මචං,
තනි වචනෙ කෙටි පුංචි පණිවිඩ
'හ්ම්ම්' 'හ්ම්ම්' බකමූණු උත්තර
වට්සැප් එකේ පිරුණොත්
අර එක ඇහැක කඳුළක් එන
හිනාවෙන ඉමොජිය ඈ එව්වොත්
උඹ දන්න ලස්සනම කතාවක් කියපං
නැත්තන් පොඩි විහිළුවක් කරපං
ඒ ඈට දුක හිතුණු වෙලාවට...
මචං ,
කලබලෙන් වගේ ඉපදුන
වචන, පිල්ලම් ගිලිහුණ
කෙටි පණිවුඩ අතර තිබුණොත්
හැම වැකියකම අවසන තබන
තිත ඈට මඟහැරී තිබුණොත්
වට්සැප් තීරුවේ ගලා එන
ස්ටිකර් ගඟ නතර වූවොත්
මුකුත්ම නොකියා හිටපං
ඒ ඈට තරහ ගිය වෙලාවට...
ආයෙමත් 'ස්ටිකරයක්' ආවොත්
ඒ තරහ ඉවර වුණු වෙලාවට...
මචං,
ඉඳහිටක මුණගැහුණු දවසක
වෙරළක, බංකුවක කෙළවර
කතාබස් කරමින් ඉන්න හවසක
ඇගෙන් කෙටිම කෙටි උත්තර
විතරක්ම උඹට ආවොත්
වම් පයේ සෙරෙප්පුව ගලවා
ටිකක් ඈතින් තැබුවොත්
විටින් විට හිස පාත් කරමින්
කරාබුවෙ බෝලෙ හැදුවොත්
වෙන දෙයක් ගැන කතා කරපං
ඒ ඈට කම්මැලිම වෙලාවට...
මචං,
පොත්හලක් ගාවින් යනකොට
කවි පොතක ඇස් නතර වෙනකොට
ගම්පහට දුම්රියෙන් එනකොට
එක්වරම ඈ නිහඬ වූවොත්
උඹේ අත හිමින් අත හැරියොත්
හිනාවන් එක සැණින් මැකුණොත්
දැක්කෙ නෑ වගේ ඉඳපං
ඒ මාව මතක් වුණ වෙලාවට...
<< උපුටා ගැනීමකි. ලියපු කෙනෙක් හොයාගන්න හම්බුනෙ නෑ . ඒත් ලස්සන නිසා මෙහෙ අරන් ආවා. >>