ဝိညာဥ်ကူး​ပြောင်းလာပြီး​နောက် ဗီလိန်ကိုငို​အောင်လုပ်ခဲ့တယ် (မြန်မာဘာသာပြန်)

Chapter 9: အလွယ်တကူ ရရှိလာသော အလုပ်တစ်ခု

[Unicode]

ကျောက်ရှန်က ဇာတ်ညွှန်းတချို့ကို ပို့လာပေးပြီးနောက် လျှိုယွီအန်းသည် ထိုဇာတ်ညွှန်းများက စီအီးအို-နင် ပို့လိုက်သောဇာတ်ညွှန်းများနှင့် တူညီနေသည်ကို သိလိုက်ရသည်။

သို့သော် နားလည်ပေးလို့ရပါသည်။ သူတို့ကုမ္ပဏီ​၏နောက်ကွယ်မှ တကယ့်သူဌေးသည် ရှောက်ယန်ရှီးဖြစ်သော်လည်း မသိသောသူများကတော့ သူတို့ကုမ္ပဏီကို မထင်မရှားကုမ္ပဏီအသေးလေးတစ်ခုအဖြစ်သာ မြင်နေကြလိမ့်မည်။

လျှိုယွီအန်းသည် သူ့‌ ငွေအရင်းအနှီးများ ပါဝင်ထားသော ဇာတ်ညွှန်းများကို ​ကျောက်ရှန်ဆီက တောင်းလိုက်သည်။ ထိုဇာတ်ညွှန်းများသည် တစ်ချိန်က ယွဲ့ကျွင်းကိုသရုပ်ဆောင်ရန်ကမ်းလှမ်းပြီးသား (သို့မဟုတ်) ကမ်းလှမ်းတော့မည့် အခြေအနေ၌ရှိနေသော ဇာတ်ညွှန်းများဖြစ်ကြသည်။ ထို့ကြောင့် သဘာဝကျကျပင် ကုမ္ပဏီဘက်ကလည်း ၎င်းဇာတ်ညွှန်းတို့၌ ရင်းနှီးမြှုပ်နှံပြီးသားဖြစ်နေရလိမ့်မည်။

သို့သော် ယွဲ့ကျွင်းသရုပ်ဆောင်ထားသော ဒီဆယ်ကျော်သက်လူငယ်ဇာတ်လမ်းမှာတော့ ကုမ္ပဏီဘက်က ရင်းနှီးမြှုပ်နှံမှုလုံးဝမထည့်ဝင်ထားပေ။

ရှောက်ယန်ရှီးသည် အနှီဇာတ်လမ်းတွင် ရည်ရွယ်ချက်ရှိရှိဖြင့် ရင်းနှီးမြှုပ်နှံမှု မပြုလုပ်ထားခြင်းဖြစ်ရမည်။ အဘယ်ကြောင့်ဆိုသော် မူလလျှိုယွီအန်းသည် ယွဲ့ကျွင်းနှင့်ဇာတ်လိုက်မင်းသမီးတို့ ချစ်ကြည်နူးရမည့်အခန်းများပါဝင်လျှင် ထိုဇာတ်လမ်း၌ ဘယ်တော့မှပါဝင်သရုပ်ဆောင်လိမ့်မည် မဟုတ်သောကြောင့် ဖြစ်သည်။

ဒါဆို အဓိပ္ပါယ်က လျှိုယွီအန်း ၁၀၀ရာခိုင်နှုန်းမပါဝင်တဲ့ ယွဲ့ကျွင်းရဲ့ဇာတ်လမ်းတွေ၊ အလုပ်တွေမှာ ရှောက်ယန်ရှီးက ရန်ပုံငွေလုံးဝမပေးထားဘူးပေါ့။

ရှောက်ယန်ရှီး သဝန်တိုတဲ့ပုံစံက ချစ်စရာကောင်းတယ်လို့ သူ ရုတ်တရက်ခံစားလိုက်ရသည်။

ထိုသို့တွေးတောရင်း ရှောက်ယန်ရှီးဆီ ဖုန်းခေါ်ရန် ဆုံးဖြတ်လိုက်သည်။ ရှောက်ယန်ရှီး အလုပ်လုပ်နေလိမ့်မည်ဟု သူထင်ခဲ့ပေမယ့် သူက အခုဂေါက်ရိုက်နေတယ်ဟု ပြောလာသည်။