ابناء السادة

البداية

السلام عليكم

اريد اوضح شغله وانززلكم مشاهد للحماس

سيد فرج ما اسمه فرج..اسمه سراج واني صار عندي خطأ بالأسم اعتذر بعد لا تكولون فرج 😁 سررراج يابه خوووش

وهاي مشاهد لكفتهن للحماس 😍

مشهد.....1

الي كاله اليه سراج خلاني واكفة مذهولة..ماعرف شكول..دموعي ظلت تنزل بقهر..صارت بجيتي بصوت...

زين وين اروح وين انطي وجهي ماعندي احد..اذا ارجع لبيت ابوي يكتلني بلا رحمة ومرت ابوي الظالمة...

بقيت ابجي شكثر كمت مسحت دموعي..فتحت الكنتور اجمع ملابسي..تذكرت هاي الملابس كلهن هو جابهن...

ظليت انحب بقهري..وحبي لنعيم الي ماراح ينتهي ولا راح يتغير..حبيته بكل مابيه من قوة..حبيته على اخلاقه ومواقفه وياي...

تالي يطلعله ماضي ماعرفه..وانه مجرد مرة غريبة نايمة بغرفته..وبالليل يلعن الشيطان مليون مرة حتى لايغلط ويقربلها...

اخذت جم غرض حطيتهن بالجنطة كلت خلي اطلع قبل مايجي نعيم ويمنعني اطلع..اعرف من يعصب ياهو يصير كدامه...

اكيد مراح يقبل اروح مكان وراح يمنعني اطلع واعوفه هسة بعد كل هالكذب...

كلت خلي اخلصه من البنية الي ابتله بحملها واضطر يجذب على اهله ويكول انه مرته حتى يحميني من اهلي واهله وحجي الناس...

امسح بدموعي وترجع اطيح..ظليت احاجي نفسي..ونظرات الي اشوفها كل يوم نعيم شنو جانت شفقة لو شك..لو تباوعلي كفريسة سهلة تكدر تاخذ منها الي تريده بوقت ماتريد...

من اتذكر نظراته اموت حسرة وقهر ابجي بحركة قلب..اه يا اهلي الضيعوني وباعوني برخيص..اه ياظلم الظالمين...

يمكن جانت نظرات شفقة لا اكثر..وانه الغبية تأملت بحبه وحبيته وعشكته بكل مابيه من مشاعر وبكل مابيه من ضيم وتعب...

بحبه تأملت بحياة كريمة تنسيني ألمي..تأملت ابدي بشي جديد بحياتي انسه الراح..اتأملت يحبني ونعيش سويه بالحلال تحت سقف واحد...شوفته كل يوم تنسيني كلشي..

دست على قلبي..وشلت مابقه من كرامتي..لبست عبايتي اخذت جنطتي..طلعت من الغرفة..حتى التلفون تركته هناك بالغرفة لأن هو اخذه اليه..وماريده يلكاني منه...

مشيت سريع اطلع حتى مايشوفني احد..وقبل لا يجي هو..بس سمعت صوت عمتي انخمش كلبي رهبة وخوف...

:-ريتال وين رايحة يمه وياج جنطتج

ارتبكت كلش:عمه رايحة ويه نعيم هو ينتظرني بره هو يكلج..متت خوف من الجذبه..كلت هسة يدخل هو..خلي اشرد...

طلعت من باب الهول واشوفه كبالي..طاحت الجنطة مني..ظلت تتراكع اسناني من الخوف رغم حبي اله اخاف منه..نعيم شخص جدي مومال حجي فارغ لو تعبر عليه اشياء بسهولة...