" أثـر "

" أثر " / 11

" أثر " / 11

فرحت هلبا بالكتاب الي جابهولي ياسين ، لآنه مرة في هدرزة كنت مقايلتله انه خاطري فيه ، ليلتها فاتت واني نقرأله منه ، ومن هاديكا الليلة بدي فيه من يشاركني ، مش غر فحياتي لا حتى فوقت الإنفراد ووقت القراءة ، كل شئ فيا بدي لياسين منه حصة ، ومش ليبيا بس الي شهدت على حبنا لا حتى الأردن سهرت معانا فليالينا الصعبة الي الحب مزينها .

السـاعة 4:00 فالفجر :
فقت مخلوعة ، كالعادة ياسين ع الطرف التاني من التليفون ، قعدت نحكيله في الي حلمته ونبكي ونرعش ، "كنت في مكان مصقع هلبا ، وكلكم واقفين انت وبابا وماما وخواتي التلاتة نكلم فيكم م تبوش تردوا ، تهدرزوا مع بعضكم مكأنيش معاكم ، حتى بكيت وقعدت نعيط عليكم وندف فيكم لاكن بلا فائدة ، كأني فعالم وانتم فعالم تاني " ، استمريت فالبكي وقعدت نقوله نبي نشوفك ياسين ، استحشتك لازم نشوفك .
ياسين بلا م يرد عليا سكر ..

نص ساعة واتصل بيا : البسي كويس الدنيا صقع وانزلي نراجي فيك لوطة .
اني : لااا ياسين مش توا ، خليها غدواا ، منقدرش ليل وكلهم راقدين .
ياسين : ماسة هيا م تعطليش وسكر .
فيقت سبأ وحكيتلها ، ناضت دارت دورة فالشقة لقت الكل راقد ، سكرت عليهم الديار وبالشوي فتحتلي باب الشقة ، لبست شال فوق التوتة الي كنت لابستها ونزلتله ..

لقيته واقف ويرعش من الصقع ، مشيتله فيسع ، ياسين خيرك هكي لابس ؟؟؟
ياسين : تعرفي مكنتش نحساب الدنيا صقع هلبا وطلعت مستعجل ومعنديش وقت نولي .
آثار الدموع كانوا قاعدات على وجهي ، قرب ايديه الزوز من وجهي ومسحلي دموعي بالشوي ، مبتسم كالعادة ويقولي : انت حبيبتي واني آقوى من المرض .

صوته وحنيته وتصرفاته وايديه الي برغم الصقع كانوا دافيات خلوني نرجع نبكي من جديد ، هالمرة من غير نقاش ومنغير وعي ولا حتى تفكير ، قرب مني ياسين وحضني ، كنت نبكي هلبا وصوتي هارب ، وهو مكانش حاس بشئ الا بدموعي السخونة الي تخترق فـ التشيرت القطني الخفيف الي كان لابسه ، بصوت يادوبه ينسمع يقولي اهدي حنروحوا مع بعض ، اهدي كل شي حيكون كويس ، تحملي توا باش شهر تاني تكوني معاي فليبيا ونوتوا لعرسنا ، كنت نسمع فكلامه
ونبي نصـدق ، نسمع ومستريحة كأنه كل الي قاله صار وحيصير حق ، كأنـه مفيش مرض ومفيش موت ومفيش آيام صعبة ، بعدت على ياسين واني كان عليا نكمل حياتي فيه ، بنظرة رضا قالي بصوت هادئ نحبك ، ابتسمت كالعادة وايدي  الايسار ضاغطة على ايديه الايمين والجرح في جنب الجرح ، بصوت مبحوح ومغصوص : تربح روح طول صقع .
قعد مبستم وخلاص ، سيبت ايديه وجيت ماشية ، التفتت لقيته قاعد واقف فمكانه ، رجعتله ، نحيت الشال الي كان على كتافي حطيتهوله ع كتافه ، وبصوتي نفسه : نحبك ديما .

مشيت وخليته هو وشالي المعبي بريحتي وتيشرته المعبي بدموعي  ، وجبت معاي دفي صدره وحنية قلبه وحُبه الهلبا ، ركبت لقيت سبأ مخليا الباب مفتوح شوي ، خشيت لقيتها تراجي فيا عالصالون ، اول حاجة دارتها حضنتي ، قعدت نبكي ، كان حضن سبأ زي حضن امي حنينّ هلبا ، لكن مش زي حضن ياسين لأن حضنه م يشبهش آي مكان فالدنيا ، حكيتلها شن صار ورقدت ليلتها على صوت ياسين الي فودني وايدين سبأ الي يلعبوا بشعراتي زي م تحب ادير ديما ، وفقلبي نقول ، أمـا مرض الي بيغلب حُبهم ، واما دواء الي يشفي اكتر قربهم ؟

فـاتوا اليومين الـي بعدهم من غير آحداث هلبا ، كل لما نطلعوا نلقى ف ياسين سابقني ، والليل نرقد فيه ف حضن صوته ، تحدد موعد العملية ، كنت خايفة على سبأ اكتر من على روحي ، كنت حاسة روحي بنموت ومعاش حنفيق لكن الايمان ينقذ فيـا ، وكنت كل م نضعف نصلي ونحمد ربي وندعيله يصبرني ، اني مش معترضة على حكمه ، لكن نبي صبر نقدر نوقف بيه علـى رجليا ، خلي نقوللكم معلومة ، مرضى اللوكيميا مفروض انهم م يبذلوش جهد جسدي كبير ، ومفـروض انهم يحافظٰوا على روحهم باش م ينجرحوش او م يطيحوش ، لأنهم في حالة حرجة بسبب تكسر الصفائح الي يصير ، وهالشئ يسبب في سيولة فالدم ، يعني لو متلًا نجرحت حيكون من الصعب هلبا يوقفوا النزيف ، برضو كانوا يطلعولي كدمات وبقع زرقاء في جسمي ، الشحـوب بسبب فقر الدم كان مسيطر على ملامحي ، وحتى شعري الحلو تقصف وبدي يطيح ، مـكانوش الحاجات المادية والباينة مأثرة فيا زي الحاجات المعنوية والمحسوسة ، كنت عارفة انه كله حيرجـع يسلك طريقه الأول لو نجحت عمليتي ، وطول الوقت كنت نهدي فروحي ونحاول نصبر باش م يضيعش عليا الأجـر الي ربي تفكرني بـيه .

وهكي الأيام تجري ولسان احوالنا يشكر ويحمد برغم كل الحاجات الصعبة الي صايرة ..

هيـا تأخـذ في بعضها واني ندعي لربيِ يعطيني حسنات وآجـر على كل ألم نحس فيـه ، وعلـى هم حايط بيـا ، والحمدلله لين عمري يتم ..
ياسين كان مش مخليني حتى دقيقة ، طول الوقت معاي ، كأنه اني ، مكنتش فغربة ، كنت جايبة بلادي معاي ، كـان ليبيا بقلبه الكبير ودفاه ، والحـب الي نحسابه خشلي فالوقت الغلط ، طلع مخـتار أصح وقـت ، وممكـن لو جاني قبلها راني مش فرحانة هكي ، ولـو جانـي بعدها ممكن مكانش لقاني ، لأن لو قاعدة شادة للحياة بسبب قوي فهالسبب ياسين مش غيرة ، ولو مش من وجوده رانـي مش هني قاعدة نعافر ❤️ ..

نورا نصـر / يتبع