#خفقة_قلب
الجزء السادس والعشرون
#الدعوة_إلى_الله
=بصي أنا هخليني في نفسي ومليش دعوة بحد،
ده إيه يا شيخة حرقة الدم دي😤
-لا إله إلا الله 😳
إيه يابنتي انتِ قلبتي مرة واحدة ليه كده🙃
=بصي مش طالبة استظراف خالص😑
-ماحنا لازم نلطف الجو عشان نعرف نتكلم 😅
=شغلي لك تكييف يلطفلك الجو ياختي😏
-أنا كمان رأيي نبطل استظراف وندخل في الموضوع أحسن😅
=أيوه كده 😤
-خير بقى إيه المشكلة😁
=أصحابي يابنتي بنهرج مع بعض عادي لقيتهم بقوا يغلطوا فيّ وقال إيه بيهرجوا😠
بنصحهم في الصلاة وأذكرهم بالآخرة ياخدوني تريقة 😳
ويقولولي انتِ هتعملي علينا شيخة 😏
ولّا الجماعة عندي في البيت مش بخلص منهم ومن كلامهم كل ما أنصحهم بحاجة 😱
فخلاص أخدت قرار إني هخليني في نفسي ومليش دعوة بحد أنا يادوب شايلة نفسي بالعافية أصلا😑
ومش ربنا كمان قال:
"يَا أَيُّهَا الَّذِينَ آمَنُوا عَلَيْكُمْ أَنفُسَكُمْ لَا يَضُرُّكُم مَّن ضَلَّ إِذَا اهْتَدَيْتُمْ"
فخلاص بقى كفاية كده أوي عليّ😤😤😤
-طيب بصي الأول كده خلينا نتكلم في الآية إللي انتِ قولتيها دي عشان واضح إنك فاهماها غلط 🤦♀️😅
=إزاي يعني فاهماها غلط🤔
-لأن الآية معناها إنك لازم تنصحي وبعد ما تنصحي لو إللي قصادك مستجابش خلاص يبقى هنا هتركزي على نفسك وتصلحيها،
مش إنك متنصحيش أصلا😑
وفي قاعدة مهمة جدا لازم تعرفيها👌
وهي إن وظيفتك في الدنيا هي إنك تبلغي الناس الصح مش إنك تلزميهم بيه💁♂️
لأن ربنا قال:
"فَإِنْ أَعْرَضُوا فَمَا أَرْسَلْنَاكَ عَلَيْهِمْ حَفِيظًا ۖ إِنْ عَلَيْكَ إِلَّا الْبَلَاغُ"
بمعنى إننا لما بنشوف الغلط بنقول للناس ياجماعة قال الله كذا وكذا ....قال رسوله كذا وكذا وخلاص انتهى الأمر👌
لأن "ما على الرسول إلا البلاغ"،
يعني انتِ المطلوب منك إنك توصلي إللي عندك وخلاص👌
يعني تهدي الناس هداية إرشاد ،
يعني ترشيديهم للصح😊
لكن هداية التوفيق دي بتاعة ربنا🤷♂️
يعني إللي يوفق الناس إنهم يسمعوا الكلام وينفذوه هو ربنا مش إحنا.
=أااااه😮😮
-عارفة بقى احنا مشكلتنا إيه😑
=إيه🤨
-إن إحنا عايزين لما نقول للناس النصيحة ييسبوا المنكر ولّا الغلط فورا في التوّ واللحظة 😏
ويقولوا سمعنا وأطعنا،
وإحنا ناسيين إن رسول الله ﷺ وهو رسول الله.....
قعد ١٣ سنة في مكة يدعو الناس فيها لعبادة ربنا بس ،
فاحنا لازم نصبر على الناس وندعوهم بالحسنى،
حتى لو عاملونا وحش وردوا علينا بكلام يضايقنا👌
=طيب مانا مفيش أعصاب بصراحة أستحمل حرقة الدم دي😑
-إممممم 🤔
طب خليني أسألك سؤال ...هو مين إللي محتاج مين أكتر انتِ محتاجة الدين أكتر ولا الدين إللي محتاجلك😊
=مش فاهمة🤔
-يعني الدين ده واقف عليكِ ولّا هو كده كده هيستمر سواء بيكِ ولّا من غيرك🙂
=أه طبعا مستمر سواء بيّ أو من غيري وربنا حافظه من ١٤٠٠ سنة أصلا🤔
-بالضبط كده هو ده👌
=🤨🤨
-هفهمك ..هفهمك😅
أقصد إنك إنتِ إللي محتاجة الدين ....إنتِ إللي محتاجة الأجر والثواب😊
تخيلي كده معايا إنك نصحتي حد بالصلاة مثلا وكنتِ سبب في هداية الشخص ده وإلتزامه بالصلاة،
كل صلاة هيصليها هي في ميزان حسناتك،
ولو دعا حد للصلاة وصلى برده في ميزان حسناتك،
ولو علم أبناؤه الصلاة في ميزان حسناتك،
وكل ما حد فيهم يدعو حد للصلاة أو يعلموها لحد فهو في ميزان حسناتك إلى يوم القيامة 😁
=😦😦😦😦😦😦
-إقفلي بؤك هجيبلك الدليل😅
قال رسول الله ﷺ :
"مَنْ دَعَا إِلَى هَدْيٍ كَانَ لَهُ مِنَ الْأَجْرِ مِثْلُ أُجُورِ مَنْ تَبِعَهُ لَا يَنْقُصُ ذَلِكَ مِنْ أُجُورِهِمْ شَيْئًا"
وفي حاجة كمان مهمة وهي إن من أسباب عدم استجابة ربنا للدعاء هو ترك الدعوة إلى الله👌
=نعم😳😳😳
-الدعوة إلى الله معناها إنك تدعي الناس إنهم يعملوا الخير والمعروف وتنهيهم عن فعل الغلط والمنكر صح😁
=أه🤔
-أهه ترك الأمر بالمعروف والنهي عن المنكر سبب في نزول البلاء وكمان عدم إستجابة الدعاء😊
=😐😐😐😐😐
-قبل ما تنحيلي وتدخلي فيّ شمال خليني أقولك الدليل😄
قال رسول الله ﷺ:
" وَالَّذِي نَفْسِي بِيَدِهِ لَتَأْمُرُنَّ بِالْمَعْرُوفِ، وَلَتَنْهَوُنَّ عَنِ الْمُنْكَرِ، أَوْ لَيُوشِكَنَّ اللَّهُ أَنْ يَبْعَثَ عَلَيْكُمْ عِقَابًا مِنْهُ، ثُمَّ تَدْعُونَهُ فَلَا يُسْتَجَابُ لَكُمْ"
وفي حديث تاني بيقول:
يَا أَيُّهَا النَّاسُ إِنَّ اللَّهَ عَزَّ وَجَلَّ يَقُولُ:
مُرُوا بِالْمَعْرَوفِ وْانْهَوْا عَنِ الْمُنْكَرِ مِنْ قَبْلَ أَنْ تَدْعُونِي فَلَا أُجِيبُكُمْ،
وَتَسْأَلُونِي فَلَا أُعْطِيكُم وَتَسْتَنْصِرُونِي فَلَا أَنْصُرُكُمْ"
=بعد كلامك ده أقدر أستنتج إن المستفيد الأول من الدعوة إلى الله ....هو أنا 😳😳
-إسم الله عليكِ😁
لأن الدين بيكِ أو من غيرك مستمر 😊
"وَإِن تَتَوَلَّوْا يَسْتَبْدِلْ قَوْمًا غَيْرَكُمْ ثُمَّ لَا يَكُونُوا أَمْثَالَكُم "
=أنا مش عارفة أقول إيه بصراحة😳😳
-قولي دايما اللهم استعملني ولا تستبدلني😊
ومتوقفيش الدعوة لدين ربنا مهما حصل،
متسبيش أي فرصة ممكن تجمعي بيها حسنات،
أو إن حد يهتدي بسببك، إلا واستغليها😈
قال رسول الله ﷺ :
" لَأَنْ يَهْدِي اللَّهُ بِكَ رَجُلًا وَاحِدًا خَيْرٌ لَكَ طَلَعَتْ عَلَيْهِ الشَّمْسُ أَوْ غربت"
يعني خير من الدنيا وما فيها،
وكده كده ربنا بيعطينا الأجر على الدعوة نفسها مش على النتيجة، يعني مجرد ما تأمري بالمعروف وتنهي عن المنكر أخدتي الأجر خلاص، ولو الشخص استجاب هتاخدي أجر زيادة،
ولو مستجبش وأذاكِ بكلمة أو فعل برده هتاخدي أجر الصبر على الأذى👌
=أنا حبيت الدعوة وعايزة أدعي الناس كلها حالا 😻
بس أنا معنديش العلم الكافي ...إزاي هدعي الناس وأنا معرفش حاجة 😑
-المرة الجاية إن شاء الله نتكلم عن العلم الشرعي😊
=يعني مينفعش دلوقتي😭
-لا طبعا مش هينفع الموضوع محتاج كلام كتير يا حبيبتي وكمان عشان تفكري في الكلام بتاعنا ده ولو عندك سؤال تسأليني فيه المرة الجاية💁♂️
=طيب أمري إلى الله😁
-مع السلامة❤
#Eman_Shalapy
