الإنسان كان بيتمنى يكبر علشان مايروحش المدرسة ويصحى بدري، دلوقت كبر وبقى يصحى بدري علشان هو اللي هيشرح في المدرسة، هي الحياة مالها بينا بجد؟
لا اخترت أكون مُدرّسة ولا اخترت حتى أكون مدرّسة لغة عربية، بس الحقيقة إني مش متضايقة، الموضوع أحيانًا بيكون لطيف، وأحيان كتير بيكون مُتعب.
دخلت المدرسة ولحقت الطابور اللي كنت بقف فيه مجبرة وأنا طفلة، دلوقت بوقف الأطفال فيه، شريرة أوي.
- أنتِ تخلصي الحصة بتاعتك وتيجي في لحظة علشان نفطر.
- يا بنتي بقى.
- إيه يا حنان، نموت من غير المم.
كنت لسه هتحرك أنا وهي لحد ما لقيت بنت واقفة مع زمايلها بتقولهم - خالد بن الوليد ده هتلر المسلمين بجد، سادي بطريقة مش طبيعية.
قلبي وقع مني أول ما سمعت الجملة، حسيت بوجع فظيع في قلبي والله، سيدنا خالد!
البنت كملت - عرفت امبارح من بابا إن الفرس والروم خاضوا قصاد بعض أكتر من 1000 معركة ومن قوتهم الاتنين مافيش ولا معركة انتهت بفوز حد فيهم، أما بقى خالد بن الوليد انتصر عليهم الاتنين في 4 سنين بس. رغم إني مش من فانز خالد بس عاوزة أعرف بجد كان كدا إزاي.
فانز؟ والله دموعي وقعت لوحدها، إيه الحال اللي وصلنا له ده؟
أسماء مسكت إيدي وقالتلي إهدي.
صوتي كان طالع بالعافية - والله كل أم وكل أب هيتسأل عن ولاده دول.
قربت منهم أسألهم هما في فصل كام، واستأذنت مُدرّس المادة إننا هنبدل الفصول ودخلت لهم.
كلنا بلا استثناء شايلين على أكتافنا ميراث معين من فكر ومبادئ وعقيدة، بنكون عاوزين بأي طريقة نسيبهم لأولادنا لإن دا كل اللي مالكينه في الدنيا، لما يكون عندي طفل وأكسل أعرفه العقيدة اللي بفتخر بيها ويكون كل اهتمامي يتعلم لغة أجنبية ويوصل لأعلى مكان، وسايباه مزعزع من جهة دينه، هيواجه الحياة دي إزاي؟ وهو ماعندهوش هوية وبيجري ورا هوية ناس تانية عمره ما هيكون منهم!
سيبت كشكول التحضير جنبي وسندت بجسمي على السبورة وأنا ببتسم - أول مرة نتقابل في حصة واحدة صح بس أكيد تعرفوا اسمي، بعد إذنكم طبعًا أنا أخدت حصة أستاذ أحمد.
عيني وقعت على البنوتة اللي شوفتها الصبح، سألتها - اسمك إيه؟
قالت وهي قاعدة - أميرة.
ابتسمت - حبيبي بنقف لما بنكلم شخص أكبر مننا، احترامًا له.
وقفت، بس كان واضح على وشها السخرية - اسمي أميرة.
- طيب تعالي يا أميرة من فضلك علشان هحتاجك معايا هنا.
قربت ووقفت جنبي، كنت عاوزة أحضنها أوي، في النهاية دول أطفال ومش فاهمين حاجة.
- النهاردة أجازة من الشرح، أنا كنت جاية علشان أحكيلكم قصة.
بصيت لأميرة - ركزي معايا علشان أنا بنسى وبحتاج حد يفكرني.
وقفت في نص الفصل وقولت بصوت عالي - هحكيلكم عن بطل ساب علامة كبيرة أوي في التاريخ بتاعنا احنا اللي هو التاريخ الإسلامي، وساب علامة في تاريخ العالم كله لإن بطولته تُدرّس.
أشجع فارس عرفه التاريخ، وأذكى قائد عرفته الحروب، عمركم سمعتم عن قائد خاض أكتر من مائة معركة وماتهزمش قبل كده؟ ماسمعتوش صح؟ بس عندنا في التاريخ كله قديمه وحديثه، فارس واحد بس لم يُهزم في حرب قط، كل تاريخه انتصارات، ومن حسن حظنا، الفارس والقائد دا مسلم.
احنا كمان عندنا أبطال نتكلم عنهم ونفتخر بيهم.
