I Found My Prince Charming(Season 2)

Ep-18

Unicode Version

ဇေယျတုအဖို့တော့ရဲရင့်တစ်ယောက်ကလွဲလျှင်ဤကိစ္စအတွက် အခြားသတိရစရာလူမရှိသလောက်နီးပါးဖြစ်နေခဲ့သည်လေ။ သူနှင့်တွေ့ကာတိုင်ပင်ကြည့်မည်ဟုတွေးခါမှ ရဲရင့်၏ဖုန်းနံပါတ်ရောလိပ်စာပါမသိထားသည့်အနေအထား ဖြစ်နေသောကြောင့် ခေါင်းခဲရပြန်သည်။

လူဆိုသည်မှာလည်းအခက်သား။ ကိုယ်တိုင်မြိုသိပ်ထားစဥ်ကတော့ မည်သည့်အနေအထားဖြစ်စေအဆင်ပြေသော်လည်း တကယ်တမ်းဆုံးဖြတ်ချက်ပြောင်းမည့်အချိန်တွင်တော့ အလောသုံးဆယ်ဖြစ်သွားပြီးအခုချက်ချင်းပင် ထိုကိစ္စကိုအကောင်အထည်ဖော်လိုစိတ်ပြင်းပြသွားတတ်သည်ဖြစ်ရာ ရဲရင့်၏ဖုန်းနံပါတ်လေးကိုပင်တောင်းမထားမိသည့် ကိုယ့်ကိိုကိုယ်သာအပြစ်တင်မိတော့သည်။

အဂ္ဂဆီသို့ဖုန်းဆက်၍မေးကြည့်လျှင်ကောင်းမလားဟုလည်း တွေးမိသေးသည်။ သို့သော်အခုနေများဖုန်းဆက်၍ရဲရင့်၏ ဖုန်းနံပါတ်ကိုတောင်းမိလျှင်လည်းအလွန်ထူးဆန်းဖွယ်ရာဖြစ်နေပေမည်။ စိတ်ကလည်းရုတ်တရက်အလျင်လိုလာသည် ဖြစ်ရာမနေနိုင်လှပေ။ သို့သော်ငြားထက်သန်လွန်းနေသော စိတ်ကိုခဏတာချိုးနှိမ်ကာအခါအခွင့်သင့်မည့်အချိန်ကိုသာ စောင့်နေရန်ဆုံးဖြတ်လိုက်ပါသည်။

တစ်ချိန်တည်းမှာပင်ဇေယျတုအကြံတစ်ခုရသွားသည်။ အဂ္ဂ၏ဖုန်းအားခဏငှါးချင်ယောင်ဆောင်၍ရဲရင့်၏ ဖုန်းနံပါတ်အားခိုးယူလျှင်ဟူသောအကြံပင်။ အကြံရသည်နှင့် တစ်ပြိုင်နက်အဂ္ဂဆီသို့တစ်ခေါက်ပြန်သွားရန်စိတ်ကူးပြီး တက္ကစီခယူပြီးအခန်းထဲမှထွက်လိုက်သည်နှင့်သူ၏အဖေနှင့် တည့်တည့်တိုးလေသည်။

"ငါ့ခွင့်ပြုချက်မရှိဘဲအပြင်ကိုခြေတစ်လှမ်းထွက်တာနဲ့ မင်းအမေရဲ့ပစ္စည်းမှန်သမျှ ပြာဖြစ်ပြီသာမှတ်ထား"

ဇေယျတုမှာထိုစကားကြောင့်အောင့်သက်သက်ဖြစ်သွားရပြီး ဒေါသလည်းထွက်၊ဝမ်းလည်းဝမ်းနည်းသွားရသည်။ မည်မျှပင် လူစိတ်မရှိဟုဆိုဆို ထိုစကားကတော့အတိုင်းထက်အလွန် ယုတ်ညံ့သည်ဟုယူဆ၍ပင်ရသည်မဟုတ်လား။

"လူမှဟုတ်သေးရဲ့လား"

သူ့အဖေအားမကြောက်မလန့်ခပ်ရိုင်းရိုင်းပြောလိုက်သည့်အခါ သူ၏အဖေကလည်းသူ့အားခါးထောက်၍ကြည့်ကာ ခပ်အေးအေးဖြင့်ပြန်ဖြေသည်။