تـنـاثـرو ونـدثـرت

البارت 6

#تــنــاثــرو_ونــدثــرت

#بــقــلــمــي_بــتــول_حــسـيــن

#بــارت6

----------------------------------------

أتبكين على عتاباً قد مَضى ؟
ولو كانَ يْحبكِ قد بقى
أفيقي أيتها الجميلة
هل سمعتي بميتٍ قد أتى؟

-----------------------------------------

عقيل : بعد مرجعولنا الموافقة كملت غرفتي بلطابق الثاني ورتبتها وشتريت گنتور وجرباية حديد واخذنا مشيه الهم ونطيناهم فلوس لجهاز العرس هاي التجهيزات اخذت مني اربع اشهر تقريباً لان لميت بعد فلوس يله گدرت انطيهم فلوس لجهاز العرس چنت حيل فرحان وماحس بتعب الشغل بدينا نجهز للعرس ورحت اني بنفسي عزمت عادل لخاطر اختي مو لخاطره وكلش ضجت من ماحضرت عرسي وبعد العرس بيومين دزيت امي لبيت عيالها وسولفتلي شيسوي بيها عادل بعد عرسي بكم يوم اجتي لبيتنا وحالتها ابد معجبتني تعاركت ويا عادل وكلش نزل من عيني ومن اجه يرجعها ابد مقبلت لان ابوي رجعها بعد زواجي بديت اكتشف الانسانه الجديده بحياتي سناء

---------------------------------------

ريحانة : بعد اختفاء بنت خالته من حياتي ارتاحت نفسيتي وزدت اهتمامي بأبني وبعادل والحمدلله رجع احسن من الاول بهواي واقترح يبني غرفة بلطابق الثاني لان امه كلش شدت وياه مو بس وياي وضاج من تصرفها بس اني حسيت بي يريد يبعد عنها وعن خالته خاف يرجعن يخلن شي بغرفتي بس اني صرت كلش انتبه خاف يخلن شي بلغرفة وفرحت من گال يبني بلطابق الثاني حتى ارتاح اكثر چان يشتغل واني لم فلس فوك فلس وهو مشتريلي بس حلقة ذهب لان الفلوس جمعناها ومن رجعنا انطيناها لابوي خليت الحلقة هم بعتها وفوك الفلوس الجمعناها وانبنت الغرفة وابني احمد چان عمره 4 اشهر بهذاك الوقت عادل كال فد مره راح اسويه طابق ثاني كامل الغريب بلموظوع عمتي غيرت تعاملها ويانا وشالت فلوس مجمعتهن وانطتهن لعادل يكمل البناء وبنفس الوقت بنت خالته رجعت تجي لبيتنا كل اسبوع تضل 3 ايام وتروح بس صرت انتبه اكثر وابد منطيتهن مجال يدخلن لغرفتي ومن هيه موجوده ما اروح لاهلي أله اتأكد رجعت لبيتهم
كمل عادل الطابق الثاني وبديت انقل اغراضنا وبيوم هيه چانت مموجوده طلعت لبيت اهلي اريد اروح للسوگ محتاجة كم شغلة للمطبخ اخذت امي ورحت بدون ماگول لعمتي بس عادل يعرف رجعت من السوگ مارحت لبيت اهلي رجعت لبيت عيالي سحبت الباب وفتحته وفتت عبالي عمتي بغرفتها بس واني صاعده للطابق الثاني هنه چانن نازلات باوعتلهن بصدمة شجابها هاي بنت خالته مو البارحة راحت وشعدهن هناك بسرعة عمتي حچت بمكانها گالت اني اخذتها رادت تشوف البناء الجديد وچابتلكم طباخ هدية خطيه
گتلها شكراً وصعدت بس مرتاحيت لسالفتهن ابد لان اعرفهن مر يومين شگيت بنفسي حامل لان صارت فتره دائماً دايخة اخذني عادل وصدك طلعت حامل چان فرحان كلش لحد الان اذكر فرحته مو مثل من چنت حامل بأحمد من رجعنا وعرفن حامل گلبن وجوهن عليه ورجعت عمتي مثل قبل تعاملني جنت حامل أليه شهر وهيه كل شوية تصيح عليه ختى انزل من الدرج وارجع اصعد وهيج اتأذه ابني هم متعبني كلش وبيوم منهن چنت نايمة بليل وگعد احمد بس يبچي اريد يسكت ماكو عادل ضل يحچي ويغلط وضربني ضرب مو طبيعي اني ضليت مصدومه لان ماكو شي بيناتنا ابد ولا يوم تعاركنا من ولدت احمد لحد الان  وچان فرحان لان حامل اخذني من ايدي ونزلني لباب البيت ورجع نزل احمد اني ضليت صافنة عليه مصدومة طلعت امه وابوه وبنت خالته چانت يمنا ضلو يتفرجون وهو يغلط ويصيح (طلعي روحي لاهلج بسرعة ماريد اشوف حتى خيالج بهذا البيت ) چانت هاي الجملة الاخيره بينا فتح الباب راد يطلعني ضل ابوه يصيح عليه وگالي فوتي بغرفتج القديمة انتي وابنج اخذت ابني وفتت بلغرفة وهو عفته يتجادل ويا ابوه حاولت ما اباوع بوجه امه وبنت خالته حتى ما اشوف ضحكهن وشماتتهن بيه قفلت الغرفة وگعدت اسكت احمد ونيمته واني دموعي مبطلن ينزلن ولا گدرت انام هذيج اليله ابد وكل شوية ارجع اذكر شلون ذلني گدامهم ضليت للصبح گاعده وسمعت صوت ضحكته هو وبنت خالته مبين اجتها فرصة من الله وگاعده من وقت تسويله ريوك علمود يطلع للشغل ضليت ادموعي ينزلن واسمع كلامهم وضحكم وهيه تتعمد تعلي صوتها وضحكتها حتى تسمعني شي احساس كلش غريب وصعب بداخلي احس نار ومتقبل تطفى رغم كل هلدموع النزلت عيوني ضلت تحركني لان سهرانه وهم ابچي گوه مفتحة عيوني سمعت صوت باب الحوش وهو ينسد عرفت طلع گمت وگفت قريبه على الباب ماگدر اطلع واشوفها گدامي وتشمت بيه انتظرت لمن سمعت باب غرفه عمتي تنسد بسرعة فتحت الباب باوعت ماكو احد اخذت ابني وصعدت لغرفتي لميت ملابسي وملابس ابني وضليت اباوع بلغرفة ودموعي تحرك خدي گلبي حس وگلي ودعي هذا البيت وودعي ذكرياتج وحب طفولتج وطلعي لبست عباتي واخذت ابني وغراضنا وخليتهم نايمين وطلعت لبيت اهلي ضليت ادك بلباب هواي يله طلعلي ابويه وستغرب من شافني وشاف وجهي وحال عيوني من الدموع والسهر اخذ ابني من ايدي واني شلت اغراضي دخلتهن عفتهن بلباب
مابيه حتى احجي عفت ابني عد ابوي ورحت لامي محتاجة اشگيلها خطيه چانت بعدها گاعده بفراشها مبينه من دگيت الباب گعدت شمرت نفسي بحضنها وضليت اسولف ألها وابجي وابوي واكف يسمع بعد ماشاف حالتي ماحچه ولا تشمت ولا لامني لان هيج سويت بس اني رفعت راسي وگتله هذا عقاب الله أليه لان حركت گلوبكم وكسرت كلامكم وعفتكم وعفت گلشي واختاريته الله عاقبني اخذ ابني وياه وراح للاستقبال ونزلت سناء زوجة اخوية تباوع مستغربه بس ماحچت شي سلمت عليه وامي كالتلها تسوي ريوك عوجت حلكها وباوعت صفح لامي وراحت للمطبخ مبينه متحجي ويا امي اني باوعت لامي بعتب وگتلها شوفي حالتي لا تعيديها وياها يمه
جرت حسره امي وسكتت اليوم كله ماگدرت اكل وابني مخليته يم امي وابوي ومن رجع عقيل من الشغل ودخل لغرفة امي وشافني هيج ضل يغلط على عادل واخذ ابوي وراح لبيتهم اتأخرو كلش يله رجعو وامي واگفه بلباب تدعي مايتعاركون رجعو وعقيل چان ضارب عادل وعادل ضاربه مو علمودي بس حاچي وياه وعادل ضال يستهزء بيهم ويجاوز حتى ماحترم وجود ابوه وصارت مشگلة ومر يومين واجه ابو عادل گعد ويا ابوي ومتفقين على الطلاگ
گايله ابو عادل خلي توولد بسلامة ونطلگ اني من سمعت هيج هملت ابني ونفسي وحبست نفسي بلغرفة وبس ابچي اكول هسه يچي عادل ويعتذر واخليله اسباب واعذار واكيد بنت خالته سوت شي مستحيل عادل يعوفني لا يرجع يمكن عصبي يمكن زعلان لان طلعت من البيت وعفته ويمكن ويمكن ويمكن وضليت اقنع بنفسي واليوم صار شهرين اني عد اهلي وماسمعت ولا شفت عادل ولا اهله واخوي يرزل بيه لان هيج مسويه بنفسي ويگلي ميستاهل زوجة اخوي چانت بس تباوع وهواي دارت ابني شوية شوية بده گلبي يبرد واحاول اقوي نفسي لخاطر ابني صرت اصعد لغرفة سناء اسولف وياها واتعود عليها وتتعود عليه هيه هم چانت حامل اول شهر ألها واني شهر ونص تقريباً وچنت دائما اباوع لسطح عيالي ولغرفتي اگول بلكي اشوف عادل او يشوفني ويصحة من هاي الحاله البيها وبعدين ألوم نفسي اني ليش مهتمه أله مو هو ناسيني وعايش خلي انساه بس گلبي مو بيدي يرفض ينساه ويرفض كل كلمة اكولها على عادل وضل عنده امل لليوم الاسود المر وخله ايامي كلها سود وياه چنت اخبز اني وسناء وامي مخليه احمد بحضنها وگاعده وسمعت صوت هلاهل عالي كلش نغزني گلبي واحس بألم مو طبيعي بداخي ما اعرف شنو هو سمعت هوسات اخوي عقيل چان گاعد بلباب بسرعة دخل للبيت وسد الباب وعيونه حمر باوعت عليه دنك راسه ورجع باوع لامي وامي ارتبكت وسناء هم
وثنينهن حچن بنفس الوقت اخذي ابنج وطبي ووحده باوعت للثانية استغربت وعقيل راح دخل وگعد على اول درجات واخذ احمد وطلب چاي رحت اسويله وهو يلعب احمد وديتله الچاي وحاول يلهيني بلسوالف والضحك بس مبينه ضحكته چذب وگلبي مابطل ينغزني دخلن امي وسناء ووياهن صفطت الخبز وماعاجباتني ثنينهن كل شوية يباوعلي ووحده تباوع للثانية وعيونهن تكول شي سناء اخذت عقيل وصعدت لغرفتها شوية ونزلو

عقيل : ريحانة خلي ابنج يم امي وروحي ويانا للسوگ اني وسناء

ريحانة : باوعتله متفاجأة،  ياسوگ هذا هسه ضلمت الدنيا صدك جذب باجر نروح اني وياها

عقيل : لا بعد وقت خلي نتمشى الجو حلو

ريحانة : والله مالي خلك اطلع باجر نروح ، بعدني احچي ورجع صوت الهلاهل عالي كلش هاي المره لان واكفة بصف الدرج كلهم ارتبكو واحد يباوع للثاني ، اني مسوية العشه من وقت وماعندي شي وسناء كل شوية مسويتلها حجه علمود ادخل للمطبخ لان گعدت على الدرج واني ضليت اسولف ويا امي وعقيل مثل التطلك يفتر بلبيت ويباوعلي حسيت اكو شي ومنا گلبي ينغزني يريد يطلع من مگانه اجه ابوي وگعد بلاستقبال وعقيل ضل يلح ناخذ العشه هناك وامي وياه وامي لو نموت متخلينا نگعد هناك گتله روح هسه نحضر الاكل اني وسناء ونجي اخذ احمد وراح شوية ورجعة متقيء على ملابسه اخذته غسلتله وخليت سناء بلمطبخ تحضر الاكل بدلتله وعلى السريع غسلتهن واريد اصعد اشرهن وسناء شافتني وارتبكت بلزايد واخذتهن مني بسرعة گالت اني اشرهن ألج اخذي الاكل انتي ابتعدت عنها ردت ادخل للمطبخ واسمع هوسات وهلاهل كلش عاليه ماعرف شلون اخذتني رجلي وصعدت الدرج شفتها تريد تنزل ضلت تگولي لا تصعدين تعالي واني غلست عنها صعدت وباوعت على بيت عادل وشفت الهوسه باب غرفتي والهوسات نزلن دموعي واحس گلبي يريد يطلع ويتحرر من بين ضلوعي اريد اصرخ بأعلى صوتي لا هذا موعادل غلطانة لا لا مستحيل مستحيل لا مو مستحيل عادل لو يموت ميسويها سناء وگفت يمي وحضنتني وضلت تبچي دفعتها ورحت لغرفتها اخذت عبايتها ونزلت بسرعة وهيه تصيح ونزلت وضلت تحچي لج نسيتي انتي حامل لا تركضين ريحانة لا تروحين عليج العباس ريحانة
فتحت باب البيت وطلعت بسرعة چان باب بيتهم مفتوح لان عرس وهوسه گلبي وعقلي چانو رافضين يصدگون من شفت الهوسه حسيت بلخذلان بس ماكتفه گلبي بهيج شي گلها ضلت تباوعلي وامه تلگتني بضحكة فسرتها من ابشع انواع  الشماته بعدت نضري عنها وقبل متوصل للدرج تمنعني سبقتها وصعدت وگفت گبال الغرفة وخايفة ادگ الباب ويوگف گلبي بس ماعندي غير حل دگيته بسرعة من شفت امه وصلت لنهاية الدرج فتح الباب هو وانصدم من شافني بس مو مثل گلبي من شافة وهيه واگفه وراه بصف الچرباية بس باوعت بعيونه ودموعي رفضن ينزلن من الصدمه بس چنت اهز راسي ما مصدگة اليصير ما مصدگة ليش هيج عيوني بعيونه عيوني الحچت عيوني العاتبت چانت تكله والوعود وينهن وين حبك أليه عفت گلشي لخاطر حبك وحتى ما اخذلك خنت اهلي وخذلتهم ونزلت روسهم وحركت گلبهم سلمتك گلبي وروحي وگلشي بيه وانطيتني الخيانة وگسرت الگلب وحركت الروح وخذلتني ابشع انواع الخذلان شنو صار وليش هيج سويت بشهرين بس بشهرين نسيت ريحانة نسيت حبي ماچنت اسمع امه شنو تحچي بس باوعت بعيونه وشفت دمعة واگفة ويحاول يمنعها وباوعت للعروس بنت خالته مبتسمه بشماته بنص غرفتي وبنص مملكتي ولا گلمه طلعت مني درت وچهي ونزلت من الدرج ودموعي ترفض تنزل باوعت للگاعدات كلهن يباوعن عليه بقهر وشفقة طلعت من بيتهم شفت ابوي وعقيل واكفين بلباب جرني عقيل من ايدي واني مثل الفاقده امشي وياه دخلني لبيت اهلي وتلگتني تمي حضنتني وتبچي وتدعي عليه واني بس اشوف ولا دمعة بعد نزلت مني ولا حچيت صدمة بعمري مراح انساها خذلني ،،،،،،،،،،،،،،

شنو تتوقعون يصير ويا ريحانة شنو راح تسوي

بلنسبة للنشر راح احاول انزل بارت بين يوم ويوم يعني يوم نشر ويوم استراحة

اشوفكم بخير ولا تنسون التصويت اتفاعلو ❤️❤️