Usa ka Bugkos nga Gugma

Chapter 2- Part 7

'Hi Mika. Nalipay kaayo ko kay nadawat nako sa trabaho and you know what? Well secret. Hahaha. Bitaw komedya lang. Uhm, can I invite you for a cup of coffee or something? Can we go out Mika? Please?. I want to know you better. Kana kung okay lang nimo ha. Ikaw gihapon ang masunod. But please bisan kaisa lang sa and let's talk about anything, the sky is the limit kung ako imo makauban ug maka-istorya. Anyway please think about it. Hoping for an OO nga reply. Hehehe. Your friend. Kyle.' 

Ug milakaw na kini nga wala kaayo niya natarong ug pikit ang sulat sa haligi. Pipila ka minuto ang nilabay, kusog kaayo ang hangin nga milabay gikan sa bukid ug gisundan kini sa kusog pud nga ulan, busa ang papel nga iyang gibutang sa haligi sa tulay nataban ug napalid sa hangin ngadto sa ubos ug nipadulong ngadto sa suba nga karon sulog kaayo ug gianod niini ang papel ngadto sa kawad-on.

Wala pud nakatunga anang adlawa si Mika aron makuha ang sulat busa ang mga mensahe niini gitaban na sa kapalaran. Dihang pagkaugma mibalik si Kyle sa tulay apan wala siya'y nakit-an nga sulat mao nga naminghoy kini.

"Nganong wala ko'y makita nga sulat karon? Nakuha ba kaha ni Mika akong gibilin kagahapon or basin gitaban kini sa ulan? Sayanga oi. Magsulat na lang ko ug balik."

 Ug tuod man nagsulat ug balik si Kyle ug unya iyang gipikit ug ayo sa haligi ang sulat aron nga dili kini mahulog o tabanon ba kaha sa hangin ug usa pa iya kining gisulod sa plastic envelope nga gamay aron dili kini mabasa sa ulan kung muulan man ug usab karong adlawa . Iya kining gibiyaan ug mipadulong kini sa iyang secret spot kung asa dili siya makita ni Mika nga maglantaw kaniya. Apan pipila na ka oras ang milabay wala gihapon niya nakita si Mika. Busa mipauli na lang kini kay gikapoy na pud kini sa pagpangandam sa iyang trabaho.

Kinaugmaan sa wala pa kini muadto sa opisina, gisusi una ni Kyle kung nakuha ba or kung naa ba siyay tubag nga mensahe gikan kang Mika. Naa ra ang iyang sulat sa haligi ug wala kini mahilabtan, buot pasabot niini nga wala maka-anha si Mika. Nasubo kini pag-ayo apan naglaum gihapon nga pagbalik niya sa hapon aduna na siyay makita nga sulat gikan kang Mika. 

Miabot na lang ang kagabhion ug nakabalik na sa tulay si Kyle apan wala gihapon mahilabtan ang iyang sulat. 

"Asa kaha siya? Nganong wala man siya maka-anhi? Tanawon nako ugma basin makatunga na siya. Hello bukid? Kumusta? Tabangi ko nga makita nako si Mika?" Nakatawa kini sa iyang paghangyo sa bukid nga anaa sa iyang atbang. Taud-taud pud kini nga nag-istambay sa maong tulay una mihawa ug mipauli na sa ilang balay si Kyle. Nagpadayon kini nga panghitabo sulod sa tulo ka semana ug wala gihapon mitunga si Mika. Nabalaka na si Kyle ug maayo kung unsa ba kaha nahitabo kang Mika kay wala na man kini mag-anha sa tulay. Anaa ba kaha kini sa maayong kahimtang? 

"Asa ka Mika? Please pakita kanako. Dili nako kaya nga mawala ka. Please pakita kanako." 

Wala niini mapunggan ang mga luha nga mitulo gikan sa iyang mga mata tungod sa kasubo ug kamingaw nga gibati. "Mika. I'm falling for you. Murag nahigugma nako kanimo." Dili man makatuo si Kyle sa iyang kaugalingon apan lisod matago ang mga pagbati gikan sa kasingkasing, dili mo kini ma-deny kung mag-sugod na kini ug pamitik tungod sa gugma nga gibati ngadto sa usa ka tawo. 

Sa laing bahin, sa may tindahan sa may kanto nga makita ang kanindot sa palibot ilabi na ang suba nga limpyo kaayo sa ubos ug ang kaanindot nga bukid sa palibot, usa ka babaye ang sigeg tan-aw sa may tulay ug iya gyud gisusi kung nganong pirme naa sa tulay galingkod ang usa ka lalaki nga murag kada-adlaw niya makita. Hinay-hinay kining nagbantay hangtud nga makalakaw na ang lalaki sa iyang giplastaran ug unya milakaw kini siya padulong sa maong pwesto pagkahuman masuta nga wala na sa palibot ang maong lalaki. Niabot kini siya sa maong pwesto ug misulay ug lingkod parehas sa gilingkuran sa lalaki kaganiha nga nakita niya ug nag tanaw-tanaw kini sa palibot sa kung unsa tong iyang makita nga murag naay ga-ibutang ang lalaki sa may haligi ba kaha o asa bang dapita sa iyang gipwestuhan karon. Ug unya iyang nakita ang usa ka sulat. Iya kining gi-ablihan ug gibasa.