يوميات شباب مجانين (كاملة💖)

الحلقة 16

يوميات_شباب_مجانين 😜
#للكاتبة_رغودة_خالد 💕

لميس حست بحاجة غريبه و فجأة قعدت تعيط بهستيريا
محمد ناض مخلوع قرب منها شدها و هيا زادت من عياطها و تضرب فيه و تخبش فيه و محمد وقف يشبحلها مصدوم و هيا تضرب فيه و وسام جي يجري قامها و يقرا عليها ف قران
محمد قاعد واقف يشوف لنفس المكان الصدمة مزال مأثرة عليه
سلمة شدت لميس و تبكي ع شكلها عيونها فجأة تحلقوا بالسواد و ظوافرها مكسرات و عليهم اثار دم محمد و ترعش ف مكانها
وسام جاب مية و رشها ع وجهها و يقرا عليها ف القران لين هدت و غمضت عيونها واستسلمت ل نوووم عميق
وسام ناض و سلمة جابت بطانيه غطتها و امها تنادي فيهم من بعيد مش فاهمه شيء
وسام: محمد محمد؟
محمد مزال واقف مصدوم وجهه اصفر
وسام حط ايده ع كتفه: ماتخافش يامحمد لميس حالها كويس و توا رقدت
محمد شافله و عيونه حمر: شن صارلها
وسام هز راسه: ما نعرفش مانعرفش اللي نعرفه يا صاحبي توا تريح و انشالله ما يصير الا كل خير
محمد هز راسه و طلع ركب سيارته و ماشي ف الطريق من غير وعي الدنيا مظلمة ف عيونه خش الحوش و امه تسال فيه شن صار خش لداره و سكرها من غير رد
------------
عند لميس
وسام مقعمز و سلمة و امها قعمزت جنبهم تشوفلها متحسرة ع حالها ف الاخير هيا امها حتى كان قاسية بس تقعد في قلبها شوية حنية
لميس فتحت عيونها بشويا
سلمة قربت من منها و حط ايدها ع خدها: حبيبتي كيف حالك توا
لميس قعمزت : انا كويسة علاش شن صار؟
سلمة شبحت ل وسام بإستفهام
وسام: انتي فجاة قعدتي تعيطي و تضربي ف محمد و..
لميس: هوا محمد جي؟
سلمة قعدت تبكي
و وسام مستغرب و يشوفلها
لميس:  علاش ما قلتوليش محمد جي؟ كنت طلعتله
ام لميس ساكتة و تشبح وخلاص
ناضت لميس ل دارها و اتصلت ب محمد كان الوقت قريب المغرب
محمد: لميس حبيبتي انتي كويسة خوفتيني عليك
لميس: اي انا كويسة خيركم كلكم اليوم؟
محمد: نبي نجي نشوفك اسالي خوك وسام كان عادي
لميس ناضت سألت وسام و قال عادي
محمد جي و قعمز يراجي فيها جت لميس ناض محمد قرب منها بيسلم عليها و من غير وعي ضرباته برجلها و عيونها حمر
محمد:  ااه لميس خيرك؟
لميس قعدت تعيط:  انا منبيكششش انا ما نبيكككش مستحيل نتزوجك حول من عليااا حوووول مانبيكش
جي وسام شدها تاني و باعدها و هيا تباعد فيه بقوة رهيبة و عيونها حمر مقلوبات تاشر ع محمد : هذاااا معاش نبي نشووووفه بككككل
طلعت و محمد حط راسه بين ايديه و العرق يصب من جبهته خيرها لميس هكي تدير علاش كرهاته؟
لميس قعمزت بحدا امها و مزال الحالة عندها:  انا مستحيل ناخده مستحييل فاهمين
ام لميس:  تحسابي مالا ع كيفك مش درتي العار ع خاطره،، و شبحت ل وسام
ام لميس: وانت مش عصيتني و درت روحك فالح و رب اللي خلق هالكون كان عرسهم ما يكونش الاسبوع الجاي لما انا ندير العار
وسام:  استهدي بالله يام البنت اشبح خيرها
و شاف للميس اللي كانت زي المرة اللي فاتت غابت في نومة
حطوها ف سريرها
وسام مشي لمحمد:  اسمع يامحمد البنت مشعارف خيرها لكن مابين نشوفو شن صايرلها الافضل انكم معاش تشوفو بعض
محمد:  والله خايف عليها مفهمتش انا قبل شويا كانت تكلم فيا و قالتلي تعالى
وسام: و في حاجة ضروري تعرفها
محمد: شنو؟
وسام: عرسكم ح يكون الاسبوع الجاي
محمد: كيف الاسبوع الجاي و البنت اشبح خيرها و كيف بنوتوا كل شيء ف اسبوع
وسام هز اكتافه: هدا قرار امي و عادي مش ضروري يكون عرس كبير يوم واحد ساد
محمد وقف: انشالله يصير خير نستأدنك
روح الحوش نادى امه
ام محمد: انشالله خير؟
محمد : عرسي ح يكون الاسبوع الجاي
ام محمد: العفو وخيرك مستعجل وشن صار
محمد : عيلتها هكي يبو و انا راضي مش ضروري عرس كبير عادي نقدرو نوتو كل شيء
ام محمد : وشن انت تخطط بروحك ولا من يعلم و من يدري جيتني و حطيتني ف الصورة طول ؟
و توا شن تبيني نديرلك
محمد : خيرك يام؟
ام محمد : تي حتى بوك مايندري معقولة توا تجيني تقولي عرسي الاسبوع الجاي
محمد تعفلق : هوا عرسي ولا عرس بوي انتم وتو بس كان تبو تفرحو بيا ولا كان هذا نقرا الفاتحة و ناخدها لا عرس لا هم احرف
ام محمد طرمت: انت وليدي الوحيد معقولة ما نديرلكش عرس الله غالب صح جت فجاة لكن توا نبدأ نوتيلك
محمد باس راسها : يخليك ليا يا امي
ام محمد زغرطت و جي بو محمد قالتله و بو محمد استغرب و نفس الشيء مش راضي ع اللي داره محمد لكن لانه ولدهم الوحيد فرحوله و تمنوله الحياة السعيدة❤
_________
عند احمد مشي للاستراحة و معاش يبي يروح الحوش كاره روحه مقعمز و حواليه هلبا شيش اي اي بدي يشرب مش ينسى..
ينسى الحرام بالحرام حالته تسخف مرة يضحك و مرة يبكي وجهه مرهق من قلة النوم و تاعب من قلة الاكل
فات قريب اسبوع ع قتله لسيف
صوت برا ف الجنان و الباب انفتح بالقوة
قام راسه و شاف هلبا رجالة واقفين و كانت الشرطة💔
قاموه و هوا سكران و يضحك و جزء منهم بدي يحفر ف الاستراحة يدورو ف سيف
احمد بصوت عالي : ما تتعبوووش روووحكم اوووني غادددي دفنتتته هههههههه . و يأشر بأيده ع مكان سيف
دفوه و حطوه ف السيارة و رفعوه للحبس طول لان خلاص هوا اعترف و ما فيش مجال للشك و سيف لقوه مدفون و شيش الخمر ف الاستراحة💔
و هني ثبتت ع احمد جريمتين "قتل" و "تعاطي الممنوعات"
و حكموا عليه ب 10سنين سجن 💔
اعادة لاحداث فاتت
رندة تبكي ف دارها : كيييف درت هكي يا احمد كيف قتلت لالالالا مستحيل هذا كله بسببي انا انا ناضت لبست عبايتها و وشاحها خدت تاكسي و مشت لمقر الشرطة
رندة : انا نبي نسلم نفسي لان انا و خوي سبب في قتل شخص
الشرطي : كيف احكيلي كل شيء بالتفصيل
رندة حكتله كل شيء و قالتله ع مكان احمد 💔
رندة بعد التحقيق طلع عكس ما هيا تخيلت لان هيا ما ليهاش علاقة في قصة القتل و روحت ل حوشها فتشو غرفة سيف و حق طلع خانب الذهب و ردوه لأم احمد لكن توا شن ينفع الذهب بعد ما بنتها ماتت و ولدها انحبس💔
و هني قصة احمد بتوقف لمدة 10سنين
طبعا وسام و محمد عرفوا و زعلوا ع صاحبهم لكن ما يقدروا يديروا شيء و بيضطروا يعيشوا حياتهم طبيعي لين ربي يفرج عليه
________
طبعا نسيت نقوللكم ع وسام و رزان ❤
وسام عرف كيف ياخد عقل رزان اللي حتى و هيا تحبه مزال تعاند و تكابر لكن واضح الحب من عيونها و وسام هابل فيها و يشوف فيها هيا و بس💕
________
عند محمد 💕
اليوم عرسه هوا و لميس ليهم أسبوع معاش شافوا بعض و لميس حالها كووويس بكل و الاسبوع كله تطلع و تشري ف الحوايج و ترتب
محمد نفس شيء اجر شقة مؤقتا ما بين يكمل حوشه و حجز اول ليلة ليهم ف الفندق
لميس توا طالعة من المزين بالفيلو طالع بسم الله مشاء الله❤❤زي الملكات ميك اب حلو بارز ملامحها و فيلو يجنن زايدها جمال و تاج مرصع تبارك الله❤ وركبت مع وسام اللي كان فرحان و لابس بدلة رسمية كان يكلم في رزان و لما جت لميس سكر 🤤💕 وصلها للصالة خشت ل غرفة العرايس و تدكرت كيف كان عرسها قبل مع رجب و كيف هربت و ضحكت جتها امها بالكرسي المتحرك وراها سلمة سلمت عليهم مع دموع و انزفت ع احلى اغاني و ناس تباركلها و عيون الحساد في كل مكان و عيون الشماتة واللي تقول " اهي هربت من راجلها الاول و تزوجت تاني " و اللي تقول " ياسعدها لبست الابيض مرتين "
و هلبا كلام حطو العشي و طبعا محمد ما باش يخش بكل و سكر راسه كان لابس بدلة رسمية بلاك🖤و طالع شخصية طول و عرض🤤🔥و مساوي هدوكم الشعيرات و اللحية مساوية و ريحة عطره تذوب🤤💕 و طبعا عيلة محمد داروا دخول كبير في حوشهم
طلعت لميس بالكاب متعها بعد ما حضنت امها و اختها و قعمزت ف السيارة ساعدها وسام تدخل الفيلو الكبير و محمد طلع بالسيارة وراه سيارات صخابه و العيلة و التبييب و التنوير
لميس حست بحد يخنق فيها و رجعتلها الحالة هجمت ع محمد و هوا يسوق و تضرب فيه و تعيط : طلعني من السياااارة طلعنننني ما نبيكش
محمد فقد السيطرة و معاش يشوف في الطريق لميس بالفيلو فوقه و تضرب فيه و تخبش
السيارة لفت و جت ف الاتجاه المعاكس💔و حت سيارة كبيرة خبطت فيهم خبطة قوية من جهة لميس💔
تنطرت السيارة بعيد و الدنيا دوشة و عياط النساوين و سيارات الاسعاف
و فالسيارة لميس مغمى عليها و الفيلو اللي معبي دم و محمد فاقد الوعي 💔
طلعوهم و رفعوهم للمستشفى
محمد حاله كويس لان الضربه جت من جهة لميس مجرد كسر ف اليد و شوية كدمات و جروح
اما لميس كانت تصارع ف الموت في حجرة العمليات 💔نزفت هلبا دم و حالتها خطيرة
محمد ناض و يدور ف المستشفى يصيح بأسم لميس زي المجنوون
وسام و الممرضين شدوه و هوا دموعه ف عيونه
وسام : انشالله حالها باهي انشالله
محمد : وينها لميس يا وسام شن صارلها قولي
وسام: توا في حجرة العمليات انشالله تنوض بخير
محمد دموعه ينزلو و قلبه ينخص فيه و محررروق🔥
المستشفى فيها هلبا ناس من عيلة محمد و لميس واقفين يراجو ف الدكتور يطلع
بعد ساعتين طلع الدكتور
محمد ناض : طمني يا دكتور كيف حالها؟
الدكتور: ....يتبع...