صحيت الصبح زى كل يوم زى اى بني آدم، علشان يبدء يومه بروح مشرقه مقبله ع الحياه ،غسلت وشي وبصيت فى المرايا لقيت نفس الإنسانه الل كل يوم موجوده لا فارق معاها يوم مشرق او ضلمه ؛ إنسانه حزينة كئيبة مفيهاش اى ملامح رضا ولا سعادة،قربت من المرايا قولت أبتسم يمكن يفك معاها لقيت إبتسامتها باهته مفيهاش روح ،رجعت مكاني وقولتلها :
عندك حق تكوني كده فيكي ايه جميل علشان تحسي بالجمال دا ، لا شكل حلو ولا جسم حلو ، دا وش الناس تبصلك وتبتسم ..انتي المفروض متنزليش من البيت وتحبسي نفسك ترحمي الناس من شكلك القبيح دا ..
كل يوم بقول كده لكن مينفعش اقعد واحبس نفسي لان عندي جامعه ومحاضرات وسكاشن وحضور وغياب ودرجات ، كل يوم بنزل من البيت ومفيش فى لساني غير (انا اسفه ) لكل شخص بيبصلي وبينزعج من شوفتي ، اى حد عينه بتيجي عليا وبيشمئز من شكلي ، انا اسفه لكن انا مخترتش شكلي ..!
دخلت المحاضره ، أصحاب مليش أصحاب مفيش حد حاول يكلمني كلهم واخدين جنب مني بعدوا عني ، ببص عليهم من بعيد بيضحكوا مع بعض ومبسوطين ولما بكون معاهم بتعمد محسسهمش بوجودي علشان هيبصولي وهيضايقوا من شكلي ، كل ما بنزل الجامعه بحاول اكون غير مرئيه وارجع البيت ادخل اوضتي واطفي النور علشان حتي مشوفش عكس صورتي فى المرايا ..
فى يوم فى الجامعه محاضره اتلغت روحت لوحدي قعدت فى مكان لوحدي وبحاول اوطي راسي اخفي وشي عن اى حد بيمر من قدامي ، لاحظت شخص قاعد لوحده ماسك كتاب وبيبصلي كالعادة قولت فى سري( انا اسفه ) علشان لمحني ، فضل الشخص دا وباصص عليا وانا بحاول اخفي نفسي وابص ع الساعه واقول امتى الوقت يجري وميعاد السيكشن علشان اقوم من هنا ، مقدرتش اتحمل نظراته قومت ومعرفش اروح فين ومش عاوزه ألفت انتباه حد ليا .. روحت الكافتريا طلبت شاي معاني مبحبوش .. الوقت مر روحت قدام باب السيكشن قبل ميعادك ب نص ساعه وكنت لوحدي شويا ولقيت الشخص دا وقف قريب مني ، خوفت معرفش ليه ،فضلت ابص ع الارض ومتجاهله وجوده لكن هو فضل يبصلي .. الباب انفتح ودخلت السيكشن وكنت بقعد اخر واحده علشان اكون بعيده ومفيش حد بساعد جنبي لاقيته هو قعد جنبي وكلمني:
- ممكن قلم انا اسف بس وقع مني
من غير ما ابصله ولا اتكلم طلعت قلم واديتهوله :
بصلي وابتسم : شكرا
السيكشن بدء وانا تجاهلت ان فى حد قاعد قريب مني ، خلص السيكشن وبسرعه جمعت حاجتي وهو حاول يكلمني مستنتش ومشيت بسرعه وكنت شبه بجري،خرجت ورجعت البيت وقلبي كان بيتنفض من الخوف وبصيت الى موجوده فى المرايا كانت خايفه اكتر مني ، حطت ايديها ع وشها وعيطت ..
يومين مروحتش الجامعه والتالته كان لازم انزل علشان امتحان الميد ترم ، كالعاده حاولت اتجنب الناس وكنت لوحدي ..خلصت امتحان وكان فى وقت ل امتحان تاني ساعه روحت الكافتريا افطر ،وقفت كالعادة مش عارفه اطلب ايه :
- أى سندوتش عندك هاته
اخدت السندويش وروحت قعدت فى مكان المخصص البعيد عن الزحمه والناس وابتديت اكل وغير منتبهه ل اى حد مر .. فجاءه لاقيت شخص وقف قريب مني :
- مساء الخير
ارتبكت ومبصتش : مساء الخير
مد ايده بالقلم: اتفضلي
لمحت القلم اخدته من غير ما ابصله
- شكرا .. انا لاحظت انك مجتيش يومين ورا بعض رغم انتي ع طول عمرك ما غيبتي عن محاضرات انتي كويسه
اتخضيت ايه دا هو بيراقبني مردتش
- تسمحيلي اقعد هنا جنبك مش هسببلك إزعاج
سكت وكملت اكل ..اخد سكوتي موافقه وقعد :
- انا اسمي امجد وانتي ؟
- انا ..
- ايوه هو فى غيرنا ..
سكت .. اول مره حد يتعرف عليا :
- انا .. انا ..
- مش مهم ..
- مش مهم ..؟!
- ايوه مش مهم اعرف الاسم كفايه اني قاعد معاكي وبنتكلم ..
- انا معرفكش علشان نتكلم ..
- وانتي تعرفي نفسك الاول ..؟
اتفاجئت من سؤاله : نعم ..؟
موبيله رن وقف وهو مبتسم : فرصه سعيده انى شوفتك وان شاء الله تتكرر تاني . سلام
مشي وكانه بيقولي هيقابلني تاني ، تاني يوم فى نفس المكان قاعده جه قعد جنبي :
- فعلا المكان هنا احسن من الدوشه هناك
- ها ..
- دا الاجابه لسؤال انتى ليه دايما بتقعدي هنا لان مفيش اجابه تانيه اكيد ..
وقتها قررت أرفع راسي وابصله ويشوف وشي وقبح ملامحي ويعرف انا ليه بعيده عن الناس ..رفعت راسي وبصتله لكن كان بيبصلي ومبتسم متغيرتش ملامحه :
- عاوزه تقولي حاجه ؟
- انا ..؟
- ايوه ..
- لا مفيش
لفيت راسي ورجعت بصيت للارض تاني :
- ليه دايما باصه للارض هو فى حاجه ضايع منك ..
- ها ..
- ليه بتبصي ع الارض ؟
- علشان كده احسن ..
- احسن لمين ..ليكي ولا لغيرك
- لغيري ليه اضايقه بشكلي ويشوف وشي دا ، انا ..
- ماله وشك طبيعيه لا عندك عين تالته ولا مناخير تانيه وماله شكلك طبيعيه ..
بصتله : لو سمحت كفايه كده انا عارفه كويس انا ايه وشكلي ازاى مش لازم تتريق ولا تسخر مني
بملامحه المبتسمه : مش سخريه..انتى جميله ومش عارف عامله كده ليه فى نفسك،ليه جلد الذات دا إللى حسيته بكلامك ..
- انا مش فاهم حاجه ..انا قايمه
مسك ايدي وقعدني: انتى إللى مش فاهمه حاجه ، من اول السنه وانا ملاحظك وملاحظ تعاملك مع نفسك مش الناس .. انتى شايفه نفسك تفرقي ايه عنهم ؟
- افرق كتير .. شكلهم ولبسهم احلي ..وشوشهم احلي ..حياتهم احلي .. انا زى ماانا شايف مش حلوه
- لأنك محاولتيش تشوفي ، حاولي تشوفي ايه الحلو
فيكي
- مفيش حاجه حلوه ..ببص فى المرايا مش بشوف حاجه حلوه ، دا شكلي إللى ربنا خلقني به مقدرش اغيره ، ودا جسمي مقدرش اعمل فيه حاجه ، انا عايشه فى حالي ومش عاوزه اكتر من كده
- فى حد قالك انك وحشه ..؟
- كفايه نظراتهم بتقول مش لازم ألسنتهم
- ومتساليش نفسك مثلا ليه بيبصوا كده عليكي ؟!
- لاني مش جميله ودا بيضايقيهم
- مش يمكن انتي إللى وصلتلهم الاحساس دا
- انا ..؟!
- لما تقابلني حد بيبتسملك ليه تقابليه بتكشيره اكيد هيكشر ، ولما حد يكلمك كلمه حلوه وانتى بتسكتي اكيد مش هيكلمك تاني ، ولما حد يطلب منك حاجه وانتى ترفض اكيد مش هيطلب منك تاني ، إنتي فعل و رد الفعل ل أفعال إللى حواليكي معاكي ..
- عندك حق تقول الكلام دا لان عمرك ما بصيت لنفسك فى المرايا وتحس انك كاره الشخص إللى انت شايفه ،مش فاهم يعني ايه تكره حاجه فيك وتكره نفسك بسببها،عمرك ما جربت انك كل يوم تبص للسماء وتقول ليه انا اتخلقت كده ،ليه انا بالذات ،ايه إللى عملته علشان اتعاقب العقاب دا واعيش فى العذاب دا كل يوم لما ببص لنفسي فى المرايا وفى نظرات الناس ليا ..انا عايشه غصب عني مع نفسي ، إحساس انك مجبر تعيش مع حد غصب عنك إحساس مميت ..
- انا لو قولتلك انك جميله هتصدقيني..؟!
سكت وكملت كلامه : طبعا لا عارفه ليه .. لأنك مش شايفه دا فى نفسك ، إنتي شايفه انك زيرو جمال شكل رغم أن دا مش صحيح خالص ؛ مش هقولك جميله الجميلات لكن فيكي جمال يميزك وانتي بتخفي الجمال دا بكرهك لنفسك إللى متستحقش منك كده خالص ..
انتي مقتنعه إقتناع تام انك مش جميله لذلك مهما حد قالك انك جميله مش هتسمعيه ، إنتي مركز اكتر انك ازاى تداري نفسك على الناس ولو حد بصلك بيسيطر عليكي إحساس الكأبه لان الناس بيفضلوا يبصوا عليكي علشان وحشتك ، فتعملي ايه ترجعي البيت بسرعه تقفلي عليكي الباب وتطفي الأنوار علشان متلمحيش خيالك القبيح وتاني يوم بيبقي تقيل انك لازم تنزلي ويبدأ تركيزك متحضر ازاى مخليش حد يلاحظني وتفضلي بوسه فى الارض وابعدي عن الناس وعاوزه ترجعي البيت ل أوضتك..
استغربت كلامه ومكنتش قادره اتكلم :
- إللى بتشوفيها فى المرايا دى نفسك مش شكلك ، إنتي مدمره نفسك ودا بيظهر ع شكلك ، الانسان طبيعه تكوينه حاجتين شكل ونفس .. الاتنين دول مترابطين ببعض ولما بينفصلوا بيحصل الاختلال إللى انتي عايشاه دا .. مش مستبعد انك فكرتي فى الانتحار كوسيلة راحه ليكي إللى حواليكي
- انا
- عاوز اقولك مفيش انسان كامل كل إنسان فيه عيوب وفيه مميزات ، ومفيش إنسان كامل الجمال ولا إنسان كامل القبح .. احنا من خلق خالق الكون إللى كل ما نشوف حاجه نقول سبحانك ما ابدعك وأبدع فى خلق الإنسان يعني مخليش انسان وحش بالعكس ، وبعدين الجمال نسبي لكن بجمال الداخلي لما يظهر بيوصل جمال شكلك أعلي درجات والكل هيعجب بيكي وهيتهافت ع انه يكون معاكي ولو لحظات .. اتصالحي مع نفسك .. قوليلها انتي جميله وتستحقي تعيشي وتتمتعي بالحياه مهما كانت ..
ارجعي البيت وبدل ما تدخلي أوضتك وتطفي الانوار ..ادخلي وشغلي النور واقفي قدام مرايتك والانسانه إللى شايفاها حزينه ومش جميله قوليلها انتي جميله وجمالك بيميزك عن غيرك .. شعرك عينك مناخيرك شفايفك وزنك كل دا حاجات وجودها مؤقت ، ابتسامتك روحك تفائلك ضحكتك هي إللى بتعيش ل اخر العمر ..
خلص كلامه واستاذن ومشي حسيت انه عايش معايا وبيسمع حواراتي مع نفسي كل يوم .. رجعت البيت ودخلت اوضتي وطفيت النور ودخلت ع السرير زى كل يوم.. شويا ولاقيت رساله من رقم :
افتكري انتي جميله وتستحقي تعيشي
امجد
مش عارفه ليه دموع نزلت من عينيا .. اسبوع منزلتش الجامعه .. خايفه اقابله ويكشف إللى عايشه مخبياه .. كل يوم كان بيبعتلي نفس الرساله قبل ما انام .. بعد اسبوع صحيت قولت هنزل الجامعه .. بصيت لنفسي فى المرايا لاقيتها بصالي بحزن .. فكرت فى كلامه وبصتلها :
- انتي جميله وجميله جدا ..مش لازم حد يقولك انتي لازم تعرفي دا وتتاكدي ان جمالك يميزك عن غيرك .. مش لازم شعر طويل وناعم ولا عيون ملونه ولا جسم رفيع هو إللى هيحدد جمالك .. اضحكي وعيشي الحياة .. انتي جمال شكلك مش هيميزك لكن جمال روحك هو الل هيميزك .. انتي جميله وتستاهلي تتحبي وتعيشي ..
لاحظتها إبتسمت ونزلت الجامعه ال اول مره حسيت برغبه أرفع راسي وامشي عادي ولا اركز فى نظر حد حواليا .. كانت صعبه لكن نجحت المحاوله وقعدت بعد محاضراتي فى مكاني باخد نفس وبشجع نفسي تكمل لاقيته جه وقعد جنبي وبيسقف:
- برافوووو ..
- ع ايه ..؟
- انك قدرتي تصاحبي نفسك واتصالحتي معاها وحبيتيها
- بجد .. باين
- بصي ع وشك والابتسامه إللى ظهرت دى .. انتى خرجتيها من حبسها للنور .. انتي كسبتي معركتك مع نفسك وكسبتيها
- عارف اكتشفت ايه ..؟
- ايه ؟
- أن الإنسان لما يقبل شكله زى ماهو فبيبقي قادر يقبل غيره ، بيقدر يحس بالجمال الحقيقي وسط القبح المنتشر حوالينا ، وأن الروح رقيقه اوى اى خدش فيها بيعلم وبيجرح واحنا إللى بنعمل كده وبنسمح لغيرنا يجرح فيها لما بننفصل عنها.. لما احب نفسي زى ماانا غيري هيقدرني وقبل ما استني حد يحبني انا احب نفسي واقدرها واحسسها انها اجمل حاجه فى الدنيا ..
أبتسم وقرب مني وقالي : كده اقولك حمد الله ع السلامه يا اجمل انسانه شوفتها
- شكرا ع المجامله لكن ..
- لكن دى حقيقه .. انا اول ما شوفتك وحسيت فيكي حاجه مميزه انتي بتحاولي تداريها ، حاولت اساعدك و دعيت انك تساعديني اساعدك تظهري جمالك الحقيقي إللى فى ابتسامتك وروحك إللى كنتي بتموتيها ..
اتكسفت وسكت : يلا هعزمك ع حاجه بالمناسبه السعيده دى و البدايه الجميله زى جمال روحك دى
روحت معاه وقابلت اصحاب ليا وقفت وسلمت عليهم واتكلمنا وضحكنا وكان موجود بعيد بيبصلي وبيبتسم روحتله :
- شكرا ..
- انا معملتش حاجه انتي إللى عملتي وعملتي كتير ، انا مجرد كلام لكن انتي الفعل شكرا انك حاولتي ونجحتي .. اشوفك بكره
- اشوفك بكره ..
فى الطريق للبيت طلعت مرايا من شنطتي وبصيت فى المرايا ولاقيت إللى فى المرايا بتبتسم وعرفت ان جميل لما نلاقي حد يشوفنا جمال فى عيونه لكن الأجمل اننا نشوف نفسنا اجمل حد فى الدنيا ونحبها ومنستناش حد يحبها لان مفيش حد هيحبها ويقدرها غيرنا ..!
اعتبروها إسكريبت وقولولي رأيكم 💜🥰
ولو عجبتكم الشير بيفرح 💜
