أحببت روحك

السادس

سلام الله عليكم 💞

دنصب غده والبنات واكفات نشيل ونخلي
جان مقلوبه وكلهه ملتهيه اني جبت ماعون صبيت بي بدون كشمش لان ادري بي ميحبه ويضل ياكل ويدردم وحضرته عالجهه وصبيت الباقي من بدينه نشيل خليت الماعون كدامه بدون ميحس وكعدنه ناكل
وعمتي ومره عمي يسولفن على عالسوك والتخفيضات جان عمي يكول نور ليش مارحتي وياهم البارحه
ها مو جان راسي يوجعني هديل كالت شطلعت هاي ومن كتلج خلي نروح نفتر بالسياره هم كلتي راسي
ابوعله بطرف عيني مغلس وياكل ولا يمه ولا جن هو السبب
بتسمت عمي كال اليوم حضروا روحكم نروح عالشط بالحدايق حضروا عشاكم
وباوعلي وكال هاي علمودج الطلعه ومادام عمتكم هنا عالواهس
ضحكت اريد احجي رند كالت اي والله خالوا عاشت ايدك كون كلما اجي تطلعوني
عيني عالرند الي منطلقه بالكلام سبحان مغير الاحوال الي جانت مغروره وكوه تحجي صايره رلاكس

بدلنه العصر لبست ثوب جويتي وشال ويا رتبت روحي والبنات بدلن وطلعنه نقسمنه بالسيارات مهند بسياره بابه واني وهديل وعمه ورند اكيد ويانه
والباقين هناك

رحنه عالنهر دجله المكان جان حلو يذكرني بطفولتي شكد جنه نجي هنا
وطيور النورس عالشط فرشنه وكعدنه
عمي كام يحضر حط الشوايه وجايب المعدات كامله كالت عمه خاف ميقبلون كال من وصخ المكان كله بالمنقله خله الفحم ومحضر المعلاك الولد يساعدوا واحنه كعدنه
وره شويه كمنه نتمشه رند شترت طياره ورقيه وضلت طير وصاحت لمهند يعلمهه وضلت كلسى تصيحه من توكع ولازمه الخيط واكفه يمه تكله شلون وكلسى توكع الطياره وهيه تضحك ومنطلقه وهو يعلمهه ويسلفون ومندمجين اني رحت يم الجرف عالنهر يمي ريم ضلينه نسولف ونضحك وطلعت الموبايل ناخذ صور واكو عالجهه يم المطاعم الي عالشط قوارب
نبوعلهم المنظر كلش حلو اجه مؤيد وهديل كعدوا يمنه وهديل كالت خلي نصعد بالقوارب

اني بتسمت وذكرت شكد جنت اجررجر بمهند من جنت صغيره حته يصعدني بالقارب ونصعد ويضل يضحكني وكلسى يخوفني ويكلي راح اوكعج بالمي

كال مؤيد يله امشوا اني كتله لا خو مو كلنه نروح خاف عمه تريد شي كتلهم من ترجعون عود اصعد ويه عمو هديل تبتسم وتغمزلي
خزرتهه
راحوا اني بقيت كاعده اشمر حجار عالنهر جان يكول تعرفين تخلين الحجاره طفر
باوعتله كال يالله صعد بنطرونه من ركبه وكعد يمي واخذ حجارات وباوعلي كال شبيج ومصغر عيونه وابتسامه طفيفه
اني رجعت درت وجهي عالمي كتله
لا ماعرف وجريت نفس واحجي ضايجه
كال شوفي جان يشمر الحجاره كمزت تلث مرات شطح بتسمت منظرهه حلوه بس ماحجيت كال
يله سوي تعرفين كتله
لا
اعلمج باوعت عليه لا شكرا ماريد اتعلم شي روح علم رند خطيه متعرف طير الطياره واشمرت حجاره جان يضحك

اكول نوره؟  اشتم ريحت شعواط يمكن

اني رأسا درت وجهي ليوره اي غير عمو علك الفحم رجع ضحك كال لا ريحت شعواط من غير نوع ويبوعلي صارت عيوني بعيونه حركت حاجبي بتسأل شتقصد بتسم كال تغارين مثلا اني نصدمت راسا نتفضت