مهندس برمجيات مسلم يتحدث عن خطر جديد يحيط من تنشر صورها على مواقع التواصل|
°°°
«بالنسبة لأننا في عيدٍ، وكعادة الفتياتِ -للأسف- يقومون بنَشْرِ صُورِهِنَّ في مواقع التواصُل الاجتماعي، فأرجو مِن كُلّ فتاةٍ أن تقرأَ هذا، وكذلك يقرأُ الشبابُ هذا المنشور التالي لأنه هامٌ جدًا.
(لم أتحدث عن حلال وحرام أن تقوم بنشرِ صُوركَ أو صُوركِ، بل الحديث عن شيءٍ آخر).
أنا لأول مرة هتكلم بالعامية هنا، بس عشان الموضوع عاوزُه يوصل للجميع.
مُعظم اللي هنا عارفين إني مُهندس برمجيات، فاللي هقوله دا مش من وحي خيالي، لأني قرأت عن الموضوع اللي هتكلم فيه، لكن بالله عليك اقرأ للأخر عشان الموضوع مُهم.
طبعًا مُعظمنا سَمع عن بسنت خالد واللي حصل لها، بس أنا عرفت الموضوع بشكل سطحي، وفي نفس الوقت قُلت في نفسي: يعني فيه حد لسه بيصدق مواضيع الفوتوشوب دي؟ ازاي أهلها يصدقوا دا عليها؟ والموضوع مَرَّ عليّ ولم أُركز فيه بشكل كاف.
من وقت قُصير قرأت عن حاجة كدا، والحاجة دي قَلبت تفكيري 180 درجة، واللي خلّاني أعرف ليه صُور لبسنت انتشرت كدا والناس صدقوها وابتلعوا الطُعم، ودا موضوع الرسالة دي.
فيه خدمة اسمها Deep Fake .. الخدمة دي hidden يعني مُختفية، بتقدم ايه؟ Deep fake porn as a service (أه زي ما أنت قرأت، يعني بتقدم أفلام إباحية مُفبركة).
ازاي بقى؟
الخدمة دي بفلوس، ويعمل لك فيديو حوالي 300 ثانية = 5 دقائق، بحوالي 0.0007 bitcoin، والـ bitcoin دي عُملة على الإنترنت، وتساوي حوالي 30 دولار.
كُل اللي عليك إنك تدفع الـ 30 دولار، وتبعت صُورة للشخص اللي عاوز تعمل له فيديو إباحي لدرجة إنه هو شخصيًا يصدّق إنه هو اللي في الفيديو.
طيب ازاي دا بيحصل؟
أولًا لها شروط، يعني لا يكون الشخص لابس نظارة، ومش لابس حاجة على رأسه، ويكون باصص للكاميرا بشكل مُباشر وعينيه تكون مُوجَّهة للكاميرا بشكل مُستقيم، يعني لا ينظر ليمين ولا شمال، وحاجات تانية عشان الكُل يصدق، زي الصورة تكون full 720hd وهكذا، ومش شرط على فكرة 5 دقائق للفيديو، بل في عروض تانية على حسب الوقت اللي أنت عاوزُه عادي جدًا، ومش كدا بس .. لا .. فيه خاصية كمان إنك تجيب فيلم إباحي كامل وتركب صورة الشخص عليه بشكل ماحدش يصدّق إن الفيديو دا تركيب.
فيه حد قرأت له بوست وقال إنه ماصدّقش دا وافتكرها اشتغالة زي ما بيحصل في الـ dark net وغيره، فحاول يُبص على الـ feedbacks (آراء الناس عنها) اللي مكتوبة، ولقاها كُلها حلوة والناس بتشكر فيها، فافتكرها إنها مُزيفة برضه عشان صاحب الخدمة دي يروّج لحاجته، فالمُهم الرجل دا دخل كلّم حد من الناس اللي شكّرت في الخدمة وسأله عن الخدمة، الرجل بقى أرسل له صُورة شخص، وأرسل له مقطع الفيديو الإباحي الأصلي، وأرسل له الفيديو بعد التركيب.
