"الفصل الخامس والأخير "
رد عليها موضحاً لها :
_ لما يحصل اللي في دماغي هفهمك كل حاجة، ادخلي إنتِ جوا وأنا هعمل مكالمة وهاجي وراكِ.
أومأت بهدوء ولم تتحدث، تأكد من رحيلها ليخرج هاتفه بسرعة ويقوم بالإتصال بصديقه "حمزة" وبعد ثوانٍ قليلة أجاب عليه :
_ السلام عليكم، إزيك يا "حسام" ؟.
رد "حسام" بجدية :
_ وعليكم السلام يا "حمزة" فوق كدة وركز في كل كلمة هقولها ليك ونفذها بالحرف الواحد.
أنصت إليه "حمزة" قائلاً :
_سامعك يا "حسام" اتكلم.
أخبره بما أراده ثم أغلق معه وعاود الإتصال بشخص آخر لم ينتظر كثيراً حيث أجاب عليه الشخص الآخر بسرعة :
_أيوة يا أستاذ "حسام" .
_ "هند" البوليس زمانه جاي في الطريق نفذي اللي قولتلك عليه.
ردت عليه بشئ من الارتباك والرجاء :
_أستاذ "حسام" ما بلاش بوليس أنت عارف إنها صاحبتي، أنا بس كنت عايزة أحذرك بس مش حاباها تتسجن.
تكلم بجدية لا تقبل النقاش :
_آنسة "هند" أنا طبعاً بشكر حضرتك على مساعدتك ليا، وعارف إنها صاحبتك وما كنتيش عايزة السجن ليها، بس بردو ما تنسيش إنها كانت بتخطط إنها تشل مراتي وكانت هتستغل عدم وجودي وهتهرب، وبالرغم من كدة أنا هحاول إنهم يقللوا العقوبة.
أجابت بإحباط :
_خلاص يا أستاذ "حسام" أنا هعمل اللي عليا وشكراً لحضرتك.
_الشكر لله، وحقيقي شكراً على مساعدتك ليا.
_العفو دي بردو مهما كانت صاحبتي وما شوفتش منها حاجة وحشة.
أغلق معها بسرعة عندما استمع لصوت زوجته تنادي عليه، ليلتف ويراها تلوح له حتى يأتي، تحرك بإتجاهها وهو يقول :
_في اي يا حبيبتي دورنا جه؟.
ردت بهدوء :
_لأ لسة بس لقيتك اتأخرت فجيت أنادي عليك.
ابتسم لها ثم أمسك يدها ودخلا الإثنين إلى المشفى، مضى الوقت بسرعة حتى جاء دورهم ليدخل الإثنين لتقابلهم طبيبة في عقدها الرابع وهى تقول بإبتسامة :
_إتفضلي يا مدام "سمر".
تحرك الإثنين وجلسا بالكراسي المقابلة لها لتقول هى :
_ خير يا مدام "سمر" اي اللي تاعبك، والبيبي عامل اي؟.
نظر لها "حسام" بإستغراب من معرفتها بالأمر دون أن يتكلم أحد منهم لتلاحظ هى هذا لتُجيب :
_مدام "سمر" جات هنا قبل كدة وأنا اللي كشفت عليها وقولتلها على خبر حملها.
أومأ بتفهم ثم ما لبث أن قال :
_طيب أنا عايز حضرتك تطمنيني عليها هى والبيبي.
وقفت الطبيبة وهى تُشير لــ"سمر" بالتحرك نحو فراش الفحص قائلة بإبتسامة :
_بس كدة هطمنك عليها حاضر.
مضت دقائق قليلة و انتهت الطبيبة من الكشف لتعدل "سمر" ملابسها وتقدمت لتجلس أمام "حسام" مرة أخرى لتقول الطبيبة بعملية :
_ ما تقلقش يا أستاذ "حسام" مدام "سمر" بخير وكمان الطفل بخير، أهم حاجة إنها ما تتعبش نفسها وتهتم بالأكل علشان الشهور الأولى للحمل بتكون متعبة.
YOU ARE READING
غفلة شبه دائمة-نوفيلا-كاملة☑️
Short Story"هي طيبة القلب ويسهل خداعها والكذب عليها من أي شخص، غافلة عن ما يدور من حولها من أحداث ومواقف قد تودي بها إلي طريق مسدود، ليستقبل هو غبائها وطيبة قلبها بصدرٍ رحب فكيف لا يفعل وهي نصفه الآخر "كما يسميها"."
