🌹🔥الورود_المحترقة🔥🌹

16

.#الحلقة_16:
ميليسا قعدت مخلوعة هذي نهال تبدلت هاك وش صرالها لهذي الدرجة قدرو يبدلوها ويغيرولها تفكيرها ...لهذي الدرجة تعمات !!
بزوج لبسات شراوها ...يارب واستر خايفة لا تضيع الطفلة ..
نهال خرجت مفاقتش كانت بلا خمار بقات دور فالبافيو مقلقة يديها في جيوب البيجامة ...ضايق خاطرها قلقت من كلام ميليسا
بقات تقول في خاطرها
نهال: بففف مفهمتش واش فيها كي مدولي زوج لبسات ..!!؟ خي طفلة كيش دايرة هذي كامل غيرة !!!
زعما حبيبتي وصحبتي !!
بقات تمشي ودور لبنات في شنابرهم وكاين لي كانو برا ..
سمعت الغنا والضحك حبست ...بنات كانو يشطحو وشاقين الباب ..
حبست تسمع فيهم يضحكو ويصفقو ويغنو ..تفكرت دارهم مرة كانت تشطح هاك هي وبنات عمها يطبلو ويغنو جا باباها سبهم وقريب ضربهم ..تنهدت .
نهال:انا علاه منعيش هاك وحارمة روحي !!  كيما قالت بثينة صغيرة وغامة روحي ...واش فيها ياك بنات برك ومانيش ندير في حاجة عيب ..وزيد دارنا ماهمش هنا ..واخرتي نرجع عندهم وننسجن...
تبسمت سقمت روحها حست روحها قوية حست نهال جديدة في داخلها غير نهال القديمة .
قربعت فالباب عندهم ..وتبسمت
نهال : معليش ندخل ؟؟
قالولها ادخلي مرحبا بيك..
لقاتهم حاطين الڨازوز والجو ويشطحو ..
قعدت شوف فيهم وهو ما يشطحو ويزغرتو ويضحكو ..نسات روحها ...قعدت معاهم ..مفاقتش حتى لقات روحها تزغرت منبعد ناضت تشطح معاهم وتغني معاهم
..
شوفي بنتك مدارت فيا ..
قينيني يالميزيرية
ضلي بالسورنغ تبيكي
الماتريال والتيكي وخوك مريووول ..
  .
يوووووووووويييييييييي
زهات نهال بردت قلبها طاح اليل وميليسا تستنا فيها عند التاقة
ميليسا : وين راحت الطفلة هذي ....تلبفونها وخلاتو هنا يتشارجا ...ااه يا ربي نروح نحوس عليها وخلاص ..
..
هبطت ميليسا تحوس عليها فالظلمة هذيك برا تمشي وتحوس بلاك راحت للريسطو خاطر مجاتش تتعشى ..
بقات دور فالفوايي بارتو ملقاتهاش..والمشكل معندهاش صحابات من غيرها ..
في طريقها تلاقات مع اجو هبطت عينيها ومشاات محبتش شوف فيه ..
طلعت تزرب للبافيو خايفة منو ...سمعت لغنا الفوق. .
ميليسا : زعما تكون هنا ..
طلعت لقتتها ثم. ..تبسمت حست براحة ...نسات واش صار وتبسمت كي عادتها
ميليسا : راكي هنا يالبقرة وانا قلبت عليك لاسيتي .
نهال: ايه هنا كنت زاااهية بردت قلبي ..معندي منقولك..
ميليسا: مليح بصحتك ..خليتيني وحدي فالشومبرا خفت...مكنتش عارفاتك هنا .
نهال: امم هيا نخليكم لبنات نعاودوها مرة وحدوخرا ..
قولولها نشالله..
هبطت ميليسا ونهال معاها دندن ..
ميليسا :خرجتي هاك بلا خمار؟؟
نهال : مكان حتى واحد زيد من بافيو لبافيو مش بزاف ولداخل غير لبنات. .
ميليسا : كاين اجو هنا هذا وين شفتو قبل منطلع .
نهال: اوووه خليني منو .
ميليسا : بعقلك نتي شبيك هبلتي ؟؟ قتلك راهو برا !!!
اصبري هنا نروح نجيبلك مالشومبرة ونرجع.
نهال: ميليسا بركا ي متجياحي قلتك نجوز بلخف.
ميليسا : مراكيش عاجبتني نهال..واش صرالك ؟؟! تبدلتي .
نهال: وي فقت بلي انا مكنتش عايشة ..هنا لبنات عايشين مش كيفنا حنا فالدشرة ...
ميليسا : بصح ..
نهال قاطعتها ؛ بصح واش ؟؟ بصح وااش
تهدر والدموع في عينيها : انا بابا ودارنا مش كيما داركم !! حنا تهدري يقولك اسكتي ..تضحكي اسكتي ..اذا شطحت خلات الدنيا ..لا لبسة كي الناس لا واالو...عدت نحشم بلبستي قدام البنات ..مدولي شوية حسدتيني عليهم...نتي مسمعتيش كلمة شوفو ديما جي بحجاب واحد ...نتي مسمعتيش كلمة بابوشها قديم ...خمارها مش شباب ..بنت الدشرة الحابسة ...نتي مقالولكش نتي علاه قديمة هاك تقولي متقراي فاللافاك !!!..انا مكنتش عايشة وحابة نعيش ميليسا خليني كرهت كرهت كرهت ...اقتلوني خير وريحو تهنيت من دارنا خلقتي نتي اوووف