يومًا ما سنلتقى

٨٥

- بُص ياسطا
- ياسطا !
- دي شخصيتي لو عجباك ، بس في الحقيقة لا أنا ولا انتَ طايقين بعض ف اطلع زي الشاطر قول لماما أنا صرفت نظر عن موضوع جواز بنتك ، وقولها وانت بتزعق وارفع راسك كده
قعد على الكرسي وابتسم بتسلية :
- أنا محدش يقولي أعمل ايه ف ردّي على كلامك العبيط ده "  لأ ! " تعرفي لو كنتِ طلبتيها بذوق شوية كان ممكن أفكر في الموضوع .
قومت من مكاني بسرعة وسألته بفرحة - بجد؟
هز راسه بأيوة فكملت كلامي - طب من فضلك بعد إذنك لو سمحت ممكن تطلع تقول لماما أنا مش عايز بنتك لو مش هضايقك
رجع بضهره لورا - أداء أوفر معجبنيش
- اه ده انتَ شكلك كده مطوّل وهتخنقنا
- تشربي عصير؟
- انت هتعزم عليا في بيتنا !
- بيتنا لسه هنختاره ، متبقيش خفيفة كده عشان شكلك هيبقى وحش بعد الزفة اللي عملاها دي كلها .
- أقصد بيتي..اللي هو بيت بابا ..يعني...لأ دقيقة ! وأنا قاعدة ببررلك ليه ؟ كنت مين أصلًا ؟
- نزلي إيدك وانتِ بتتكلمي واقعدي مكانك
نزلت إيدي وقعدت على الكرسي ووقفت تاني بسرعة - انتَ مين انتَ عشان تقولي أعمل ايه ومعملش ليه ، بُص أنا مش حابة كلامنا مع بعض دلوقتي أصلًا
- إني أتشوى على النار ببطئ أفضل من دقيقة أقعدها معاكِ ، فشوفي نفس الشعور المتبادل
-  طب حلو اتفقنا على حاجة ! يلا بقى يا شاطر اطلع قول لماما مش عايز أتجوز بنتك
- ومتقوليلهاش انتِ ليه؟
- انتَ عارف إنها تعبانة وإني مبقدرش أقولها على حاجة لأ من بعد ما بابا اتوفى فأكيد مش هقولها أنا
- مش هتصعبي عليا بردو
- انتَ عندك قلب أصلًا
- الثلاث الجاي مناسب لخطوبة ؟ أنا حاسس إنه مناسب
- خطوبة مين؟
- معندكيش ذوق في الكلام فأكيد مش هيفرق عن ذوقك في اختيار الهدوم ، هنقيلك الفستان أنا
- فستان ايه؟

"لحظة! هو فاكر إننا هنتخطب وهيعُم الفرح ونتبسط كلنا؟ انا اصلًا مشوفتهوش إلا مرتين ، وفي المرتين مطيقتهوش فيهم ، ولا هو بيطيقني حتى ! ، لازمة الجوازة دي ايه ؟"
اتخطبنا؟ حلو هو اللي جابُه لنفسه
- من الذوق إنك تعزم عليا لما تاكل ، انتَ مش خارج لوحدك !
كمل أكل وهمس بضحك - شوف مين بتتكلم عن الذوق .
رفعت حاجبي بإحراج  وشاورت بعيني عالأكل عشان يتكلم  - احم !
ساب المعلقة من إيده وضحك - متقنعنيش إنك مستنية عزومة للأكل  ، ما تاكلي يابنتي  !
-  أنا غلطانة إني بتكلم معاك
- صلّحي غلطك بقى واسكتي !

( الدنيا حرّ وهيّ بتشتي ليه؟ أنا حاسة الدنيا حررت فجأة ! هو بيردهالي يعني؟ عشان الأسلوب اللي كلمته بيه في البيت؟ أمّا إنسان قلبه سوداوي حقود ، ده كان من ٣ شهور مفروض يكون نسى !)

- إحنا خارجين عشان تفضل ماسك التليفون بتكلم صحابك؟
مردش عليا فسألته بغباء - بتتكلموا في ايه؟
- حاجة متخصكيش
- علفكرة مكنتش عايزة أعرف !
- وبتسألي ليه؟
- ايه؟
قفل التليفون وسألني - عايزة تتكلمي في ايه؟
بصيت قدامي وكتفت إيدي - مش عايزة أتكلم
مسك فنجان القهوة وابتسم - طيب