اسكربتات هالة أحمد

{72}

'' ليه بنتجوز ؟ ..💛 ''

'' كنت طالعة عالسلم بصعوبة من الألم اللي حاسة بيه في جسمي كله ،خبطت عالباب ..شوية وماما فتحت الباب ،أول ماشافتني لطمت على صدرها وقال ''

- يا لهوي يا بنتي ؟ ،مين اللي عمل فيكِ كدة ؟

'' اترميت في حضنها وقعدت اعيط ،خدتني ودخلنا جوا وكان بابا موجود ،حاولوا يهدّوني عشان اعرف اتكلّم ،ولما هديت بابا سألني ''

- جوزِك ضربِك ليه ؟

'' بصيتله وماردتِش ،يعني عِرف من غير ماقول ان جوزي هو اللي عمل فيا كدة ،وايه أهمية السبب دلوقتي ؟ ''

= هيفرق معاك السبب في ايه يا بابا ؟ ،وكإن فيه سبب للضرب ..بتسأل اذا كان له عذر يعني وانا استاهل اتضرب ولا لا ؟
- يا بنتي عايزين نعرف بس ايه اللي حصل
= اللي حصل انه ضربني وبهدلني قدام الولاد ،ومش اول مرة تحصل وانتَ عارف وساكت ،وانا خلاص يا بابا ..جسمي باظ من كتر الضرب

'' وقعدت اعيط ،كان صعبان عليا نفسي اوي ،وصعبان عليا ماحدش من أهلي واقِف معايا ،ردت ماما وقالت ''

= معلش يابنتي نصيبِك كدة ،استحملي عشان عيالِك
- ببكاء : كفاية بقا الجملة دي كفاية ،استحمل ايه وزفت ايه بس ،بقولكوا عيالي شافوني وهو بيضربني ..كان ساحِلني في الارض وبيضربني برجليه في كل حتة في جسمي وماهمهوش صريخ العيال وخوفهم ،انا لو عِشت معاه هبقى بضيع ولادي ..هيعيشوا ازاي وهما شايفين ابوهم كل يوم والتاني بيضرب امهم قدامهم ،هيعيشوا ازاي في بيت مابيفضاش من الخِناق والزعيق والقرف ،احنا كدة بنعقّدهم مش بنربيهم ،بطلوا بقا تحسسوني اني رخيصة عندكوا واني مش صعبانة عليكوا ،يا ماما دا انا لما دخلوا اهله علينا الشقة من خوفي منهم خدت هدومي ولبستها عالسلم وسِبت ولادي وجيت جري
= بابا باستغراب : وخايفة ليه من اهله انتِ عملتي ايه ؟ دا هو اللي ضربِك

'' مسحت دموعي وقولتله ''

- لا مانا عملت
= ماما : عملتي ايه
- نزلت بالفاظة على دماغه سيّحت دمه
= ماما بصدمة : يا نهارِك ابيض ! ،يخربيتِك
- ماهو مخروب لوحده يا ماما
= ماما : يالهوي عليكِ

'' بصّت لبابا وقالت ''

= ماما : هنعمل ايه دلوقتي ؟ يالهوي ليطلقها
- بغضب : امال كنتِ عايزنّي اعمل ايه وانا كنت هموت في ايده ؟ يعني هو يضربني عادي وانا اضربه تبقى جريمة وتخافوا ؟ ،هو ليه الحق يضربني ويشتمني وانا اسكت واحط جزمة في بُقي ؟ ،طب هو وأهله مابيخافوش ليه لما هو يضربني لاطلب الطلاق واسيبه ؟ ،اقولكوا ليه ؟ عشانكوا مرخصنّي ..وهو وأهله عارفين ان مهما اعمل في الآخر هرجع زي الكلبة ،يبقى ليه الحق يديني كل يوم بالجزمة وعلى راحته

'' قومت وِقفت وقولتلهم ''

- انا هتطلق ! والمرادي غير كل مرة ،مش هرجعله مهما حصل حتى لو حكمِت اعيش في الشارع ،وانتوا لو مش عايزنّي في البيت قولوا من دلوقتي وانا اروح ادور على مكان اعيش فيه ،لكن رجوع مش هرجع