" على لسان رشا "
انا اكتر انسان حاسة بي خالد وبي وجعو ،، عشت معاناتو من كنا أطفال ف الأساس كنت بشوف خالد بتعرض للضرب على يد ابوهو ،، وامو اللي هي خالتي بتكون ساكتة وبتعاين بعيونها بعد يتفك من قيود ابوهو بيجي هارب لي حضن امي اللي بعتبروا الأمان بالنسبة ليهوو
اتكرر المشهد دا كتيير بتذكر مرة امي اتكلمت مع امو اللي هي خالتي عن انو م صاح البتعملوهو ف ولدكم وح يدخل في حالة نفسية اقيفي ف وش ابوهو واتكلمي معاهو خلو قلبكم حنين عليهو ولدكم الوحيد اتخيلوا ببساطة ردها كان شنو
" خلي ابوهو يربيهو داير مصلحتو "
م ح انكر اني كرهت خالتي ف اللحظة ديك وللان بكرهها وما اظن احبها ف يوم لانها من الاول السبب ف الحصل لي خالد ولو كان وقفت قدام وش راجلها م كان خالد وصل مرحلة الادمان💔
انا بشوف خالد بقتل نفسو بالبطئ وما قادرة اعمل حاجة ،، حاولت كتير اقنعوا انو يخفف التعاطي وفعلا كل ما نبدأ خطوة لقدام ابوهو يرجعنا ف لحظة واحدة مية خطوة لي ورا 💔
اعترف ليكم ب حاجة ...
انا بحبو .. لا بحبو شنو !؟
انا بعشق التراب البمشي عليهوو ،، حبي لي خالد لا من الليلة ولا من امس ،، انا بحب خالد من كنا أطفال لأني ما وعيت على غيرو صاح عندي خالات تاني وعندهم اولاد بس خالد كان مميز جدا بالنسبة لي لأنو اقرب لي ف العمر ،، ايوا فارق العمر بينا سنتين بس ...
امتحن تالت السنة الفاتت جاب نسبة كويسة بالنسبة للضغط العاشو بس قرر يمتحن تاني لانو هدفو كان يقرأ علم نفس ،، بسبب الضغط النفسي الاتعرض ليهو خالد قرر يقرا علم نفس ،، امتحن تاني ونتيجتو طلعت قبل اسابيع 85% وح يحقق هدفو ح يقدم اللي هو عايزو بس ابوهو سيادة العقيد عبد الله واقف ليهو ف حلقو واجبرو يقدم ف الحربية علشان يبقى زيو💔
خالد تعب وعافر واجتهد سنتين علشان يجبروهو يقرا رغبة م رغبتو لي الظلم دا !؟؟💔
الليلة الصباح وانا طالعة المدرسة بعد شلت مصروفي من امي لاقيتو ف باب الشارع ،، من ملامحو عرفت انو ماخد حاجة لانو م كان طبيعي ،، حاولت اتكلم معاهو صداني ودي عوايدو انو دايما بصدني وانا بتقطع من جواي بس "البِحب بِعافر علشان حُبو" وخصوصا اني متأكدة من مشاعر خالد البحاول يخفيها مني وهو ما عارف اني حافظاهو اكتر من نفسو 🖤🌻
بعد خالد صداني طلع من البيت واتطمنت لمن شفت صحبو الكان منتظرو دا اكتر صاحب وفي انا بعرفو وحاول كتير انو يطلعو من الاجواء اللي هو فيها ،، اتطمنت انو خالد معاهو هو بالذات ،، بعد الموتر اتحرك بقيت مراقباهو لحدي م وصلوا الشارع الرئيسي وفي لمح البصر جا بوكس 4×4 طاير من ماف وخلى خالد ف اتجاه وصحبو ف اتجاه والموتر ف اتجاه ،، الشارع بقى عبارة عن دم م حسيت الا ب نفسي بصرخ " خاااااالد " واتوجهت عليهم حيلي م شايلني...💔
