هنّ أضعف خلق الله أركانا

الفصل الثاني عشر

بقلمي :  Jawhara

*******
بارت طويل لعيونكم ،💞💞💞

اتفقنا العرس أبيت عمو ابو حارث لأن عازمين ناس وعمو مايحب سالفة القاعة يكول بالبيت اقلها نقدم للناس اكل ميفشل بعد هذا رأيه حارث ما عانده ساكت خلاه على راحته يخطط للعرس
واني هم ما حجيت عيب اجادله استحي الصراحه اني ميفرق عندي إذا قاعه أو بيت تفكيري كله بليلة العرس خايفه من حارث لأن سكوته ميطمن مجاي اصدك غض النظر عن سالفة وجودي بالعمارة
رهف جابها صكير قبل الحنه بيومين مدري شعجب لأن يادوب يجون ونفس اليوم يرجعون اني ابد ما اطلع اسلم عليه محتقرته كلش ماما كم مرة حجت وياي وضاجت بس نفسي متتقبله يمكن اذا اكعد وياهم افتعل مشكله حتى اتعارك وياه
رهف قليل كلامي وياها مو مثل قبل رغم ساحلة روحها حتى ارضى عليها
من تجي تبقى تفتر بالبيت تعدل وترتب هه صايرة ام بيت هيج الرجال يسوي مرة

بهاليومين رحت صالون سويت تنظيف وهم عناية بالبشرة وترتيبات وكذا خابرتني هالة وفرح إذا محتاجه شي كتلهن لا كولشي ممحتاجه وفرح كالت تجي حتى نروح نختار البدلة واتفقنا على هالشي

اني معتمدة على روحي بكولشي الصراحه ماعندي صديقات مقربات مجرد زميلات بالوظيفه جانت عندي بنيه صديقتي بالكليه بس تزوجت وانتقلت لغير محافظه وبعد انقطعت اخبارها وعلاقتي ابنات عمامي زينة بس مو لدرجه صديقات
حارث هاليومين ما متصل اصلا من اخر اتصال بعد إصابته ما عاودها ادري بي متعمد هالشي قصده اني مو بحالج والله عليه سوالف شكد شايف روحه
طلعت من غرفتي الي فعلا غرفة عروس بترتيبها والشغلات البيها رغم الغرفة الي أبيت عمو أكثر فخامه منها بس اني عجبتني بساطتها والترتيب يمكن لان بيدي رتبت كولشي
جانت عمة سهيلة موجودة وياها حارث سلمت عليهم بوستها وكعدت بصفها
حاولت ما ادحك عليه كاعد يسولف هو ورهف
عمتي حرجتني.. ماتسلمين على رجلج
هو عينه علية جان كاعد نافخ روحه وبايع بوزه
عيني اجت بعينه ..شلونك
_تمام
ورجع التفت لرهف يسألها عالامتحانات والنتائج
_الجنطه بالمطبخ بيها ملابس حارث تعاي خل نعلكهن ماجابهن كلهن
كمت وية عمة سهيله دخلت الجنطه للغرفة
فززتني من كامت تهلهل بقيت صافنة عليها
دخلو للغرفة من سمعو الهلاهل
والله عدها سوالف يلة فرحانة بأبنها الي دخل وبقى يتفرج راح كعد عالجرباية وامي كعدت بصفه
رهف وعمة سهيله اخذت الحنطه وبدن يعلكن بملابسه واني واكفه اراقبهن
مو هواي ملابس بدلة عسكريه وحدة وكم قميص على بنطرون وسترة جلد وعطر
سدت الكنتور وتلمسته بيدها ..زينه حلوة بالخير والتمام أن شاء الله
_الله يسلمج عمة
_الله يتمم أن شاء الله صدك ترى مثل ما تردين الذهب بيوم الحنه يلبسج
_ان شاء الله

_اكلج رحتي صالون بعدج حتى حارث يوديج

شنو هالاحراج كولشي تسولفه كدامه
_اي البارحه رحت
_لعد شعرج ليش ماصبغتي
_ماحب الصبغ خلي على لونه الاسود
_ها براحتج لعد
عفتهم وطلعت للمطبخ اريد اسوي الغدا اكيد باقين
طلعت دجاجه من المجمده خليتها بجدريه ومي عالطباخ حتى تفك
راح اسوي دجاج بالخضار وياه تمن واكلي كباب طاوة عندي عجينه مال البارحه وخضرة
وطرشي
وكفت بالمطبخ اقطع البتيته والفلفل والبصل حتى اضيفهم للدجاج
دخل حارث واجى وكف بصفي فزيت من ضربني بيده على خلفيتي رفعت السجين بوجهه واني ضايجه من تصرفه .. شنو هالتصرف هذا
_لا بلة وانتي شنو هاللبس هذا جسمج مكسم بالتراكسود خو الط... بارز و..
_هييي سالمين ترى بيتي وماخذة راحتي وماعدنا أحد غريب
_ورجل رهف مو غريب
_خل يولي اصلا ما اسلم ولا اطلع عليه
عكد حاجبه يريد يعرف..ليش نسيبكم هذا
_بكيفي مايعجبني
_ها خوش لعد خل اذكرج من تجين يمنا بالبيت ماكو هيج لبس ثياب وخلص
_اي اكيد شنو شايفني ما اخجل من اخوتك
_ نزلي السجينه صايرة شريرة
رجعت اقطع بالبتيته وهو راح كعد عالكرسي اني ارتبكت لأن عيونه علية
شلت الجدر ذبيته بالسنك وفتحت ألمي عالدجاجه وكمت اقطعها
كملتها وخليتها بتبسي جبير تيفال وياها المواد القطعتها والبهارات والاضافات الباقيه وخليتها عالطباخ
وحظرت الطاوة حتى اكلي الكباب