankhon ko dekhke yeh yakeen ho jaata tha ki woh raat bhar so nahi payi. Canteen mein woh apne friends se dur baithne lagi. Kayi baar toh lunch kharidkar bhi woh zone out hone ke kaaran nahi kha paati thi.

Jab main apne khayalon ki train se bahar aaya toh Lisa ne peeche mudhke dekha aur mujhe Hello aur All The Best kaha. Maine bhi manavta dikhai aur uske liye dil se pass hone ki kaamna ki.

Peeche mudhke dekha toh Jackson ekdum chilled out lagra tha. Usko dekhke laga ki 10:30 se 12:30 ki koi nayi picture dekhne aaya hai, kami thi toh sirf popcorn aur cola ki. Mera dimaag mujhe uski saal bhar ki kartootein yaad dilaane laga. Agrawal Sir ke saamne phatake phodna, Shalini Ma'am ko Valentine's Day pe rose deke "I Love You" bolna, Jadhav Sir ne History mein kam number diye toh unke car ka tire puncture karna yaha tak ki pura saal bina textbook ke class mein baithna aur fir daant khaana mujhe toh uski hobby lagne lagi thi. Ab aisi harkatein karega toh fail hona toh banta hi tha.

"Jimin bhau, maza aa gaya tumhe bhi yaha dekhkar" Jackson sarcasm mar raha tha ya fir usko sachme maza aa raha tha yeh figure out karna mere bas ke bahar waali baat bann gayi thi.

"Jimin Bhau, thoda mcqs mein madat kar dena na, tumko sports department se equipments lene mein apunne help kiya tha na, uska ehsaan return karne ka mauka samjhlo hehehe" woh daat dikhakar bolne laga.

Maine usko green signal diya aur apni stationary ko systematically arrange karne laga. Do ghoont paani ke bhi gatka liye. 10:15 hote hi invigilator ki entry hui toh maine paya yeh toh Namjoon bhaiya ke shaadi ke guest Jung Hoseok the. Unko dekhke jaan mein jaan aayi. Shakal se hi hasmuk aur lenient lag rahe the. Ab aaram se cheating kar paunga aisi tassali hui.

"Good Morning students, all the best aajke paper ke liye. Paper boht easy hai isliye aaram se likheyega aur cheating bilkul nahi." aisa kehte hi unhone sabhko answer sheet aur question paper baatein. Jabh unki nazar mujhpe padhi toh unhone mujhe question paper dene se pehle ek badi si smile ke saath kaha "All the best Jimin, mujhe pura vishwaas hai tum iss baar zarur pass honge aur woh bhi acche number ke saath". Unka mere upar vishwaas dekhkar mujhe apne aap pe kiye gaye shakk pe sharmindagi hone lagi. Jabh koi dusra insaan jo mujhe acche se jaanta bhi na ho woh mere andar itna vishwaas rakh sakta hai fir mujhe apne aap pe aur apni mehnat par kyu bharosa nahi hai? Khudke liye nahi toh Taehyung ke liye jisne papa ke challenge ko aankh mundkar accept kiya aur Jungkook ke liye jisne mujhe padhane ke liye din raat ek kar diye, yeh chunauti pe khara utarna hi hoga.

Maine question paper ko dhyaanse padha toh mujhe har question toh jaise mere baye haath ka khel lagne laga. Itne chits jo maine darr ke maare chupaye the, unke waste jaane ke pure chances mujhe dikhai de rahe the kyunki inn saare questions ke answers mujhe acchese aate the. Mere andar ek confidence ki leher daudi aur maine within time pura paper acchese khatam kiya. Jackson peeche se pen toch -tochkar mujhe distract kar raha tha jisse mujhe kaafi frustration hui par firbhi maine ussko mere paper completion ke beech ek adanga nahi banne diya. Jackson ko bhi maine niraash na karke mcqs ka sequence samjha diya aur uss ehsaan ka bhojh apne kandho par se permanently hata diya.

Paper khatam hua toh main acche mood mein bahar nikla. Bahar Suga apne dono jebo mein haath daale khada tha. Humne ek dusre ki taraf dekhkar smile di aur as promised who mujhe ghumaane le gaya.

Biology ka paper toh badhiya gaya hi tha, baaki papers mein bhi maine puri kasar laga di. Har ek paper ko acchese solve kar, aane waale 2 hafto mein maine apni jaan laga di. Papers khatam hone ke baad intezaar tha toh sirf results ka jiske aane mein lagbhag 2 mahine ka samay baaki tha. Maine saare stress ko side mein rakhkar bohot maze kiye. Kabhi Taehyung, Jungkook, Suga aur main double date pe jaate toh kabhi Kammo aur Jin ke saath main quality time spend karta. Papa ke saath kabhi kabhi cricket match dekhne jaata toh mummy ko sabji-bhaaji laake deta. Sabh mujhse khush the aur main bhi apni progress se santusth tha.