الدورة الشهرية ورمضان .❤
بصي بقى مفيش حاجة اسمها هاخد حاجة توقفلي البريود ف رمضان أو انا ببقى مخنوقة والبريود عليا والكلام ده كله...
البريود دي حاجة طبيعية ربنا خلقك بيها وهي نعمة كبيرة جدا من ربنا علينا
- بس لما بتجيلي فـ رمضان بحس اني وحشة لما الناس كلها تكون صايمة وقريبة من ربنا وانا لأ
بصي يا غالية هي البريود دي لو مكانتش جاتلك كنتي هتصومي صح ؟!
- أيوة طبعا
طيب خلاص يبقى دي حاجة ملكيش ذنب فيها وانتِ مفطرتيش بارداتك وكمان مين قالك انك مش هتعرفي تكوني قريبة من ربنا وتحسي بجو رمضان زيك زيهم كمان
- ازاي؟!!
هقولك
أولا تقومي الصبح كدة تاخديلك دش وتنعنشي نفسك وبعدين تفطري"ولازم تفطري لانك هتحسي بهبوط وكدة غلط..مفيش حاجة اسمها هفضل صايمة لحد قبل المغرب بنص ساعة وبعدين افطر ده غلللط طبعا"
ثانيا لسانك ده ميبطلش أذكار..طول ما انتي صاحية تفضلي تستغفري وتصلي ع النبي وتسبحي وتهللي وتكبري وهكذا
ثالثا فونك يبقى ع طول ف ايدك بتقرأي منه قرآن أو تمسكي المصحف بحائل
رابعا ادعي بكل اللي نفسك فيه..مفيش حاجة اسمها علشان عليا البريود يبقى دعوتي مش مستجابة لاني مش طاهرة...كل ده غلط جدا...
انتي مش عاملة ذنب أو حاجة وحشة انتي بس عندك عذر يمنعك من الصيام والصلاة فقط
فكملي باقي الطاعات .. الطاعات كتيرة ومتخنقيش نفسك ع الفاضي ياختي
خامسا لو بتتعبك جامد بلاش تاخدي مسكنات لانها غلط...افضلي اشربي حاجات سخنة وحطي ايدك ع بطنك واقرأي قرآن .. او اقرأي الفاتحة لانها من اسماءها الشافية
وحاولي تتدفي كويس حتى لو حرانة وصدقيني كل ده هيخلي الوجع يقل جامد وعن تجربة
هااا بقى لسة مش هتحسي بجو رمضان وهي عليكي
- لا خلاص انا اللي كنت بفضل نايمة طول اليوم ومكنتش بقول أذكار ولا بقرأ قرآن نهائي علشان كدة كنت بحس باكتئاب بس خلاص بقى هغير النظام بعد كدة
شوفتي بقى إن احنا اللي بايدينا نغير كل حاجة للأحسن ازاي..
