رانيا و ريان🖤حب رغم المشاكل 😍🦄❣( باللهجة الجزائرية )

فرحة لا توصف🌈💝

المهم فطرنا و وولينا للدار و أنا كنت فرحانة يعني بعد يومين راح نتخطب و من شكون ريااااااااان! لي حبيتو من لي كنا صغار! لي كان صديق طفولة و حبنا بريء و جامي درت معاه حاجة ندمت عليها حمد لله! لي كان بالنسبة ليا سندي الوحيد فالدنيا من لي كنا صغار! لي يغير عليا من أتفه الأسباب هههخخ! لي بغاني مرتو و أم ولادو بعد يومين راح يخطبني! شكون قال راح يجمعنا الحلال و حنا لي كي كنا صغار موالفين نتدابزو ساعات نلعبو ساعات ندير مقالب و ليبيتيز ساعات ههههه. و بعد يومين راح يخطبني ! وفا بوعدو  ملي حبني كان يقولي من لي كنا صغار كي تجيبي الباك نخطبك، صح كبير عليا بعامين مي حمد لله عاقل و ماتمسخرش بيا، بالاك راكم مشوكيين علاش راني نهدر هكا و لا علاش راني قاعدة على البنك و نخمم هكا، باغسكو نتوما تعرفو غير شخصيتي المرحة و التمهبيل و التمسخير، هكا تعرفو رانيا، مي لي جزت بيه حتمني نسيي نولي قاوية و فالصح أنا نحب الهدوء و نخمم بزاف علابيها جامي ندمت لحبي ليه. قاعدة على البنك نكتب فالفايسبوك هاد المنشور و طاغيت فيه كامل صحاباتي  و جيراني و بيانسور ريان ماجازتش نصف ساعة و البوست لقيت دارولي مية جادور و لي كومونتار لي تبارك و لي تضحك و لي تغير و لي تفكرني فيامات صغري أنا و ريان ههههه، بصح ريان كتبلي تعليق ماتوقعتوش! .
ريان يحكي:
قاعد نكونكتي و ندور فالفايسبوك حتى نلقى بوست نتاع رانيا كتبت فيه كامل أحسيسها و تجربة حبها معايا فرحت بزاف مي يغيت نزعفها هههه: و شحال جريت وراك نسيتي ياالدابة هههه نحبك اجدك. جاوبتني و قاتلي ههه اوبليجي تجري انا تاني نحبك، المهم بقينا نهدرو حتى رقدت خاطر كنت عيان بزاف يوم كامل و أنا من حانوت لخوه هههه.
نور تحكي : حب من أول نظرة، بلاك نقوللكم ماتأمنونيش نحب هشام أنا نعرفو من لي كنا فالبريمار ههه  و فالسيام ماقراش معايا أما الليسي كيفكيف بصح للافاك راح نقراو كيفكيف هكا قالي. دوموندا النيميرو مديتهولي و الفايس تاني و رانا نهدرو الصراحة عقليتو عجباتني بزاف و مسكين هو يتيم ماعندوش باباه مات كي كان في عمرو عامين شحال يغيظني و حكالي بزاف على حياتو و رانا نڨصرو واقيل بديت نحبو ههههخ.
هشام يحكي: الطفلة تهببل اجدك نعرفها عندي شحال مي الله غالب ماقرينا ني الليسي ني السيام كيفكيف غير البريمار علابيها مانعرفوش بعضانا بيان المهم أنا تاني واقيل بديت نحبها ههههه طحت على راسي.
لينا تحكي : je sais bien que  راكم تقولو كيفاش رحت و راني en france بون دوكا راني  en couple مع الياس je sais pas كيفاش حبيتو مع الوقت mais bon  دوكا راني  fiancée معاه و هو نسا رانيا و أنا نسيت ريان ماكانش حب حقيقي كنت برك نغار من رانيا باغسكو شابة بزاف et elle avait un boy friend عكسي أنا و على سيرة الياس نحبو بزاف و نموت عليه الحق الحق راني نعيش معاه فدار وحدة ففرنسا باغسكو جا تاني معايا و دينا la permission  من والدينا و قبلو نعيشو اونسومبل باغسكو رانا un couple en plus fiancée  دونك عادي( هههه ياختي عندنا ماشي عادي 😂😂يعني واش تستناو من ڨاورية لي بغات تفرق بين كوبل خاطر قتلها الجفاف العاطفي خخخخ ) و قرايتي راني نكمل فيها يعني  l'année prochaineنقرا فلافاك باغسكو جبت الباك .
الياس يحكي: كيما علابالكم خلاص راني ففرنسا و نحب لينا و رانيا نسيتها علابالي راكم تقولو كيفاش نسيتها و كامل، واحد انا ماحبيتهاش كنت باغي نتمسخر و نجوز الوقت بيها هدا مكان( اممم هادا مكان دوك نجيب البالي للراس و قولي هدا مكان يخي جايح يخي)اما مع لينا عرفت معنى الحب.
بون علابالي ماراكمش فاهمين كيفاش الياس وصل لفرنسا و لينا تاني و حبو بعضاهم و كامل بون هدا ماهوش مسلسل هندي باش مانفهملكمش و نخرط برك لا بالعكس شوفو لينا استسلمت كي كانت تبعث لرانيا ليميساج على ريان و كامل باغسكو شافت بلي راهي دير. هكا بوريان و الياس كيفكيف دونك دارو خطة يروحو لفرنسا و يكملو الخطة تماك و هي انو يخطفو رانيا و ريان و يجيبوهم لفرنسا ويفرقوهم مابيناتهم و كامل( ماحاش نحكيلكم بالتفصيل خاطر خطتهم مانجحتش خخخخ شح مح )مي مع الوقت حبو بعضاهم و عترفو لبعضاهم و ولاو اونكوبل و الياس خطب لينا بالطريقة التقليدية تاعهم يعني حوست جابو الباك والدين الياس جاو لفرنسا و دارو خطبة عادية بزاف   و دوكا راهوم يسكنو في دار وحدة و بعد شهر راح يتزوجو و يكملو قرايتهم عادي.
المهم نرجعو لأحداث القصة :
بعد يومين :
نضت الصباح بسيف باش رفدت روحي من الفراش غسلت و جات نور ماكياتلي و لبست الغوب ديالي اومبعد رحت للحفافة جبدتلي شعري ليس جيت تحفة ههههه.
نور : لالة مولاتي علاش راكي ترجفي خطبة برك ابنتي!
رانيا : اللولة مانيش بنتك، الزاوجة يما راهي تبكي ياغسكو فرحت علابيها و تاني علاباليش علاش راني نرجف خايفة و كامل المهم كي تجي دالتك مع السي شباب تاعك تشوفي....
نور : امممم باينة بصح علاش بنات خوالك راهوم زعفانات؟
رانيا : ماتكوفيش روحك ياك تعرفيهم يغيرو مازالهم بايرات...
نور : ههه و بنات عمك علاش ماكيش تهدري معاهم.
رانيا :لعام لي فات كي. راحت  بنت خالي  سعيدة الواهرانية لفرنسا ( هدا هو اسمها لي نعيطولها بيه)زعفو عليا علاش ماجيتش نبات معاهم فالليل كي تلاقاو كامل باغسكو الليل كانو راقدات فالدار القديمة تاع الريف و أنا مارحتش عندهم رقدت عند سعيدة الوهرانية باش نشبع منها قبل ماتروح هههخ حشيتهالهم علابيها مايهدروش معايا و هوما متكبرات علابيها تاني يديرو فالحبة قبة .
نور: ههههههه الحشوة تاع الصح .
رانيا : دوك يجيو الخطابة راني خايفة.
نور : اهههه راهوم جاو ماتنسايش رانا فحومة وحدة ( و نتوما ماتنساوش خخخخخ)
المهم كي وصلو دخلو للصالون. و بقاو يهدرو اومبعد عيطو لرانيا باش تجي و كي دخلت بسنيوة القهوة و الڨاطو سلمت على بابات ريان( علي)و يماه( عجوزتها صفية. )و ختو منال( مخطوبة عندها عام و بعد ثلاث شهور رايحة تتزوج تسما ماتطمعوش بزاف و الا بغيتو تخطبو لخوكم و لا ولد جاركم مازال غير سعيدة الوهرانية بايرة و عندها كواغط تاع فرنسا للاتصال هاوليك النوميرو 456231679 خخخخ)سرباتلهم القهوة و بقاو يهدرو شوية حتى دخلو فالموضوع( مايتعارفوش خاطر كيما قلتلكم جيران من نفس الحومة و يعرفو بعضاتهم بيان فهمتو ولا نجيب البالة خخخ )
بابات ريان : ليوم جيناكم بالحسب و النسب نخطبو بنتكم رانيا لوليدنا ريان راكم قابلين ؟
رانيا: قابلة
ريان :قابل
و بداو يزغرتو و كامل المهم دارو حالة تقول عرس  و العرس تفاهمو عليه بعد ثلاث سنوات صح بزاف مي الله غالبزمازالنا صغار مانيش قادرة نتحمل مسؤولية تاع الزواج ف 18سنة الزواج ماشي لعبة( وولاد الناس ماشي لعبة اكم فاهمين ههههه 😂😂😂😂) المهم جازو هادوك اليامات توب، فرحة الباك و فرحة الخطوبة مالڨري العرس مازال بزاف مي لازم علينا نصبرو🤣🤣 و تاني عقدنا و فتحنا و توجور التيليفون بيناتنا و نڨصرو و كامل أما نور فتعرفت كتر على هشام و اعترفو لبعضاهم و بعد شهر راح يخطبها هههه ياخي شاموتية ياخي ناڥيڨات الراجل فخطوبة صاحبتها مليحة هادي والله المخلوقة تاع نور واعرة اجدك.... يتيع.
___________________________________________
سلام البنات هههه ياالبايرات كيراكم؟ كان تشوفو شحال راني فرحانة علاش؟ خطبت رانيا و ريان هههههه علابالي مهبولة مي الله غالب المهم مساكين غاضوني راح نخليوهم يتحرقو على الزواج ههخه، ڨولولي أسكو عجباتكم الكرونيك لحد الآن باغسكو مابقالهاش بززاف و تخلاص اهئ أهئ يعني باربي ثلاثة و لا ربعة بارتات و نديرو التوديع، علابيها جمجمو الدعوة يالبنات باش نكمل رواية الفتاة الباردة تاني لازم نلقى تفاعل  خاطر عندي سوربرايز ليكم! راح تلقاوها فكتابي لي سميتو Ryma' world يعني هدرت على كامل الون شوت و ابروايات و الكرونيكات لي راني نكتب و نوجد فيهم روحو شوفو و تفاعلو تماك تاني بلييييييز.
Vote +comment+tag for your friend= new part 😍😉🙃