وضاح

الفصل الرابع عشر

قصة وضاح

الفصل الرابع عشر
الكاتبة Jawhara

*******
مريم
نزلت من غرفتي اتسحب على كيفي الساعه ١٢ الكل نايمين حسيت بروحي  اريد اتطمن على وضاح بس استحي لان احمد نايم ويا بالغرفة  دخلت راسي الغرفه ظلمه بس ضوا من الصاله  اثنينهم نايمين
والله استحي ادخل شيكولون  اذا حسو علية
بقيت واكفه ما اعرف شسوي اخر شي رجعت

بالغرفة جان احمد مانايم بعده حس عليها بس غلس اصلا تفاجأ من لمحها يدري بيها متريد وضاح ومتحاول تتقربله بداخله يتمنى مريم تتغير وتحب اخو لان يعرف وضاح يحبها

مريم ..
رجعت لغرفتها وراحت مددت عالفراش وعينها بالسكف تفكر بتصرفات وضاح وياها
ماحست الا الصبح على صوت عمتها تكعدها
كعدت لمت شعرها وصبحت على عمتها
عافتها ام وضاح ونزلت وهي توصيها تستعجل لان اليوم كعدة راح يجون شيوخ وزلم عشيرة الولد الصاوب وضاح 
راحت توضت وصلت بعدها بدلت بدشداشة مرتبه لونها تفاحي ولفت شالها ونزلت لكتهم كاعدين يتريكون بالمطبخ سلمت وراحت طلعت كوب صبت لروحها جاي
عمتها صاحتها من شافتها طلعت وبيدها الكوب ..

_ وين تعاي هينة تريكي
استحت منهم ..
_ها ما اشتهي
_شنهو ماتشتهين تعاي اكعدي هاج هذا جبن واكعدي هينة عالميز يم رجلج
وضاح كاعد يتريك لان ميكدر يكعد عالكاع بصعوبة يكوم
اشرلها عمها الجان مرتجي عالمخده بعدما خلص ريوك ..

_يبه تريكي ليش تستحين
بلعت ريك وكعدت بصف وضاح الجان ملتهي يتريك بس منتبه عليها بدون ميحسسهم بهالشي
خلة ماعون مخلمه جدامها وناوشها خبز بدون ميحجي كمل وبقى يشرب جاي
التفت على امه تحجي ويه ابوه ..

_سودة عليه عبالي افرح بعرسهم واسويلهم السبعه تالي سبعتهم صارت كعدت فصل

ابو وضاح  استعدل بكعدته ..
_يامرة البارحه حجينا بهاي السالفه وكتلج من نفض الكعدة ادللي بالتردينه جم نوف انه عندي
خلت ايدها على حلكها مستحيه من ولدها والبسمه مرسومه بوجهها
احمد ضحك ..
_ههههه ها حجي ماسولفتلنه البارحه لازم سويتو وكاحه
مد ايده ومسح لحية ابوه وباسها
_ اروح سبع فدوات لابو وضاح يسوي حركات وكذا هو ونوف
ابتسم ابوه وعدل شعره بيده متعلم على شقى وسوالف احمد وبيناتهم علاقة قوية اكثر من اب وابنه ..
_امك كوية وراس يابس راح اطكها بمرة حتى
اطخي ، بعدين لاتشعل فتيلها وتروح وتخلي امك اسبوع رافعه خشمها صدك اليوم تلتحق

_العصر ورا ماتفض الكعده
شهكت ام وضاح ..
_ ياااا هذي جزاتي ي ناصر روح تزوج شوف منهو تقبل تصير ضرتي والله لاخليها عبرة لكل الوادم
_له له ينوف مادريت بيج جنت احسب تفرحين اعرس
هزت راسها ..
_هااا تعرس عجل خل ولدك يعرسون هذا ابو فهد صارله سنتين من تعين ضابط مستحق زواج
احمد معترض ..
_يمممه رحمه لأبوج ذاك الرجال الطيب انه عوفيني واجلي مشروعج .وأشر على ابوه وهو يضحك خل نلتهي بزواج ابوي يلة يابه منهي تريد خاطر نمشيلك عليها
زكحت بأحمد ..
_يول اهجع لاتخلي جنوني تطلع عليك
وانت ناصر لاتحرك كلبي تدري بيه ماحب هالشقى هذا
وضاح يضحك على كيفه وعينه عليهم يتناكرون جان يغمز لمريم دنكت متعجبه على سوالفهم صح تراجعهم هي وامها بس مايوم شايفه عمها هيج يحجي هو ولده وعمتها نوفة
حبت علاقتهم وشكد حلو يحترمها ويموت عليها ابد ميزعلها وهي تستاهل هذا الحب والتقدير مرة معدله وحلوة كولش ومرتبه حقه يحبها حتى ولدها يتخبلون عليها ويقدسونها تنهدت ورفعت عينها لوضاح الكام يغسل
سمعت عمها يقنع بمرته ويكلها يمزح مايفكر بغيرها مرة
طلعت ورا وضاح لكته يغسل عالمغسله يم الصحيات
بنهايه الصاله انطته خاولي نشف ايديه وشمره على جتفها غمزلها ..
_تعاي للغرفه انطيني العلاج
تمشى على كيفه وهي علكت الخاولي وراحت وراه
دخلت وراحت عدلت فراشه رتبت الجربايه ورجعت رتبت جربايه احمد
تقربت واخذت العلاج انطته كم حبايه اخذها وشرب مي
كعد على كيفه واشرلها ..
_سدي الباب وتعاي
بقت صافنه عليه ..
_شبيج روحي اقفلي الباب
ارتبكت  واستحت ..
_هاا مو عيب خاف احمد يجي وو ..
قاطعها بحده ..
_روحي لاتبقين تمتمتين شبيج
قفلت الباب ورجعت وكفت يم الجربايه تفرك بيديها
حك خشمه ودحك عليها ..
_تالي وياج ليش هيج تتصرفين ليش كلما اريد اقربج تبتعدين ...
رفعت راسها وشافت عيونه كارصهن ورافع تك حاجب
وبكل برود ردت ..
_لان مجاي تفهم علية........ اصلا هي توها بدت تحاول تتعود عليه .. شتريد وضاح
_هه شريد له له كثر الله خيرج خاف صارت زحمه
تنهد وجر حصرة وذبها ..
_تدرين كلبتي مزاجي بكلمتج هاي روحي من وجهي كلشي ماريد
عضت شفتها ..
_ردت العلاج راح اجيبه  هذا هو
واشرت عالكومدي موجودة علبه الادويه
هز راسه وضرب جف بجف ..
_خرب حظي هذا الفهمتي امشي اطلعي من الغرفة لا اجرم بيج
ضاجت من كلامه ..
_ اوووي شسويلك عجل
جر فكها وعصره بيده لان حيل انقهر بداخله من برودها وياه
عورها بلزمته عاطت بي أذاها فعلاا بس ماهدها ..
_جاي تتعمدين هاي التصرفات انصحج عوفيها
هدها وكعد عالجربايه مدد واشرلها بيده تطلع
وهو حيل مقهور لان جان يريد يكعد وياها يسولف جان مشتاك يلثم خدها المورد وشفايفها الترفات
تنهد وغمض عينه يدري راح اتعبه