١٩_______٢٢
عزيز العاشقين ذليل 💘
البارت 19
سنا:
نزلنا احنا وهوستنا اني ابجي وكامشه وجهي وفاضل صاير نار عصبي ويصيح بعلو صوته على وجد ورند وخبص الدنيا بصراحة اني هنا انجريت ورجعت سنا الجبانة بس ابجي كعدني بالمطبخ على كرسي وراح يركض مدري وين وحطلي قطن بخشمي اني غير اللي اعرفه الواحد من ينزف خشمه يرفع راسه فوك اني ارفعه يرجعه ينزله ارفعه وره شويه وينزله
اجوي الحجيات ووجد والهوسة فوك راسي كلهم يحجون ويستفسرون ويتعاركون وياه
ام فاروق:ياا شبيها سناوي هاي شنو شصار
فاضل:تعاركنا
ما كمل وكال ضربتها وهمه استلموه
ام فاروق:ولك فاضل هاي سوايه شلون هيج سويت
ام فاضل:يا ابني عرسان شنو شصار وهيج تضربها صدك جذب تحجي انت كومي يمه تعالي اغسل الج بماي بارد وبدلي هدومج ولج رند اركضي جيبي شي تلبسه من غرفتهم
اني كنت بينهم كاعدة وفاضل يمي ساكت مدنك عليه ويباوع بوجهي وما يرد عليهم عيوني ما تبطل دمع وهو يمسحهن وكامشني من رقبتي من وره لا ارفع راسي لان كل شويه ارفعه اريد يبطل
بعدت ايده عني ورفعت راسي تقرب مني ويحجي بصوت ناصي
-حبيبي نصي لراسج لا ترفعيه يرجع الدم لمعدتج واهدأي شويه كافي بجي حتى يوكف النزف
ردت اوكف من يمه ضايجه منه كلش وما اتحمله ولا اتحمل اسلوبه مال المرضى النفسيين خايف عليه هو منو السبب غيرك لو بيه قوه اتعارك وياه بس حيلي راح و كمشتني دوخه رجعت كعدت بسرعة وزاد البجي وصار ينسمع الكل انسحبوا من المطبخ بقت بس وجد ما يشملها اي قوانين و الظاهر هو اشر لهم اني بس مدنكه وابجي كلهم طلعوا واني اريد اروح وراهم كعدني وقربني اله ولحضنه يا كثر كرهي اله حجت اخته المحبوبه اللطيفه
وجد:ادري يا فاضل بربك هاي سوايه ما اريد اعرف اللي صار بس هاي كدامها انت غلطان لو شصاير انت ما ضارب مره قبل تجي تضرب ومنو سنا وهي بعدها عروس
دفعت ايده اللي محاوطني بيها وكفت ما تحملت اسمعهم صح موقف وجد كان وياي وتدافع الي بس اعرفها احتمال هي تريد تهدأني وتسكتني ويطبطبون على كتفي وينسوني السالفة هذا واحد من اساليبهم الخبيثة عود يعني غاليه عنده وتعاتبه لو ما هو لساه عايش على الاطلال
صعدت الدرج بصعوبة واني دايخه دخلت للحمام غيرت ملابسي وخشمي وقف نزيفه الحمد لله وطلعت ادور موبايلي اتصل برائد يجيني ولو هي الدنيا ليل بس لازم اطلع منا
كلبتها للغرفة والموبايل ماكو دخل فاضل للغرفة وتقرب مني يحضني وقبل لا يتقرب وكفته بايديه ما اريده يقترب مو طايقته ابد
-رجاءا عوفني انت مو ابن عمي وتدعي تكول احبج اترجاك عوفني تره ما اتحمل بعد والله
-سنا بس اسمعيني انت عصبتيني
-لا تكمل ما اريد اسمع اي شي بس عفيه عوفني لخاطر الله تعبانه ومتأذيه
-براحتج نامي والصبح نسولف
-ما نسولف
رجعت لبحثي عن الموبايل وهو يتفرج
-شنو تريدين
-موبايلي
-عندي
انداريت عليه وشكو غضب بالدنيا بعيوني هو واكف ببرود
-شنو ؟؟؟؟؟شنو عندك انطيني موبايلي
