الحلقه الرابعة عشر...(14)
وائل: كنك شن عندك
سمر: بدون مقدمات نبيك في خدمه ضرورية
و سريه
و مانبيش حد يعرف بيها
وائل: ولو نحن فـ الخدمة و السريه شورنا
سمر قربت شوره و ابــ صوت واطي: نبيك تقتل كمال
خو محمد
وائل ابــ صدمه😳: اتبصري إنتِ
سمر😏: لا ما أنبصر , نحكِ جديات أنا
وائل قعد ايشوفلها و ساكت
سمر: شنو كنك ساكت شكلك مصتصعب الموضوع
وائل: مش موضوع مصتصعب ولا حاجه لكن فاجأني طلبك
سمر: 100 ألف تاخذهن كاش
وائل فنص أعيونه: 100 ألف
سمر: اهاا و كااااااش تاخذهن بعد اتكمل العملية
وائل: قبل لا نبدى في أي شي ناخذ الفلوس
سمر سكتت أشوية و بعدها: خلاص تم عطيني عند اليوم فـ العشية
نأمن الفلوس
وائل صبى: لما تأمني كلميني بيناتنا فون
سمر: تم
عدى وائل طلع و سمر صبت حتى هي روحت الحوشهم
.............
عند بسمه
وعت من نومها و أول شي خطر في بالها قصة فلوس
خوتها و امنين تبي اتجيبهن و قررت أنها أترن على زينب
و تطلب منها فلوس سلف خذت فونها و رنة عليها لكن لقتها مقفل
حطت فونها ع طاوله و صبت فطرت منصور و بدلتله دبشه
و هي بدلة دبشها و شربت قهوه و اقعدت اتضم فـ الحوش
علي دقت باب شقتها
بسمه تمسح فــ الــ tv: هيا هي جاية
عدت بسمه تجري شور الباب فتحاته قابلها حمزة خوها
بسمه ابــ فجعه: كيف خشيت هنا
حمزة دف الباب وخش: كيف , كيف خشيت , لقيت الباب
يالي تحت مفتوح ركبت كيف عندك مانع
بسمه ابــ توتر: لالا نسأل بس
حمزة: المهم توا وين الفلوس
بسمه ابــ خوف: أين فلوس
حمزة ابــ رفعة حاجب: كيف أين فلوس , كيف نسيتي
أمس شن حكينا
بسمه تحكي وهي ميته خوف: بس أنا ما عنديش امنين
انجيب المبلغ
حمزة قدم شورها و أعيونها كلهن شر
حمزة: تي كيف ما عندكش امنين اتجيبيهن و راجلك
شن قاعد ايدير
بسمه استجمعت قوتها: ما نقدرش نطلب منه كرامتي ما تسمحلي
حمزة ابــ عصبية: نعم نعم كرامتك
بسمه: اهاا منقدرش أنزل روحي و نطلب منه مبلغ كبير كيف هذا
حمزة قدم شور بسمه و يعطيها كيف نين راسها خبط فــ ساس ابــ قوووووة
بسمه حطت يد علي راسها و يد علي خدها
بسمه ابــ وجع: آآآآآآآآآآآآه
حمزة ابــ عصبيه و صوت عالي: الله الله ع زمان يالي خلاك
اتردي عليا و ترفضي يالي نطلبه
بسمه جت تبي تحكِ حمزة قدم شورها و مسكها من شعرها
حمزة يحكي و ضاغط علي أسنونه: عندك فرصه لليوم العشيه
لو ما جبتي الفلوس أعتبري روحك ميته تمام
و طلقها حمزة ابــ قوة و فتح باب الشقة و نزل
بسمه جت شور الكنبه و قعمزت أقعدت تبكي لأنها مش عارفه
امنين تبي اتجيب الفلوس و امنين ح ادبرهن
................
عند كمال
كان راقد في عز نومه نوضاته رنة فونه
كمال: اووووووووووووف
و مد يده علي فونه و شافله لقاها أميرة
كمال ابــ قرف: يا مبرد جد أمك يارا اترن عليها مره
وحده تلصق فيك لصقة سودة اووووووف
و طفى كمال فونه و حطى الشوفنيرة و حط الورغان
على وجه و رقد
...............
عند محمد
فتح أعيونه لقى روحه راقد فــ سيارة
محمد سقم روحه: اووووووو راحت عليا نومه تؤ تؤ تؤ
و ولع محمد السيارة و روح الحوشهم وصل خش للحوش
و ركب للشقه فتح الباب وخش قبلاته بسمه
امقعمزة ع كنبه
محمد: صباح الخير
بسمه: صباح النور
وصبت بسمه ابــ سرعه خشت للحمام و سكرت
علي روحها
محمد أستغرب حركاتها و خش للصاله قعمز ع الأرض لعب مع منصور
أشوية و بعدين صبى وخر قعمز ع كنبه و تكى راسه عليها
محمد: تي بعد خطرها مش أمس علي أساس كمال يبي ايجي يحكيلي أنسيت قصته بكل
طلع محمد الفون من جيبه و حط علي رقم كمال
و رن عليه
لكن لقاه مقفل
محمد: تي حتى أنا هبل يالي صدقة واحد كيفه
تلقاه كان جاي يكذب عليا شي كذبة و بعدين غير رايه
و حط محمد فونه في جيبه و رد تكى راسه
ع كنبه و غمض أعيونه
.......
عند بسمه
كانت امصبيه ع المرايه اتبحت في خدها يالي كان
امعلم من ضربت حمزة
غسلت بسمه وجها و نزلت شعرها علي أخدودها عشان
محمد ما ايشوف الضربة و فتحت الباب و طلعت
بسمه: محمد
محمد فتح أعيونه و شافلها: نعم
بسمه: تبي تاكل حاجه انديرلك فطور
محمد: لالا راسي صداع دريلي قهوه
بسمه: تمام حاضر أنشرب منصور أميه بس
محمد: تمام
و عدت بسمه جابت الميه و جت تبي اتشربها الــ منصور
لطت من يدها الطاسه و انكبت ع الأرض
بسمه: ييييي عليك قصة
و عدت بسمه جابت المنشف و جت تمسح فـ المية
محمد كان امتكي راسه ع كنبه و أعيونه مع بسمه
بسمه ضايقها شعرها يالي كان نازل علي وجها حولاته
و حطاته ورا و ذنها
محمد كان ايشوف الــ بسمه ولاحظ أن في علامة
حمره
علي خدها
محمد بــ ستغراب: بسمه هذا شنو
بسمه شافتله: شنو
محمد: يالي علي خدك
بسمه نزلت شعرها ابــ سرعه
بسمه ابـ خوف: لالا ما في شي
محمد: كيف ما في شي
و صبى محمد جا شورها و نزل طبس عليها
محمد: حولي شعرك خليني أنشوف
بسمه ابـ خوف: قتلك ما فيا شي كنك
محمد ابـ عصبيه: قتلك حولي أشعرك أنا
بسمه صبت تجري و عدت شور المطبخ
محمد صبى في جرتها و مسكها من يدها و جبدها شوره
بسمه اقعدت لاصقة في صدر محمد و وجها أقريب من وجه محمد
لِـ درجة كانت حاسة بــ نفسه علي وجها
محمد: بعد نقعد نحكِ أمعاك معش تمشي و اتسيبيني
بسمه أتشوف جوا العيونه و قلبها يرجف و نفسها عالي من الخوف
محمد حط يده علي خد بسمه و رفعلها شعرها و قعد ايشوف الـ خدها
محمد قعد حواجبه: من يالي دار فيك هكِ
بسمه ساكته
محمد بحت في أعيونها: نحكِ أمعاك ردي من يالي دارك فيك هكِ
بسمه ابــ توتر: خبطة فـ الدولاب
محمد بعد عليها ابــ عصبيه: شن اتحقي فيا عيل أصغير تضحكِ
عليا هذي ضربة كف قاعده واضحه من يالي ضربك احكِ من يالي ضاربك
بسمه أعيونها دموعو و ساكته
محمد قرب عليها ابــ عصبيه: بسمه و ما تخلينيش
ننكلب ردي عليا من يالي ضربك منننننننننننننن
يالي مد يده عليك
بسمه خافت من محمد و خافت لو ما حكت حتى
هو ح يضربها
بسمه ابـ خوف: حمزة , حمزة خويا
محمد ابـ عصبيه: وعليش أضربك محمد ايعيط
ابـ صوت عالي
ردي عليش أضربااااااااااااااااك
بسمه حطت ايديها علي وجها و اقعدت تبكي
محمد غمض أعيونه: أستغفر الله ياربي العظيم
تمام تمام خلاص اسكتي
و برم محمد فتح باب الشقة و طلع من الحوش
بسمه: حي عليا وين عدى
..............
عند محمد
نزل تحت طلع فونه من جيبه و قعد ايدور في
رقم وائل
نين لقاه و رن عليه
...............
عند وائل
بعد طلع من عند سمر روح شور حوشهم خش وائل
للحوش قابله حمزة
وائل: شن صار أمعاك
حمزة جا يبي يحكِ قطع عليه فون وائل
وائل: اصبر اصبر
و طلع وائل فونه من جيبه بحت لقاه محمد
وائل بـ ستغراب: الدكتور ايرن
حمزة: رد فيسع فيسع
وائل زر ع الخضره و رد
وائل: ايوا
محمد: أنت و حمزة وين
وائل: فـ الحوش
محمد: تعالولي توا نبيكم ابـ سرعه
وائل بـ ستغراب: انشالله خير
محمد: بعد اتجو تو تعرفو
وائل: هيا مسافة الطريق و انكونو عندك
محمد سكر و قعمز فـ الجنان يرجى فيهم
حمزة: كنه
وائل: قال تعال نبيك أنت و حمزة
حمزة: بالك يبي يعطينا الفلوس
وائل: كيف بسمه ما عطتهنش لكِ
حمزة: لالا على أساس اليوم فــ ليل ناخذهن منها
وائل: باهي هيا خلينا نمشو
حمزة: هيا
و طلعو حمزة و وائل و عدو شور محمد
...............
عند سمر
أخت سمر: سمر وين كنتي
سمر: اسسسس رآه يسمعك حد تعالي نبيك
أخت سمر: كنك شن تبي
سمر: مش عندك رقم حساب بابا
أخت سمر: اهاا عليش ؟
سمر: نبيك تمشي تسحبيلي منه 100 ألف
أخت سمر ابــ صدمه: نعممممممم
سمر: اسسسسسس اسكتي , الله ايربحك أنا محتاجه
الفلوس ضروري بكككككل
أخت سمر: و كان بابا حس ع الموضوع شن ح انقولوله
و بعدين إنتِ شن تبي فيه المبلغ هذا كلا
سمر: المبلغ هذا هو يالي ح ايردني الـ محمد و وعد لما انرد
الـ محمد ح انردلك الفلوس و اترديهن في حساب بابا
أخت سمر سكتت
سمر ذبلت أعيونها: الله ايربحك ساعدي خيتك عشان اترد
الحوشها و ولدها و راجلها الله ايربحك صبي أمعايا
مافيش حد يبي ايساعدني
أخت سمر وجعتها أختها: متأكده ح اترديهن
سمر: اهاا واللهي انردهن الله
أخت سمر: باهي خلاص تو نمشي نسحبهن لكِ
سمر ابـ فرحه: شكراً حبيبتي انعنك ما اتغيبي
...............
عند محمد
كان يرجى في خوت بسمه بعد أشوية جو دقو الباب
صبى محمد فتحلهم و خشو جوا المربوعه
...............
عند بسمه
كانت اتشوف الـ محمد من فوق و بعد شافت خوتها
جو و خشو فتحت باب الشقه و نزلت بشوية و صبت
ع الدروج تسمع فيهم شن يحكو
...............
عند محمد
خش هو و خوت بسمه للمربوعه
وائل: شن في ان شالله خير
محمد بحت في حمزة: عليش ماد يدك علي بسمه
حمزة: هه أختي و ان شالله نقتلها , بالك تبي اتحاسبني
محمد قعد ماسك روحه و ما يبي يغلط
محمد: أول شي أحكِ أمعايا أكويس خير ما نحكِ أمعاك
ابـ طريقتي
حمزة ابـ هزوة: هه وشن هي طريقتك
محمد قدم عليه و عطاه بوني ابـ القوووووووووة
نين الدم نزل من خشمه
حمزة ابـ عصبية: تضرب يا ... قطع عليه وائل
وائل: حمزة قعمز
حمزة رد قعمزة و هو حاط يده على خشمه و يمسح فـ الدم
وائل: نحن كنه جيين نبو فلوس
محمد: أول حاجه أنت وياه الحوش هنا معش تعفسوه
أختكم أقعدت مراتي ومعش نبيكم اتشوفوها ثاني شي لما تبو حاجه
كيف هذي تحكو أمعايا أنا شخصياً معش تحكو مع بسمه
وائل: باهي توا الزبدة
محمد: كم تبو
وائل: لنا سنه ما دفعناش الأجار و صاحب الحوش يبي ايلزنا
في نبو انسلكو دينا و ندفعو مقدم
محمد: يعني كم
وائل: 50 ألف
محمد: فـ الليل اتجو تلقوهن واتيات
وائل صبى: تم تو انجوك فــ ليل
وطلع وائل و حمزه و بسمه ركبت للشقه ابـ سرعه و محمد
حتى هو بعد طلعو خوت بسمه ركب فوق
..............
عند بسمه
خشت ابـ سرعه للشقة و عدت شور الحمام(حشاكم)
و خشت سكرت علي روحها الباب
محمد ركب خش للشقه لقى بسمه مش قاعده عرفها اتهرب
منه و ما تبيه يسألها ع يالي صار
خش محمد بدل ادبشه و خذى بنادول و خش رقد
أما بسمه اقعدت فـ الحمام نين معش سمعت حس محمد
طلعت لقاته راقد امقعدت اتلم في باقي حوستها
................
مشى الوقت
وعدت أخت سمر للمصرف سحبت أفلوس من حساب باتها
و عطتهن الـ سمر و سمر كلمت وائل و قالتله أن امنتله الفلوس
تلاقو برا و عطاته الفلوس و قاللها أن بكره الصبح ح ايكلمها
و ايقوللها شن ح ايدير
أما كمال كمل نهاره فـ الفندق و عابي أن سمر ح تمشي تحكِ
الــ محمد كل حاجه
أميرة كملتها يومها وهي غير اترن علي كمال و هو مش امعبرها
و كل ما اترن ايطفي فونه
زينب كانت كل أشوية اترن على بسمه و تطمن عليها و تسأل على جديدها
بسمه كانت طول الوقت اتهرب من محمد و ماتبيش تحكِ امعاه لأنها
كانت خايفه يسألها أما محمد لمى بقى بسمه ماتبيش تحكِ فاتها ومعش بى
ايجي شورها ولا يسألها
...............
فــ ليل تحديداً
عند خوت بسمه جو الحوش محمد نزلو فتحلهم محمد
الباب و خشو قعمزو فـ المربوعه و محمد ركب للشقه ايجيب
فـ الفلوس
حمزة ابـ فرحة: اليوم ليلة صباحيه
وائل: ايوااااااااااااا
(مع العلم أن حمزة ما يعلم ابـ قصة سمر ولا يعلم
ابـ تكليمتها الـ وائل)
وائل رن فونه طلعه من جيبه لقاها سمر جا يبي ايرد
علي نزلت محمد من فوق سكر في وجها و حطه ع الكنبه
محمد خش عليهم و في يده ظرف
محمد مدهن الـ وائل: هذين الفلوس خوذوهن و معش نبي
أنشوفكم جيين شور الحوش ولا متعرضين الـ بسمه
وائل صبى خذاهن منه: أصلي يا دكتور
حمزة صبى: ماتبي شي
محمد رفع يده ع الباب يعني اطلعو
وائل: هيا تم
و طلع وائل و حمزة من المربوعه
محمد: خزي اشلتت
ولف محمد طلع و ركب للشقة
و خوت بسمه طلعو من الحوش طول عدو شرو
الحرآم و عدو المزرعة صاحبهم كانو ملتمين الشباب كلهم
جو أمعاهم و اقعدو يسكرو طول الليل
و طبعاً وائل من الفرحه بـ الفلوس و من كثرة الشرب نسى
أن هو سيب فونه في مربوعة عيت محمد
...............
عند محمد
ركب للشقة خش للدار خذى ادبشه و حاجته
و طلع قبلاته بسمه
بسمه بعد شفاته جت شوره
بسمه: أنت عطيت خوتي الفلوس صاح
محمد ايشوفلها و ساكت
بسمه: أنا ما طلبتش منك تعطيهم
محمد: و أنا ما طلبتش منك اتقوليلي عطيهم ولالا
بسمه: شوف أنا عمري ما نزلت كرامتي الحد ولا طلبت من حد
أفلوس و فلوسك يالي عطيتهن الـ خوتي ح نشتغل و انردهن لكِ
محمد: أنا طالع للمستشفى عندي توكه ديري بالك علي روحك
وعلي منصور مش ح انطول ع الفجر ح انقعد هنا
و طلع محمد بدون ما يحكي اي شي ثاني سكر الشقه
و نزل طلع من الحوش و سكر الباب بـ المفتاح و تأكد
أن كل البيبان يالي دوا الحوش امسكرات و ركب سيارته
و عدى شور المستشفى
...............
عند خوت بسمه
بعد كلمو سهرتهم روحو الحوشهم و هما مغمى عليهم
و طول رقدو
..............
عند بسمه
سكرت باب الشقة بـ المفتاح و خذت منصور
و خشت رقدت هي وياه
..............
صباح يوم جديد
عند محمد
طبعاً لأن حصل فـ العمل ما روح الا الساعه 9 الصبح
خش للحوش فتح الباب الوسطي و جا يبي يركب سمع حس
فون ايرن طلع فونه شافله لاقاه مش فونه
محمد بـ ستغراب: املا فون من يالي ايرن
و قعد محمد ايتبع فـ الصوت خش للمربوعه جا شور الكنبه
لقى فون طايح فـ الكنبه من الجنب طلعه و قعد ايبحت فيه
محمد: تي فون من هذا
و بعدين أذكر أن خوت بسمه أمس كانو هنا و قال أكيده
امتاع واحد منهم جا محمد يبي يركب فوق علي رنة الفون
في يده بحت فيه و قعد ايشوف للرقم وحس أن يعرف الرقم
هذا طلع الفون من جيبه و سجل الرقم عنده طلع رقم سمر
محمد ابـ صدمه: هذا رقم سمر
سمر سكرت و دزت رساله طول
محمد أول ما جت الرساله فتحها
محمد يقرى فـ الرساله: شن صار في موضوع كمال سلفي
محمد قعد مستك ومش فاهم شي حط حاجته و خذى الفون
و طلع ابـ سرعه ركب سيارته و عدى شور حوش عيت بسمه
.............
عند خوت بسمه
كانو راقدين في عز نومهم أشوية و دق عليهم الباب
بـ القووووووووووة و أقريب ايطير من قوة الدق
وائل ناض مفجوع: بسم الله شن في
و طلع وائل ابـ سرعه فتح الباب قابله محمد و هووووب
يعطيه بوني و دفه جوا و سكر الباب وجا شوره و مسكه من سوريته
وائل ابـ خوف: كنك شن في يا محمد
محمد ابـ عصبيه: فون من هذا ااااااااااااه قول فون من
وائل: ااااااااااا هذا فوني وين لقيته
محمد وجه حمرررررر: شن تعرف مراتي أنت احكِ شن
عرفك بيها
وائل: تي مراتك أختي
محمد: ما نحكيش علي بسمه أنا نحكِ علي سمر شن عرفك بيها
وائل بعد سمع أسم سمر قعد ايلكلك
وائل: ا ا ا ا ما نعرفهاش
محمد اضربه بوني ثاني: تي بطل كذب و هذا شنو اااااااااه هذا شنو
و فتحله ع الرسائل و حطله الفون قدام وجه
وائل قعد مصدوم و ساكت
محمد: تبي تحكِ شن في بينك وبينها و شن عرفكم في بعضكم
ولا لا
وائل: تي ما نعرفهاش أنا
محمد: صار متعرفهاش
و طايح محمد وائل ع الأرض و نزل فيه ضرب بواني
و اكفوف و ادماغات نين قال بس
وائل وجه كلا دم: خلااااااااص خلاص تو نحكيلك
محمد و هو داهش: احكِ يا ولد الـ ##
وائل ايكح فـ دم: كح سمر كح كح سمر كح
محمد شط علي أسنونه: أحكييييييييييي
وائل: سمر هي ورا قصة كمال و بسمه , هي يالي
خططت الكل حاجه هي يالي خلت بسمه تمشي
للشقه و كمال قاعد فيها
محمد😳🔥
.
.
.
.
.
يتبع...
هييييييييي😱 حي علي سمر وحي
محمد عرف الحقيقه
بس دقيقه دقيقه وائل شن عرفه أن سمر
هي ورا كل حاجه🤔
فيه إن فـ الموضوع ؟
ردت فعل محمد و مصير سمر حياة بسمه و كمال
و وائل شن خصة فـ الموضوع هذا كلا ح نعرفوه
فـ الحلقه الجايه أحداث🔥🔥🔥🔥🔥🔥
أودي الفرجاني💚
